Read Southern Rengma Naga SENKETHYÜGÜ 8 Bible Online

SENKETHYÜGÜ 8 - Southern Rengma Naga bible

SENKETHYÜGÜ 8

¹Kensü nyu nti thakon thari sha hü. Kensü le a-thyü pe nyü kemenra lo a-mhun kezün ndi lahü.

²Raja güle nyu zoyo thyülo, lo nyhun nrun-o Sunggigü ka njoshü nya.

³Raja gü le nyuthyü nyü yo thyü logwa, tsügenyu amhundyü ka bin nya; kenshvubin tsü hontse kethyü ka bin nya.

⁴Raja gü le kekvu sen-o thathyü hü, lo temi nme a-le thyü kebin ketsolo nrün ndi.

⁵Nle a-johokeshü zen kebin then kenshvu ndi, lo kensü nyu le dihontse lo nyu gwünkho ka tsü thyü tiyo shashü.

⁶Tha lihi kethyüe gwünkho to lo tson kenjü le bin hü, ai ngun le keshanyu nti sha hü!

⁷Ngun nme siki dihontse tiyo shamvu, lo ngun ka zo keshüi temi nme ndi.

⁸Temi nme simvu lo titse a-ntsenlo nmvue a-kesi jon pe shümvu kelo ndi. Tsü le ngun le nrhilo keho teri nme; ngun le kebuchwi keloi mvu.

⁹Kazü hinyu thyükela dan ale rüchün kebin ka ale hi aphu hyu, temi peha le kekvu sen lo kechanyu le anyugun hensin nyu kenjün thyü.

¹⁰Ele, Temi serikemvu nyule sio pe sun lao anyugun sika nyu bin, ai anyugun le gwakemvu thyü kehü nyida gü nyu temi dan le sika ki raniryü kejü tson nyu anyugun shwe. Tsü le a-kenrun.

¹¹Nyu genyu temi le kemu thyü titse ndo bin hü nla? Kemu kethyü nyu shaja pe tsü whütse shü kemvu genyu le.

¹²Kemu nyu nme le gwentsi ge kemu thyü lao yhun bin logwa. Ele, anyugun le nyu zoyo ale shabin nle: “Nle Sunggigü jozen yatselo tha aphu gwa logwa le,

¹³ai serikemvu nyu genyu we aphu gwa loho. Anyugun keyhun le kengü hontse selo ka si lati, anyugun le Sunggigü jozen kemvu genyu.”

¹⁴Ai hile thakon ndi. Kazü günyu nyuthyü bin yo nrishü: Khika we kemitsin nyu le serikemvu nyu shaja hyulo lo serikemvu gü le kemitsin gü chün hyulo. Tsü le a-kenrun letse ale zo.

¹⁵Tsügenyu temi le a-npvü a-kenyü thyülo mvu loshvu tse ale tenyen, keyhun higü nyu a-le ketegvü lo kegwa le tyütsü lo a-npvü a-kenyü thyü kelo tsü nti genyu. Kazü higü nyu Sunggigü le pe a-ketsü keyhun gwünkho ka a-le thathyü kehü hontse higü hi thyü logwa.

¹⁶Ale nsü lo titse lo kazü higü nyu nyuthyü gun jüyo shalo titse keso ka, ale shakelo le nle kheje nyu lo nhenyue chon bin,

¹⁷lo Sunggigü le nyuthyü bin yo shalomvu tse bin logwa. Nle nyhen thyüsa bin-e, nle sha loho. Temi kensü nyu le shabin nle tse bin logwa, ai anyugun le shamvu.