Read Southern Rengma Naga ISAYA 1 Bible Online

ISAYA 1 - Southern Rengma Naga bible

ISAYA 1

¹Lesü higü nyu Uzziah, Jotham, Ahaz lo Hezekia dan le Juda raja thyü kebin gwünkho ka Sunggigü le Juda lo Jerusalem hvü genyu jolo pe Amoz nyugü Isaya tesha keshü jodan thu njü.

²Npugü le zo, “Tsang lo kazü, akhwen nyüshü ta! Ai anyenyu dan we a ntsun laso.

³Methu le a-npunyu shahü, lo gadae a-chvü pe ketsübin shahü nyo. Tsüle a temi Israel nyeki tha shakvu. Ai a temi we a shamvushü.”

⁴Yhun nyükemvü, gwakemvü lo kemu senye gü, nwe thyülo tiso! N kemu le nsüshe laso! Nle Npugü, Israel Sunggigü kenshün gü khelao rani kela genyu.

⁵Nle nyuthyüo kentsun tho thyübin hü nla? Nle shaja hyunilo nyü bin le? Israel, npe le tejün shvu nti laso, nnyun lo nkerüchün le kvumvu laso.

⁶N pe ka tsügü n pha keti a-kesen ndiso. Nmin pen kethyü kenyü tega lo tejün shvu nti laso. N kethyüshvu dan tsüle sü mvüe phin ketsü kelae mvü. Terzüe pe yün mvü laso.

⁷N nyida dan le mah no rokü lao nkazü ge temi le yhunmvü laso. N yhühyu nyu temi kecha le ryüo nkazü lola, lo tha aphu kecha laso.

⁸Jerusalem nyida mele hunpvükela tsü nti khepe vain lownyu rikhunbin nmvüe konkü lownyu then a-kehun kendi hontse laso.

⁹Kekvutsin Npugü le temi peha ntie nsen shümvü yatse kethyü we Jerusalem tsüle Sodom lo Gomorrah kenke hontse kelai so.

¹⁰Jerusalem, n kentsen nyu lo n temi le Sodom lo Gomorrah nyu hontse sele. Npugü le nka kezojo nyülore. Ngun Sunggigü le n senthyü shükebin nyüpetsülo.

¹¹Nle rora thyüpe atsü kehü hi aphu ale lonyü bin ado tse rüchün ole? Nle tanyü lo senru phou kegwa pe kershvu thyükehü nyeki ale kechon bin nyo. Ale methutse, tenyü lo tanyü dan zi lonyümvü laso.

¹²Segü le nno tha hidan senryüo arüshvu lotse zola? Lo segü le nno akershvüka nyu kedü hülo tsezo ola?

¹³Tsügenyu nle rüshvu kehü tho tsüle a-min ndi. Nle tha rope akerüshvü rün nyi ntsü laso. Nle shye keshün lo sabbath rühvu kehü lo kequen-o kehun kehü dan tho tsü ale nyhenloho so; tsü aphu nyu nkemupe thyü nrhu laso.

¹⁴Nle shye keshün genyu keho thyü lo jon kenshün dan zenkehü tsü ale anyuntsemi lo anyunphü laso.

¹⁵“Nben le tezi no swükela genyu nle kehithyü bin-e nyü loho, lo nben penso-o kehi thyüsa bin yatse-e ale nrishü loho.

¹⁶Nsü kenshün lalo. Lo ale hyukebin ntho gwakemvü dantsü thyüsinya. Tha gwakemvüdan khela,

¹⁷lo kenjü dan thyüshalo. Mele nshwenyhün kehünyu keche shü, tego nyu shwen shwishü lo maginyu nopen lo-o jo ketsin kezo tho thyülo.”

¹⁸Npugü le zohü, “Tsügenyu ngun jo penlatinu. Nle mupe nhonzüntin laso, ai ale nsü kenshün pe khütso kenshün hontse lati. Lo nle nhonzüntin lae, nno thyühü kechon hontse lati le.

¹⁹Nle ajo zenti yatselo nle kazü gü nyu tha kegwa dan tyü hüti.

²⁰Ai nle akenilao a ntsun tinkela we nle sitiso. Ale Npugü, ale zolaso.”

²¹Jo zenkehü nyidagü le keyüla chün ketyünyu hontse yhun bin laso! Tsüle gwengwa ka kemitsin nyu le kesü thyühü, ai ntsoka we me dukeshvu nyu nti laso.

²²Jerusalem, gwengwa we nle rakagi hontsehü, ai ntsoka we nle a-min ndilaso; nle vainzu kegwa hontse gunryü, ai ntsoka we nle zü hontse gwenzin laso.

²³Nsharhinyu le me kentsun nyu lo kerühu pvünyu; anyugun le jvüjwen lokehü genyu. Jokerabin nyu tego nyu jün zo hümvü, nmvüe maginyu le anyugun kenjü kezoe nyüshü hümvu.

²⁴Tsügenyu Kekvutsin Npugü, Israel nyu kekvu Sunggigü le zokebin hi nyüshülo, “A shwikerüchün nyu, ale hagun gen akhen lolati, tson-o hagun no akevüsin mvü latiso.

²⁵Ale n-ntsun ti. Tegi thyü kenshün kethyü hontse ale nthyü kenshün lati, tson-o n-nshün kemvü aphu khilati.

²⁶Lo nduka hagun kentsen lo sharhinyu hontse kethyü pe hagun tsüti. Tsüselo Jerusalem lope kemitsin gi, lo joketsin-kesen nyida letse loti.”

²⁷Npugü le kemitsingü, tsügenyu a-le Jerusalem lo tsünyu nyunkelu kelo nyu aphu keni loti.

²⁸Ai ligü higüe mupe antsun kehünyu ale tsünyu we boshwenla lo akhela kehünyu boshvü lati.

²⁹Tsonla yatselo nle senbin lo kejükelo chwidan rüshvukela genyu rünyu mvüsati.

³⁰Lo nle teshobin rügu kela lo züpe nye kemvü chwi hontse lati.

³¹Tsüselo mah kentsin keshanyu nme le jonyü rola kehü hontse gwakemvü nyu tho le anyugun nkelati. Tson-o temi nme-e kenke tsügü khinlo mvü lati.