Read Southern Rengma Naga LÜDAN LÜ GÜ 6 Bible Online

LÜDAN LÜ GÜ 6 - Southern Rengma Naga bible

LÜDAN LÜ GÜ 6

¹Tenunyu dan nyu kezegwa tsin gi, nso gü le dikipon güla ola? Nso gü le ditson kipon güla yo agun ka zoshü lo, agun ko ncheo a-fü shü nrün genyu.

²A so gü ale a-chwi ki gü laso, balsam senbin le kebin bin ki. A-le chwinyu a-tanyü chvü thyübin lo lily nyekepun lü kequen bin.

³A so gü le ahon, lo ale a-hon; a-le lily nyekepun dan nyu a-tanyü chvü thyü bin.

⁴A so gi, nle Jerusalem hontse zegwa, Tarizah nyida gü hontse nnyun nyü nyida keda hidan hi hontse nkenyü ritsin le.

⁵N yhütyü a nri kebin tsü rani lo lalo; tsü le atenlo la sele. N pehü le nnyo pe Gilead rincho ge tenyü dan le kesü thyü ndyü tsenryü kejü hontse.

⁶N hü le chon pe ntsoka zü pe tanyü sü kela dan hontse. Nme nti-e ndi lamvu; aphu kendyü toto.

⁷N mhun kesunphi hensi ki njon le tsen tsen tse bin.

⁸Raja gü le rajagi hentsero, thenu hentetse, lo lübwe nyu swülobu keho le bin!

⁹Ai ale nme nti sohü, lo tsügi le nsu hontse zegwa. A nti le a-jvü nyugi a-le a-jvü so kepfü gi. Tenunyu aphu a-nrio a-shwe; rajagi lo thenu dan le lüthyü tsügi shwe hü.

¹⁰Nri keshü le tsangben chwiryü kejü hontse kethyü gü hile segü la? A-le zegwa pe, Shye nmvue yhüko keben kenshwe hontse.

¹¹Ale almond senbin dan nyu nsheryü ketejon gü nyu senbin bwe dan, lo vain nyü keshün dan, lo khüratyü kepun dan shwishü tile tse.

¹²Ale a kensü bin nyo; nle athyü pe teri kerugari keranyu dan le teri kethyü nnyü kebin hontse keso nnyüri laso.

¹³Shulam nyu lünyu, dathyülo, dathyülo. Agun no nda kethyü shwishü ta. Temi le tsonhvu thyüo a nri kebin janyu ale dathyü lo hagun le nyuthyüo a nrinyü bin nla?