Read Southern Rengma Naga LÜDAN LÜ GÜ 5 Bible Online

LÜDAN LÜ GÜ 5 - Southern Rengma Naga bible

LÜDAN LÜ GÜ 5

¹Ale achwi nyu yü, a kesotsin gi, anu. Ale atharünkegwa lo myrrh kequen bin; ale a khuzü lo khu kapon tyü bin; ale azu lo nyüzü tsü bin nle. Tyülo, kesonyu dan, tsülo, nle keso nyu nzeü lokemvu then!

²Ale zhü kebin ka anyun le chon soryü. A so gü le kakhin kekho keshü nminlo. Ano yüryü ta, akeso gi, a kenyütsin gi, a nsu. Khezü le ape ntsen laso, lo nmhuketsen le a pehü nche la sele.

³Ale a phinya yhün laso; ale nyu tsethyü ben nyani bin mon? Ale a pha sü laso; ale nyu tsethyü tsü nrhunila mon?

⁴A so gü le a-ben pe kakhin kesü shü, a-le a khonni ryü kela genyu akenyü sala.

⁵A-no yüryü titse ale ndolo. Myrrh pe aben yünlo, azenkero pe myrrh nyu ntsen lo; ale kakhin cha tezen lo.

⁶Ale kakhinshe pe aso gü tsüshü, ai a-le tinla. Ale a-khwenyü lonyü ritsin! Ale a-fü, ai a-hyulo mvu. Ale a-ko, ai a jokenishü mvu.

⁷Rikhun nyu le nyida gü rhiryüo ahyulo; anyugun le avü lo ajün la; nyida gü chwida kekhwe nyu le aperün sürhen la.

⁸Jerusalem nyu tenunyu dan, aka hagun joshü shülo, hagun le aso gü hyu yatselo, ale a-nnyüho-o kvumvu bin nle tse zoshülo.

⁹Tenunyu dan nyu kezegwa tsin gi; nso gü le kechanyu aphu nyeki kecha ole? A-rüla ndun kethyü nyu le bin-o agun no nka agun joshü tila?

¹⁰Aso gü le zegwa lo nko; a-le yie tseryü dan nyu nme.

¹¹A-mhun le lazo hontse lo nshwü; a-shün le sü, lo tegvü hontse metsen.

¹²A-yhütyü le rinyu le tsun kebin khoka nsu hontse zegwa, nyüzü nyu nsu sü lao rinyu khoka so kebin hontse.

¹³A-jon le a-kezü pe chwi nme nyu henkohenyü lo rünkegwa le sü kebin hontse. A-müntse le tegvütyü nye hontse, myrrh zü le nche bin.

¹⁴A-ben le kephu sa, lo a-le tso minketsen pe keshü benkhin pfü hü. A-min le tsun hü kenshwü, Sapphir pe tsü ge shü kebin hontse.

¹⁵A-din le marble kechon pe suna kerhunbin nyu dun kenjü hontse le. A-terün kepfü le, Lebanon kazüthun ge sedar bin kethon dan hontse le.

¹⁶A-mün le nnyü sa; a-rüla aphu akenyüri le. Aso gü le hihontse le, Jerusalem nyu tenunyu dan.