Read Southern Rengma Naga SENKETHYÜGÜ 3 Bible Online

SENKETHYÜGÜ 3 - Southern Rengma Naga bible

SENKETHYÜGÜ 3

¹Kazü hinyu tha thyü kehü phu Sunggigü le kejü kelo gwünkho ka thyü hü.

²A-le kenyu gwünkho lo kesi gwünkho; kesen gwünkho lo phü kela gwünkho,

³boshvu nrün gwünkho lo thyü ngwa nrün gwünkho, borho kela gwünkho lo thyüni kelo gwünkho, thoshü.

⁴A-le nyungwa kemvu gwünkho lo shekerhün gwünkho. chekechü gwünkho lo dakethyü gwünkho,

⁵tso pe shwela nrün gwünkho lo tso jün kequen nrün gwünkho, Kenba nrün gwünkho lo kenba kemvu gwünkho thoshü.

⁶A-le hyukelo gwünkho lo nmhe kela gwünkho, ntsenkelo gwünkho lo shwela nrün gwünkho,

⁷sürhen nrün gwünkho lo nkhvü nrün gw"nkho, ntsema bin nrün gwünkho lo kenthon nrün gwünkho thoshü.

⁸A-le keso nrün gwünkho lo kenrhi nrün gwünkho, teri gwünkho lo gwaketho gwünkho thoshü.

⁹Ngun le ngun tho aphu nyu nyu kechwi hyu lola?

¹⁰Sunggigü le khvukensu pe ngun ge keshü ale shabin nle.

¹¹A-le tha aphu genyu gwünkho to thoshü. A-le ngun no siki rüla shanyü ho kethyü pe ngun tsü, ai a-le nyuthyü bin yo shakekho shüo rünyun lo kegwa pe ngun tsümvu.

¹²Tsügenyu ngun le rhün kebin ka nnyun nyüo thyülo kegwa kho thyülo gwa tse ale shalo le.

¹³Ngun aphu ngun le thatho thyü kebin genyu tyütsü lo shekerhün thyümvu loshvu. Tsü le Sunggigü le khi keshü.

¹⁴Sunggigü tho aphu kethonthen bin titse kethyü ale shabin. Nle tsünyu thame pe sin loho nmvue tsünyu thanme khela loho. Lo Sunggigü le thyükeshü nme le ngun no a-nshvulo nrün genyu le.

¹⁵Nyuthyü bin yo lo nyuthyüla logwa yo tsü aphu himhundyü nyu thyü laso. Sunggigü le tsü gwenzin kethyü tsü no thyü nilo thyüni bin nyo.

¹⁶Tsünyeki, kazü higü nyu kenjü lo ketsin thyü kezü bin ka serikemvu le kebin ko ale hyulo.

¹⁷Ale a npvü a nthon-o, “Sunggigü le kemitsin nyu lo gwakemvu nyu aphu kenme thyü jünkera ti, tha aphu lo thatho aphu a-npvü a-gwünkho thokeshü nyu thyü kebin genyu.”

¹⁸Ale rüchün kelo le Sunggigü le ngun kegwakeshvu shwibin, ngun le nyukhu dan nyeki gwakvu mvu tse tsinpe ngun hishü.

¹⁹Kenme kethyü le temi lo nyukhue khwe kebin genyu. Nme ko kecha gü hontse sila hü. Au kenyhun nren nyhun keshü kenme. Temi hile nyukhu nyeki gwakvu mvu, ligü higüe keyhun hile a-kon kendi le.

²⁰Au kenyhun nren tsüka chwiryü; lo kenyhun nren rani tsüki gü lati.

²¹Segü le dihontse temi kapu le tesozin nsin lo nyukhu kapu le tesinzin kazü nyu nshe titse sha tsentsü lo tila?

²²Tsügenyu ale shakelo le ngun le thyülo kegwa gü le ngun le nyu genyu thatho thyü hüyo tsü sen-o ngun sherhün lo. Ngun le thyülo kegwa kecha nme ndi. Ngun kesi siki nyuthyü la tiyo ngun le shakeloi tson nme ndi le.