Read Southern Rengma Naga SENKETHYÜGÜ 4 Bible Online

SENKETHYÜGÜ 4 - Southern Rengma Naga bible

SENKETHYÜGÜ 4

¹Tsüsika ale kazü hi gü nyu njükemvu aphu nri nishü. Me le nshwe kehü nyu le chübin, lo temi nme anyugun che mvu. Temi nme anyugun chemvu kechamvule anyugun nshwe kebin nyu danzin kvu kebin genyu.

²Ale si-o tinkela dan rüsi; anyugun le yhun kebin nyu nyeki gwa.

³Ai tsü hvu nyeki nnyu gun ryü kemvu dan we gwakvu, kazü higü nyu njü kemvu hyumvu shü kethyü dan.

⁴Ale nyu genyu temi le gwa lo titse hokeli hüyo tsüko shabin: tsüle anyugun kajon nyu rüsi kethyü genyu le. Ai tsü le a-kenrun. Tsüle tsangkenbu hü kebin gwenzin.

⁵Anyugun le temi le a-ben pe thathyü mvuo khensi kela tsü le kepho le tse zohü.

⁶Tson bin logwa, ai tsangkenbu tenlo titse gwünkho aphu ben hvu pe thathyüo ra fü ho kebin nyeki keshanyu nti sen-o nyun bwenye kebin gü we gwakvu.

⁷Ale keyhun nyu a-kenrun kethyü peha ko shabin.

⁸Hika temi nme le a-npvü yhun hü. A-le a-nyu peche ndi lo a-sikezen nyue ndi, tson-e a-zintse thathyü bin hü, a-le kebin kenya tsü sen-o rünyun lomvu. Segü genyu a-le thathyü kenjün thyü lo yhun ketegvü lomvu hü nla? Hiko a-kenrun, lo yhun kenjün kethyü tson gwenzin.

⁹Mi hvu le nme nyegwa, au kengüo thatho thyü pe gwasa logwa.

¹⁰Au nme le chelae kecha gü le a-cheo no so logwa. Ai nme le a-npvü hüo chela yatselo gwamvu sa, a-keche mi kendi genyu.

¹¹Kun yatselo, mihvu le kengü zhüo nyen bin logwa, ai dihontse nle n npvü nyen lo mon?

¹²Temi nme wheo a-nyeki kvula lo kegwa tsü mihvu yatselo nren logwa. Kenshen kenra kethyü ron le bothü tsen.

¹³Temi nme le rhokedyü nyu yhun soryüo a-kazü nyu raja thyü logwa, nmvue dokanyu bin-o raja bin ge gü logwa, ai a-kethen ki a-le phorio mele a-senkethyü lomvu yatselo a-le selo nme le tha ndi ai nsü kethyü gü nyeki gwakvu mvu.

¹⁵Ale kazü hinyu keyhun nyu aphu rüchün shü, lo ale shakelo le bin peha ki selo nme le raja gü bin khilo nrün le anyugun dan nyu bin.

¹⁶Raja nme le temi swülobu keho sa kekvu sen bin-e logwa; ai a-le tin lalo, a-le thathyü keshü genyu temi nme a-cheno letse kethyü ndi lati. Tsü le a-kenrun. Tsü le tsangkenbu hü kebin hontse le.