Read Southern Rengma Naga LÜDAN LÜ GÜ 4 Bible Online

LÜDAN LÜ GÜ 4 - Southern Rengma Naga bible

LÜDAN LÜ GÜ 4

¹Aso gi, nle ditsüki zegwa la! Nmhun kesun phi, nyuki nkeso yhütyü le ditsüki benla! Nshün le nnyo pe Gilead rincho ge tenyü dan le ndyü tsenryü kejü hontse.

²Nhü le chon pe tanyü hü tse lao zü pe nlushü teri ka hontse. Nme-e ndi la mvutse; aphu kesen to gwenzin.

³Nmüntse le nikenhon hontse; nle jozo solo tsü le ditsüki zegwa la! Nmhun kesunphi nyuki njon le tsentsen tse.

⁴Ngunda le David tsokwe hontse, tepen lo nshwü, tsü ge ntyü le gida yie yie pe hüsü kenjü hontse.

⁵Nnyü le thyünyu hontse, thyüzhe kenyhun le tegvütyü nyela nyu kentsin a-chvüsü kebin hontse.

⁶Ale myrrh rincho ge lo tharünkegwa rincho ge bin ti, lonyü tsang nhi ryü. lo kezün gü ndila kemvuthen.

⁷A keso gi, nle ditsüki zegwa la; nle ditsüki gwa penla!

⁸Lebanon kazüthun ge tsü azen-o tsenryü la, anu; Lebanon ge tsü azen tsenryü lalo. Amana kazüthun raki, Seni kazüthun lo Hermon kazüthun shünyho lo meren le yhun kehü bin khelao tsenryü lo.

⁹A kenyütsin anu, nyhütyü, lo ntyü kelu nrikeshü ka nle anyun rühu lola sele.

¹⁰N keso le akenyü ritsin a kenyütsin anu, nkeso le vainzu nyeki gwa; nrün le ter rün kegwa nyeki gwa.

¹¹Nmüntse ge khuzü kenyü le bin; agenyu nnyi le nyüzü lo khuzü le. N phinya ge Lebanon rün kegwa aphu bin.

¹²A kenyütsin, anu le kekebu chwi nme, hunkela chwi nme, zükepen nme;

¹³tsünyu tehen gü le pun bin. Tsüdan le kheratyü bin hontse a-shakegwatsin nsha bin. Henna lo nard,

¹⁴saffron, kalamus, sinnamon nmvue rünkegwa kechacha lihi-e rho lamvu. Tsünyu myrrh lo aloes rün kegwa tsin aphu yhun bin.

¹⁵Zü le pen-o chwi gü ntsen, rinyu zü le tsun-o, rinyu dan le Lebanon kazüthun nyu tsun tsü ryü.

¹⁶Solo, Tesozin Tsangkenhi. Tesinzin Tsangkenhi, achwi whün shülo; rünkegwa pe tsangkenbu sü shüta. Aso gü no a-chwi nyu ryüo a-rasha kegwatsin dan tyülo.