Read Southern Rengma Naga LÜDAN LÜ GÜ 1 Bible Online

LÜDAN LÜ GÜ 1 - Southern Rengma Naga bible

LÜDAN LÜ GÜ 1

¹Solomon le ron keshü lü kezegwa tsin dan.

²Nle nmün pe a nbashü; nkeso le zu nyeki gwa.

³N rüla rünkegwa le bin; n zan zokeshü khwe le tsü hontse. Tenunyu le nsomvu keloi mvu.

⁴Azen lo-o, nnyi tinla tile; a raja thyü lo-o azen nkatsen ki yüta. Nnyi kengü shekerhün thyü tile, zu nyeki agun le nkeso rüchün ti. Tenunyu aphu nso hü nle.

⁵Jerusalem nyu tenunyu dan, ale nzün ai zegwa sa le, Kedar nyu phika khe kela hontse nzün, ai Solomon raja kanyü kesunphi hontse zegwa.

⁶Ale nzün kethyü genyu a-rüchün tsenyo nya, yhüko le apho kela genyu. Atsünyu dan le age anyugun nyuntao ano vain low nyu thatho thyü. Ale a ketsükela kelo gwenkho ndi.

⁷Aka zoshü, aso gü, Nle ntanyü zen gü diki no a-chvü lotyü tila? Nhennyu tsangnyü kethyü ka anyugun le dika rüyü tila? Nyuthyüo ano tanyü kekhwe kechanyu tanyü dan nyu nfü mvu loshvu ola?

⁸Nle bin gü shamvu ole, tenunyu dan nyu kezegwa tsin gü? Gü ntenyü dan thenlo; tanyü kekhwenyu dan phika khoka ntenyü dan chvü fülo.

⁹O, akeso gü ale nlope Faroah kerugari ka keru dan zen kendyü shüti.

¹⁰N pehü le njon ge tsü keryü le zegwa sa lo tyü hontse ngunda ge tsüryü.

¹¹Ai agun le ngenyu suna kerasü lo rakagi kerhün pe ntyü thyü shüti.

¹²A raja le a-zhü ka zhübin, lo a-terzü a-rünkegwa le süla.

¹³Aso gü le myrrh rün le bin a-le anyun so ge zhü bin.

¹⁴Aso gü le Engedi ka vain low nyu tehen nye le pun kebin hontse le.

¹⁵A keso gi, nle ditsüki zegwa la, n keso yhütyü le ditsüki ntsen la!

¹⁶A keso tsin gü nle ditsüki zegwa la; nle ditsüki thyü akenyü la! Tehen kenjvü pe nnyi zhü thyüti;

¹⁷nnyi kapha le sedar pe thyüti, lo sipress bin pe nnyi shün jwe ti.