Read Southern Rengma Naga ISAYA 11 Bible Online

ISAYA 11 - Southern Rengma Naga bible

ISAYA 11

¹David raja tsipwe le senbin phen kela hontse la, ai a-tun gen a-ro keshün senni chwiryüla kehü hontse, David tsipwen gen raja keshün nme le nisoryü lati.

²Npugü Kapu gü le kensü thakesha lo kekakepe pe a-tsüo a-no a-temi ketsenti. A-le Npugü kendo sha lo a-rühvu,

³lo a-jokezen nyu a-kenyü hyuti. A-le a-sokehyu nmvue mejo nyükelo nti sen-o me jünkera loho;

⁴a-le rhokedyü nyu jünkera nshünti lo keche kendinyu kenjü zoti. A-jo hokeshü nyu temidan le shaja hyuloti, lo gwakemvu nyu le silati.

⁵A-le kemitsin nyu joketsin sen-o a-temi ketsenti.

⁶Teken lo tanyü le kengü gwao binti, Mren le tenyü nyu zen kengü jüti, Methunyu lo shünyo nyu le kengüo a-chvü süti, lo ntsenyu le tsüdan nuchati.

⁷Methu lo thyügwen le kerhün-o a-chvü süti, lo a-nyudan le kengü jüti. Shünyho le methu hontse npen tyüti.

⁸Nyuhonnyu le peri tseyi zü kerhu khoka kecho-e anyugun ndu loho.

⁹Sunggigü rincho kenshün Zion gen, me kenyükemvu kethyü lo gwakemvu thame-e no bin mvu lati. Zü le züda sükebin hontse kazü tsügü nyu Npugü thakesha no sülati.

¹⁰Gwenkho nme le ryüjü, tsünyü David raja kami nyu nme le soryüo senye tsügü genyu zensü nme thyüti. Anyugun le a-keda nyida nyu kequenlo-o kerühvu pe a-tsüti.

¹¹Jon tsügü le keryü ka Npugü le gwengwa a-kekvu sen ni-o a-temi zenni ryü lati-tsüdan le, Assiria lo Ijipt, Pathros, Sudan, Elam, Babilonia, lo Hamath, Züda khoki zükenhon kazü nyu kebin dan.

¹²Npugü le a-temi Israel lo Judanyu le kazü quenzi aphu nyu nrenru tinkela dan zenni ryüo kequen bin laso tse kethyü zensü phikeden pe senye aphu hishüti.

¹³Israel kedaphen le Juda gen a-yhüthyü nilo hoso, lo Juda le Israel kenrhinyu thyümvu lati.

¹⁴Au kerhün lo-o nkhünzin Filistia nyu when lo nphozin kebin nyu kenya seü loti. Au le Edom lo Moab lolati lo Ammon le a-jo zentinlati.

¹⁵Npugü le Suez züda mün no sinla, lo tsangkenbu kenyen zenryüo Eufrates whün nsin lati, tson-o rinyu keshen tsenyü nti no bin lao temi aphu no pfüthülo kegwa thyülati.

¹⁶Israel bonnyu le Ijipt nyu chwikela ka hontse Npugü le a-temi Israel, Assiria nyu yhun kebin nyu genyu tson keda nme khinshe shüla ti.