Read Southern Rengma Naga SENKETHYÜGÜ 9 Bible Online

SENKETHYÜGÜ 9 - Southern Rengma Naga bible

SENKETHYÜGÜ 9

¹Ale kethonki rüsa tse hi aphu rüchün-o hyukelo le Sunggigü le kensü lo kemitsin nyu tho ketsen hü, anyugun keso lo kenrhie. Temi nme nyu le a-mhundyü ki bin nyo thame shamvu.

²Tsü le kechacha thyümvu. Kemitsin gü lo serikemvu gü, kegwa gü lo gwakemvu gü, kenshün gü lo nshün kemvu gü, rora thyü kehü gü lo thyü hü kemvu gü ge-e ryüti. Temi kegwa gü le kemu gü nyegwa kvumvu; keswe thyü kehü gü le swekemvu gü nye gwa kvumvu.

³Kenme tse kethyü le aphu ge ryü hü, kazü higü nyu thakecha dan hontse hi le njümvu. Temi le yhun kebin then gwakemvu lo kennu pe a-nyun sü pfü tseo whütse sila hü.

⁴Ai kerhün nyu kazü günyu yhun kebin nyuwe a-kenrin peha le bin zun, tehi kerhün le shünyho kesi nye gwakvu.

⁵Ele, rhünkebin nyu le anyugun le siti tse kethyü shabin, ai kesi nyu we thame shamvu.Anyugun le anyugun chün le bin sinmvu; anyugun nmhin shü laso.

⁶Anyugun le so kehü, nrhikehü, nyhenhi kehü aphu anyugun zen-o si laso. Kazü higü nyu lihi thyüe anyugun le anyugun jün ndi so.

⁷Gü nchvü tyüo nshekerhün thyü binlo; nzu tsüo nmhun ben chwü bin lo. Tsüle Sunggigü mhundyü ka njü.

⁸A-zintse nshwi pe nsherhün lo nmhun ben chwü lo.

⁹Nle so kehü tenunyu gü zen nkenyü thyülo, Sunggigü le pe nketsü kenrun keyhun nyu yhun kebin then. Jon kenrun kenryü aphu nyu nle tsü hyu keloi nti.

¹⁰Nle lihi thyüe nkekvu thyülo, kesinyu kazü ki thatho, thakerüchün, thakesha, kensü kendi genyu- lo nle tsüki gü jünyo.

¹¹Ale kecha nme shakelo le, kazü higü nyu tin kenmhe nyu le a-zintse kvulo hümvu, lo kepeche gü le a-zintse terinyu kvulo hümvu. Temi kensü nyu le a-zintse a-gin chün tyülo hümvu, thakeshanyu le a-zintse nnya lo hümvu, lo thathyülo kekü nyu le a-zintse ketetso ki solo hü mvu. Hengwa kemvu le ligü higü ge bin hü.

¹²Dinyü n gwünkho le ryüzhü yo nle sha loho. (Ngun le rüchün bin kemvu ka whütse chwanyu tegü min kelo hontse, joh nyu tsehü tenkelo hontse gwünkho gwakemvu peha le ngun min lo lahü.)

¹³Thakecha peha ko ale hyu, kazü higü nyu kensü le dihontse yo tsinhi kegwa nme.

¹⁴Temi kechon le kendi rünyi keshe nme le bin. Raja kekvu nme le tsü hü. A-le tsü hun lo njüo chwida boren yü titse ndolo.

¹⁵Tsünyu temi tha ndi, ai a-do gwa sao rünyi gü kenishü lokegwa nyu nme le bin. Ai temi nme a-rüchün bin mvu.

¹⁶Ale a-zintse kensü le kekvu nyeki gwa letse zohü, ai temi nme kendinyu nme le nsü letse nmvue a-le nyu zoyo nyü shü hümvu.

¹⁷Kephonyu kehun nyu kehun kesen nyu nme le nra sen kebin nyeki temi kensü nyu nme le nkhvu tse jokezo nyü kelo we gwa kvu.

¹⁸Kensü le teri ronye nyeki thakegwa kechon thyüshü hü, ai kemu nyu nme le thakegwa kechon kecha lahü nyo.