Read Southern Rengma Naga LÜDAN LÜ GÜ 2 Bible Online

LÜDAN LÜ GÜ 2 - Southern Rengma Naga bible

LÜDAN LÜ GÜ 2

¹Ale sharon nyu tehen nyekepun nme le, kazüthun pha ketejon nyu lily nme le.

²Lily le tsehü dan nyu kebin hontse a logwa lü gü le tenunyu dan nyu hü.

³Khinpho bin le chün nhyu senbin dan nyu kebin hontse, a keso tsin gü pe pechenyu kechanyu kendyü keshü le. Ale a-kengü shye hensin dun bin nyü lo a-rasha dan le amün nyu n yüle.

⁴A-le azen-o a-keho bin nyu ryüo Keso phikeden gü penso pe aso ge shü.

⁵A-le terasha kenko pe athyü nkvuni shü lo khinphosha pe ano tyü ketegvü lo! Ale keso nnyüo kvumvu laso.

⁶A-ben ngwazin pe ape hensin shü lo a-ben nzhüzin pe athün pen.

⁷Jerusalem nyu tenunyu dan, hagun joshü shülo; thyüzhe lo thyünyu kenmhe zo-o swe lalo hagun le ayi kekeso kevü mvu titse.

⁸Ale a keso gü khwe nyülo. A-le kazüthun gü so ge tin-o rincho pfüthü sen-o aki ryü jü.

⁹A so gü le thyünyu hontse, thyüshon bwe hontse. A-le kabon khoka sobin. A-le kafüphe ka nrishü a-kerija ka nrün shü.

¹⁰A so gü le a nthon shü. Ryülo, aso gi; a logwa lü gi, aki ryülo.

¹¹Tsangse gwünkho le gü laso; tsangri mvu laso;

¹²lojvü ki nye dan le pun bin so. Hile lü kethyü gwenkho so; low nyu nsu kekhun khwe nyülo bin so.

¹³Kherosha le nyün bin laso; tsangkenhi nyu vain kepun rün le gwasa bin. Ryülo, aso gi; a logwa lü gi, aki ryülo.

¹⁴Nle nsu le tsonye he ki kebu kebin hontse le. Ano nmhun kezegwa hyushü lo nkhwe kegwa nyü lota.

¹⁵Mesükerun dan tenlo, mesükerun nyu keshe dan, anyugun le ngun vain low kepun dan nkela kemvu ka.

¹⁶A so gü le ahon, lo ale a-hon. A-le tegvütyü dan nyu a-tanyü dan gin thyü hü,

¹⁷lonyü tsangnhi ryüo kezün gü le tinla kemvuthen. niryülo, aso gü Bether kazüthun ge thyünyu, thyüshon hontse.