Read Southern Rengma Naga SENKETHYÜGÜ 10 Bible Online

SENKETHYÜGÜ 10 - Southern Rengma Naga bible

SENKETHYÜGÜ 10

¹Tekhvu kesi le terzü rünkegwa khin apentha gwün nten lahü, lo kepho keshanyu le kensü kedatsin bo nshvu la logwa.

²Kenjü gü thyüshü kehü tsüle kensü nyu jvü lo njü kemvu thyü kehü tsü le kephonyu jvü.

³A-le tson nenyu teno kethyü tesin dan-e a-kepho tsü le sha tsentsü; a-le temi aphu no a-le kephonyu tse sha lola hü.

⁴Nso keda gü le nge a-nyunta lola yatselo, nzan kenke lesü pe a-ben ka shünya, nle ntsema laya tselo thyükezü kedae jüshü la logwa.

⁵Kazü nyu njükemvu nme le kebin ale hyu-kekvu kesen nyu genyu njümvu kela.

⁶Kenya nyu swümvu lao kekvu kesen pe kepho nyu tsüla.

⁷Donyu le keru ge dun lo teshwe kepfü nyu no do hontse tsonchü kebin ale hyu laso.

⁸Nle chwe tso hü yatselo, nle tsünyu cheti, nle me chwi pfürhen yü yatselo peri le n ndu ti.

⁹Nle tso yhe yatselo, tso ge njün loti. Nle tesen dukha yatselo nle tsüka jün loti.

¹⁰N nri le a-yi gwamvu bin-o nle a-yi thyü lomvu yatselo nle tsü sen-o nkekvu thyü kvu mvu loshvu.

¹¹Nle peri gü no n ndu ri laya tselo nle peri jvüsha kebin tsü le a-kon ndi.

¹²Kensü nyu le nyu zozhü yo tsü le kerühvu sen ryü a-tsü hü, ai kephonyu le a-npvü a-jo genyu nke lahü.

¹³A-le tharüchün kemvu jozo so-o, kemu jo zope kenkhin thyü lahü.

¹⁴Kephonyu le jozo zobin hü. Siki nyu le ryü tiyo temi nme shamvu, lo temi nme ngun kesi siki nyuthyü tiyo pe ngun ka zo keloi ndi.

¹⁵Pho ritsin-o a-ka ki kegun tson fülo sha kemvunyu peha le thatho thyü a-hokeli ritsin lahü.

¹⁶A-raja le selo thyüri, lo sharhinyu dan le khensin ho kebin kazü gü le kevü keben bin hü.

¹⁷Ai kazü, a-raja le a-npvü tharhilo lo sharhinyu dan le gwünkho ka tyütsü, lo anyugun npvü anyugun kekhenio nzeü mvu kebin kazü gü le hengwa le.

¹⁸Temi nme le ntsü nthyü rio a-ka ketsü lomvu yatselo, tsü le jen ti, tson-o ka gü le che lati.

¹⁹Keho le nthyü pe nkenyü, lo zu le nmhun thyü nben shü hü, ai nle pisa sen mvu tse tsü hyu loho.

²⁰Rajagü nkhin nya, zoshwi mvuo nnyun nyue, lo kenya gü nkhin nya, n zhütsen ki n npvüe. Nle nyu zoshü yo tegü nme le sen gü au ka zoshü lae logwa le.