Read Southern Rengma Naga SENKETHYÜGÜ 6 Bible Online

SENKETHYÜGÜ 6 - Southern Rengma Naga bible

SENKETHYÜGÜ 6

¹Kazü higü nyu njü mvusa kethyü tho ale hyu.

²Sunggigü le kenya, kerühvu, kebin pe temi peha tsüshü a-le lokenyü aphu, ai tson shüo no sen a-sherhün lomvu. Tsü sunka tesin peha no ryü sen shekerhün thyü lola. Tsü le a-kenrun lo tsü aphu njü mvu le.

³Temi nme le a-nyenyu min tsime le bin lo yhun thon sae logwa, ai a-le yhunthon sabin yatse-e nyukenyü a-jün hyulo mvu lo ye kho tse sio sun mvu yatselo nyuhanyu kesi nnyu kelo gü we gwakvu tse ale zobin nle.

⁴Nyuhanyu tsügü nnyu kemvu we gwa; tsü le kezün nyu hyumvu la, tsüki nmhin la.

⁵Tsüle tsangkeben hyumvu nmvue keyhun le dihontse yo shamvu, ai a-we kerüyü hyulo laso.

⁶Chen yie hvu yhun bin-e shekerhün thyü yhunlo kemvu temi gü nyeki nyuhanyu gü le gwakvu. Au mihvu nren bin me ki gü ti.

⁷Temi le tha peha hyutyü nrün genyu a-tho aphu thyü bin hü, ai a-kesü thyü lomvu.

⁸Dihontse thakesha gü le kepho gü nyeki gwala? Kendinyu nme le dihontse yhun gun tiyo shao nyu kegwa le bin la?

⁹Tsü le a-kenrun; tsü le tsangkenbu hü kebin kenme. Nle nyule bin yo tsü sen rünyu kebin gü le a-zintse tha peha lonyü kebin gü nyeki gwa le.

¹⁰Thyü kebin aphu nduka nyu rhi pe bin laso, lo temi nme le anyeki kenko nyu zen kenli loho tse kethyü ngun aphu shabin nyo.

¹¹Kenli thonlo, tsüle kenrun thyü chon gwenzin, lo nle gwakvu lomvu.

¹²Dihontse temi ligü higüe kengü hontse tinla kehü a-keyhun kezü lihi kemvu nyu nyu le gwatsin yo shalo mon? Dihontse temi nme le a-kesi siki kazü higü nyu nyuthyü tiyo shalo mon?