Read Southern Rengma Naga SENKETHYÜGÜ 7 Bible Online

SENKETHYÜGÜ 7 - Southern Rengma Naga bible

SENKETHYÜGÜ 7

¹Zan kegwa le terzü a-rün kegwa nyeki a-min tsen; lo kesi jon le nnyu kelojon nyeki gwa.

²Keho bin nyu kegü nyeki chechü kebin kanyu kegü we gwakvu, kechamvule rhün kebin nyu le a-zintse kesi le ngun aphu khwebin tse rüchün hü mvu loshvu.

³Kenyü nyeki kechü le gwa; tsüle nmhun gwamvu bin logwa, ai tharüchün kekho kvu lo kehü genyu.

⁴A-zintse nyunkenyü rüchün kehü nyu le kephonyu. Temi kensü nyu le kesi rüchün shü hü nyo.

⁵Kensü nyu le nrhokeshü le kephonyu le lüthyü nshwe kebin nyegwa.

⁶Kephonyu kenyü le mah nyu tsehü ro sheshe tse kebin hontse. Tsü le a-kon nme ndi.

⁷Kensü nyu nme le temi peha sabin yatselo a-le kephonyu hontse. Nle jvüjwe khilo yatselo nle njvü bo nshvu bin nyo.

⁸Tha lihi-e a-kenkhin le binzen nyeki gwa. Nyhenhi kethyü le ketekho nye gwa.

⁹N nyunkenta kekhe nilo; nyunkenta pe a-nyun nyu shüpfü kehü tsü le kephonyu.

¹⁰Nyuthyüo nduka gwünkho le gwakvu ola? tse ketso nya, thakeshanyu le tson ketso hü mvu.

¹¹Yhun kehü nyu aphu nsü lo zü le, tsü le gwen lo kegwa nme hyukelo hontse

¹²lo tsü le pisa le nkeni keshü thyülo kegwa hontse pe ntsü ti. Kensü le nkenishü ti- thashakekho kelo kechwi le hi.

¹³Sunggigü le nyuthyü shüyo rüchün shüta. Sunggigü le thyü keho shükela gü segü le thyü njü shülo gwa tila?

¹⁴Ngenyu tha lihi-e gwabin yatselo nkenyülo, lo kenjün kethyü le ryü lo, rüchün lo: Sunggigü le nyunkenyü lo kenjün kethyüe nishü hü; siki nyu le ryütiyo nle sha loho.

¹⁵A keyhun le a-kenrun, ai ale tsünyu tha aphu hyu laso. Temi kegwanyu nme sila, lo temi kechanyu nme le, gwamvu hüe yhun bin logwa.

¹⁶Tsügenyu nyuthyüo gwaritsin nmvue nsüri tsin-o n npvü nboshvu hü nla?

¹⁷Ai serimvu ritsin nmvue phori tsin-o gwünkho pen kemvu ka sila nya.

¹⁸Keyhun nren denzin gü ritsin nya. Nle Sunggigü rühvu yü yatselo nle lihi thyüe gwa loti.

¹⁹Kekvu kesen nyu min tseryü le nyida nme genyu thakethyü nyeki kensü le temi nme genyu thathyü chon shü hü nyo.

²⁰Kazü hinyu temi nme-e gwünkho aphu ka nyu le njü yo thyü lo thyüzü kemvu ndi.

²¹Me zo aphu nyü nya- n gonyu le n nshwe kebin nyülo-e shamvu,

²²lo nle gwün kechon kechanyu nshwe laso tse kethyü n npvü shabin nyo.

²³Ale akensü sen-o hi aphu kegwa keshvu shwi laso. Ale nsü titse rhilo, ai tsü tilo mvu.

²⁴Keyhun hile a-kon le nyu genyu yo segü le shalo tila? Tsü le ngun genyu ntsunri, shalo tsenri le.

²⁵Ale thashakekho lo titse akeyhun pe shüo swü; ale kensü lo ale ketso kebin dan fülo titseo serikemvu lo kepho le dihontse yo shalo titse rhilo.

²⁶Ale tenunyu le kesi nyeki gwamvu kvu kethyü hyulo. A-le pe ntsü kebin keso tsü le chwa nmvue joh hontse nphin lo lati. Temi Sunggigü kenyü thyü kehü gü le tin lati, ai tsügi le kemu nyu tenlo lati.

²⁷Ele, tse senkethyü gü le zoshü, ale jokeni keshü fü ketse ka higü hi kesha shanyu sha lole.

²⁸Ale Kenikeshü kecha fü ai nme-e hyulo mvu. Ale rühvu lo kegwa pechenyu yie dan nyu nme hyulo ai tenunyu nme-e hyulo mvu.

²⁹Ale shakelo le higü hi: Sunggigü le temi thyü pe njü shü, ai ngun le ngun npvü serikemvu kechon fü lola.