Read Southern Rengma Naga ISAYA 10 Bible Online

ISAYA 10 - Southern Rengma Naga bible

ISAYA 10

¹Nwe thyülo tiso! tejvü kemvu thyüpe a-temi nshwen kehügü.

²Tsühontseo hagun le rhokedyü nyu no a-jün hyulo mvu lo a-kenjü pe tsümvu laso. Tsühontse kethyü nyu hagun le maginyu lo tegonyu hon khilola.

³Sunggigü le shaja pe hagun tsü solo dihontse mon? A-le kazü nithen ki kenkekemhü senryüo hagun tsülo nyu tse thyü mon? Dikipon hagun keche fu gü mon? Hagun kenya lope dikipon kebu tila?

⁴Teri nyu hagun boshvula nmvue do hontse hagun süzen tin lati. Tson kela siki-e Npugü nyunkenta le rü yü lomvu zun, a-le shaja pe tsü ni tizun.

⁵Npugü le zo, “Assiria! Ale a-gen anyunta kebin nyu genyu Assiria pe me kevü thün hontse-o shaja pe anyugun tsüti.

⁶Sunggigü sha kemvu nyu, a thyü pe anyunta kela senye when nrün genyu Ale Assiria nishü. Ale anyugun no me hon seülo, rühulo lo tsonda nyu kerhu hontseo temidan kedüla nrün genyu nishü.”

⁷Ai Assiria nyu raja gü le a-npvü rhikelo teda gwamvu sa kethyü le bin. A-le senye kechon nkela nrün genyu rüchünlo laso.

⁸A-le hihontseo ketekho hünyo, “Ahensin kebin keda aphu raja nyule!

⁹Ale Hamath lo Arpad hvu nyida Kalno lo Karkhemesh nkhenlo. Ale Samaria lo Damaska au ko lolo.

¹⁰Teromen kezü Jerusalem lo Samaria ki kebin nyeki thamen kezü chon kvu rüshvu kehü Kedaphen dan shaja pe tsüo nkela titse ndolo laso.

¹¹Ale Samaria lo tsünyu teromenkezü dan aphu nkelaso, lo tsühontse Jerusalem teromen dan lo tsüdan rüshvu kehüdan tsüe nke lati.”

¹²Ai Npugü le zohü, “Ale Zion kazüthun gen lo Jerusalem nyu thyü kebin thodan penlo yatselo; Assiria raja gü le kemakin kehü shaja pe a-tsülati.”

¹³Assiria raja gü le a-mhunthyüo, “Ale anpvü hi aphu thyü lo. Ale nko, thasha lo kelikelu sa. Ale senyedan jonyu terhi dan khilao anyugun kenya kequen kenjüdan seülo. Methutse hontseo tsünyu keyhun nyu kedüla.

¹⁴Kazü senyedan le tegü seü nme hontsela; lo nnesatse a-zü jünkelo hontseo ale anyugun kenya kequenlo. Nme-e a-sekin kekhün pe aketsun shwimvu; nmvue a-münkvu pe atsin mvu,” tson hünyo.

¹⁵Ai Npugü le zo, “Nrile a-npunyu nyeki gon letse zolo gwa ole! Senkerüzhe le a-sen-o tha rükehü nyu nyeki gwakvu ole? Thün le temi penso hümvu; ai temi le thün gü penso hünyo.”

¹⁶Kekvutsin Npugü le keho nipe ntsoka ketegvü kehünyu nthyü nnyüti. Anyugun min gen mah le ro lo roniti.

¹⁷Sunggigü, Israel nyu kebengü le mah nme thyü lati. Israel nyu Sunggigü kenshüngü le mah kenyü nme thyü lati, tson-o khenyüme jon thyü tha aphu rolati, nhentsehüe sin.

¹⁸Kesi keho le temi nme zen gunkeryü hontse chün lo lowbu aphu nkeshü lati.

¹⁹Senbin keshanyu nti nrholao ntsenyu no swülo kegwa thyülati.

²⁰Gwenkho nme le ryüjü, tsünyü Israel nyu yhukelo a-sen dan tsüle anyugun nkekela senye tenyen-o yhun sinmvu lati. Anyugun le Npugü, Israel Sunggigü kenshüngü rüshvu ketsin thyü tinlati.

²¹Israel nyu temi kerho le anyugun kekvu Sunggigü ki nigun ryüti.

²²Ntsoka Israel nyu le züda hachon hontse bin yatse ai kerhokhi nti le rani ryüti. Kenke kenmhü le temi dan genyu kequen bin, lo tsüpe tsüdan temi tsüzüsa.

²³Ele, kekvutsin Npugü le zokenjü hontse kenkekenmhü pe kazü tsü aphu gen shüti.

²⁴Aphu so kekvutsin Npugü le Zion nyu yhunkebin a-temidan ka zo hünyo, “Ijipt nyu le hagun gen thyükeshü hontse Assiria nyu le hagun nshwen binnyo, ai nshvu nya.

²⁵Gwenkho keshanyu ka ale shaja pe hagun tsükebin gü hi penlati, lo tsüsika ale anyugun nkelati tse binnyo.

²⁶Ale kekvutsin Npugü, Oreb Tsonye gü ki Medianyu Vükeshü hontse anyugun ko vüla ti. Ale shaja pe Ijipt nyu ketsü hontse Assiria nyu tsüti.

²⁷Tsü gwünkho le keryü nyü ale Assiria nyu kekvu nyu hagun shwü shü lati, tson-o anyugun gunda kekhen gü tsüno hagun khvu thyü nsu niloho.”

²⁸Kenrhinyu rihü le Ai nyidagü lolo laso! Anyugun le Migron pfüthü laso! Anyugun ketyüketsü pe Mikhmash ka khelaso!

²⁹Anyugun le tson gü tsü pfüthü lao kheje me Geba nyu nsen! Ramma rünyi nyu le anyugun kershvula, lo Gibeah, Raja Saul rünyi Gibeah nyu keyhun nyu le tinlaso.

³⁰Sen shülo, Gallim nyudan! Nyülo, Laishah temidan! Kenishülo, Anathoth temidan!

³¹Madmenah lo Gebin temidan le kesi nshvuo tin binso.

³²Nthu n kenrhinyu le Nob rünyi nyu bin, anyugun jenthün thyüpe Zion kazüthun lo Jerusalem hi binnyo.

³³Senbin gen a-ro gwen kela hontse Kekvutsin Npugü le anyugun boshwen kethyü senryüti. Anyugun dannyu ketekho lo a-rüchün tetsosa kehü nyu süshelao no kejo pvüla ti.

³⁴Nri lope chün keda nyu senbin nmvue Lebanon sen kegwatsindan phenkela hontse Npugü le anyugun boshe lati!