Read Southern Rengma Naga SENKETHYÜGÜ 5 Bible Online

SENKETHYÜGÜ 5 - Southern Rengma Naga bible

SENKETHYÜGÜ 5

¹Kershvuka ki kegun ka pütsü salo. Kephonyu kenjü lo njü kemvu shahü kemvu nyu le thyü kehü hontse rotho thyü kebin nyeki thashakelo we gwakvu.

²Rüchün shü rio zolo, lo whüwhü tse Sunggigü ka njo shünya. A-le tsangge bin lo nle kazü nyu hü, tsügenyu nle zomvulo keshvu nyeki kerüche zo nya.

³Nnyu nkhi chon lo nmin gwamvu chonkvu logwa, lo nle jozo chon lo tha peha zozü chonkvu logwa.

⁴Tsügenyu nle Sunggigü ka njoshü lo, thyülo kegwathen tsü thyü nmhe lalo. A-le kepho le a-kenyü hümvu. Nle nyuthyü titse njoshü yo tsü thyüla.

⁵Zoshüo then mvu kela nyeki zomvu shü kethyü we gwa kvu.

⁶Njo genyu mu lanya, tson-o Sunggigü püshükeda gü ka nle tsükon zomvu tse zonya. Nyuthyüo a-no nle thyü kebin nkela bin mon?

⁷Tha kechon le nmhundyü ngwe bin, lo thatho kenrun kechon thyübin nmvue jokechon zo bin-e nle Sunggigü nshvu mvu loshvu.

⁸NLe sorkari le kendinyu nshweo anyugun kenjü lo ketsin gü thyüshü mvukela kehyu ka ndun thyü nya. Kedanyu aphu a-so keda nme le a-ketsen hü, lo au mihvu nren nyeki ketetso nme le au ntsen hü nyo.

⁹Raja güe lowgvü kelo sen hü.

¹⁰Nle pisa tepen hü yatselo, thame kae rünyu loho; nle nnya lonyü yatselo, thame kae nle hyulo kenyü kho hyu loho. Tsü le a-kenrun.

¹¹Nle nnya chon lo nle temi chonkvu ginthyü mvu loshvu. Nkechwi le nle nnya letse shakelo tsü nti.

¹²Thatho thyü kehü gü le tyü kekü nmvue tyükü kemvu hyu logwa, ai a-le kheje gwen zhü bwenye logwa. Tson-e kenya gü we, thakechon le kebin genyu a-nyunkhio zhü loho bin hü.

¹³Ale kazü higü nyu kenrin kethyü nme kehyu le hi: temi le senmvulo keshvu le keryü ka sen nrün genyu pisa ntsenlo,

¹⁴tson-e hengwa kemvu peha ka tsü aphu nkelao thame nsen pe anyugun nyenyu ketsü ndi lahü.

¹⁵Nle thame sen-o kazü hinyu ryü kemvu hontse thame sentin loho. Ngun le thatho aphu thyübin yatse-e thame sentin keloi mvu.

¹⁶Tsü le njü mvu le! Nle keryü hontse tin ti. Ngun le thathyü, tsangkenbu ten lo titse ndo-o nyu hyulo la?

¹⁷Ngun le kezün lo nyungwa kemvu, nyun kenkhi, nyunkenta lo kehokenyü nyu yhun hü.

¹⁸Ale shakelo le higü hi: ligü higüe thyülo kegwa kegwatsin gü le Sunggigü le keyhun kezü pe a-ketsü gwünkho ka a-le thathyü kehü tsü tyütsüo shekerhün thyü kelo; pe temi ketsü le hile.

¹⁹Sunggigü le kenya lo kanyü pe temi nme tsü shü yatselo a-no tsü sen shekerhün thyü, a-le nyugenyu thathyü hüyo a-kenyüo tsü thyü mvu loshvu. Tsü le Sunggigü kipon khi keshü le.

²⁰Sunggigü le a-no a-kenyü lolo tse keshü genyu, a-keyhun kezü tsü rüchün a-nyunkhi sa loho.