Read Southern Rengma Naga SENKETHYÜGÜ 2 Bible Online

SENKETHYÜGÜ 2 - Southern Rengma Naga bible

SENKETHYÜGÜ 2

¹Ale akenyü thyüo nyunkenyü le nyuyo shala titse rhilo. Ai ale hyukelo le tsüko a-kenrun.

²Ale shakelo le kenyü le kepin lo ketegvü kethyü le ngenyu kegwa ndi tse shalo.

³Thakesha nnyüo tsü hü kegü ka zu pe athyü kesherhün-o gwünkho gwasa hüti tse ale rhilo. Kazü hinyu kezü ki keyhun ka temi le hihontse lo gwatsin ti ado tse ale rüchün.

⁴Ale tha kedada thyü pen lo. Ale aja thyülo lo vain sen lo.

⁵Ale chwi thyülo-o terasha kechacha aphu pe tsünyu sen lo.

⁶Ale zi tso lo-o zü tson süshü.

⁷Ale do kechon heilo, lo akanyu nnyukelo do kobin. Jerusalem nyu yhun keryü nyu aphu nyeki ale senru chon le bin.

⁸Ale kekvu sen kebin kazü gü raja kenya kanyu ko ale rakagi lo suna pe khwe njü. Lü kethyü nyu tenunyu lo pechenyue bin, lo ale pechenyu le tepen rüsi lo kegwa tenunyu aphu bin.

⁹Ele, ale gon, Jerusalem nyu yhun keryü nyu aphu nyeki gon lo akensü ndi lamvu.

¹⁰Lihi-e ale nyu lonyü yo, tsü aphu bin. Ale akenyü yhüdyü nme khemvu. Atho aphu nyu ale ketekho, lo hi aphu achün.

¹¹Tson-o ale thyü keshü aphu, lo dihontse kenjün thyü tsü thyüyo rüchün shü laryü tsü le a-kon nme ndi tse ale shalo. Tsü le tsangkenbu hü kebin hontse a-kon ndi shü.

¹²Raja nyu nme le a-mhundyü raja dan le nyuthyü yo tsü thyülo kegwa gwenzin. Tson-o ale thasha nmvue nyun yhün kemvu nmvue kepho le nyu yo rüchün so.

¹³Tsontsin, “Keben le kezün nye gwakvu kethyü hontse thakesha le kepho nye gwakvu kethyü ale shalo.

¹⁴Thakesha nyu le a-le dika gü jüyo shabin ai kepho nyu we tsonmvu.” Ai tsühontse kethyü le ngun aphu khwebin tse kethyü ko ale shalo.

¹⁵Ale a npvü rüchün-o, “Ale kephonyu hontse kenjün thyüti. Tsügenyu ale thashao nyu kechwi hyu lola?” “Thame hyulomvu" “Thame hyulomvu" tse ale zonishü.

¹⁶Temi nme-e thakeshanyu rüchün hümvu, lo nme-e kephonyu rüchün hü mvu. Ryükejü jon ki ngun aphu nmhin lati. Ngun aphu simvu loshvu-kesha güe lo kepho güe keme tse.

¹⁷Tsügenyu a mhundyü ka keyhun hile a-kon nme ndi le, tsünyu kenjün kethyü nti a-me thame senryü mvu. Tsü aphu a-kenrun; ale tsangkenbu hü kebin gwenzin.

¹⁸Ale thyükeshü lo ale chün kelo nme-e agenyu mvu laso, ale tsü khepe asun kethyü gü tsü kelai genyu,

¹⁹lo a-le thasha-e logwa, nmvue pho-e logwa- segü le shamon? Tson-e ale thyükeshü tsü aphu a-le lo lati, kazü higü nyu a thakesha le chün kelo aphu. Tsü aphu a-kenrun.

²⁰Tson-e ale kenjün thyü sao thatho thyükeshü genyu rünyun mvu.

²¹Nle n thakesha, kekokepe, lo ndo kegwa aphu sen-o tha peha thyüshü, tson-o tsü khepe tsügenyu thathyü kemvu nyu peha tsüla. Tsüle a-kenrun, lo tsüle njü mvule!

²²Nle nyhun then thatho thyü hokeli hüo tsügenyu nyu hyulo la?

²³Nle yhun kebin then, thatho thyü kehü nti. Kheje nyue nnyun le rüyü lomvu. Tsü aphu a-kenrun.

²⁴Temi nme le a-le chün kelo tyü lo tsüo a-sherhün kelo tsü le kegwatsin. Lo ale shakelo le hi-e Sunggigü kipon ryü.

²⁵Nmvu yatselo nle dihontse tha lihi-e tyüo nsherhün lo tila.

²⁶Sunggigü le thakesha, kekokepe, lo nyunkenyü pe a-kenyü kehü nyu tsühü, ai a-le kemu nyu no thathyü, thachün, lo ntsen bin-o anyugun le hyu kelo tsü pe a-kenyü nyu tsü lahü. Tsü aphu a-kenrun. Tsü le tsangkenbu hü kebin hontse le.