Read Southern Rengma Naga ISAYA 13 Bible Online

ISAYA 13 - Southern Rengma Naga bible

ISAYA 13

¹Jo higü hile Babilon rüla Amoz nyugü Isaya le Sunggigü ka hyukelo.

²Tehen kendi rincho sun gen teri phikeden penso shü! Tson-o shüpahü dan ka sen shü lo anyugun no ketekho-o nyida gü chwida when nrün genyu nben penso pe tha zansü thyüshü.

³Npugü le shwi pe a-nyuntakehü nyu zen-o kenshün teri thyülo shaja pe tsü titseo a-le tenyen ngwa lo ketekho kehü shüpahü koshwilo laso.

⁴Kazüthun gen temi danda, senyedan lo kedaphendan le kequen kebin khwen, nyüshülo. Rihüdan Npugü le terithyü nrün genyu shüpahü ndo bin laso.

⁵Tsüdan le nithen ki kazü keniki bin-o ryüjü. Npugü le a-nyunkenta pvüo kazü tsügü a-pentha nkela titse ryüjü nyo.

⁶Npugü jon tsüle kho nnilaso, kenjün kethyünyu nrao chü lo! Kekvutsin gü Npugü le kenke senryüjü.

⁷Temi aphu ben le a-kenko ndilao pechelo mvu lati.

⁸anyugun kershvu la lo tenunyu le nyu kezen ka kenjünthyü kehü hontseo kenjün kethyü le anyugun so kvulo lati. Anyugun kenshvu pvüo khinyunyu nri ti, lo kejo lati.

⁹Npugü jon le ryüjü-tsüle jon gwakemvu, Npugü nyunkenthün kenrin jon. Kazü hino tehen ngwala lo kemu aphu nkelati.

¹⁰Shyepvü shyenyü le benshü mvu lati, yhüko le chwiryüe zün, lo shye le keben khishü mvu lati.

¹¹Npugü le zohünyo, “Ale kenke senryü-o kazü nyu gwakemvu nyu aphu a-kemu genyu shaja pe tsüti. Ale ketekhonyu thyü tsonyo lo kemakin-o a-rigwa kemvu nyu aphu shaja pe tsüti.

¹²yhunkelo nyu le suna nyeki hyutho lati.

¹³Ale Kekvutsin Npugü, A nyunkenta pe hikeshü nyü tsang lo kazü le nnu lati.

¹⁴“Temi kechale ryüo Babilon nyu yhun kebin dan le thyüjen le thyü kehünyu mhundyü tin kehü lo tanyü a-kekhwen kendi hontse tin kezen-o a-kazü ki gü bu lati.

¹⁵Tenkelonyu lihigüe jenshvu lati.

¹⁶Anyugun rhokedyü thyü nri ketseka, nyunhonyu dan kedüshvu la, anyugun kanyü jünlola, lo a-nyugun nunyu sü lati.”

¹⁷Npugü le zo, “Ale Babilon when nrün genyu Medesnyu thukeyhun bin. Tsüdan le rükagi lonyümvu nmvue suna pe anyugun jvülo kemvui.

¹⁸Anyugun tholevü sen-o selo ju shweshvu ti. Anyugun le nyuhonnyu ntsenyue njün loho.

¹⁹Babilon tsüle Rajaphen aphu dan nyu kezegwa tsin; a-temi le tsü pe a-nyugun mhu thyühü nyo. Ai Ale Npugü, Ale Sodom lo Gomorrah gen thyü keshü hontse Babilon nke lati.

²⁰Temi nme-e no tsünyu yhunni loho. Arab nyu kenjwen nyu ko tsünyu then thyü mvuso, lo tanyü kekhwenyu nme a-tanyü zen-o tsünyu a-chvülo tyü mvuso.

²¹Tsüle kazü kesi ki yhun kehü nyukhu bin lo khinsu seü kethyü bin thyülati. Ostrich le tsünyu hüti, Thyünyun le tsünyu a-shwagwenti.

²²Chwida lo raja ka nyu teken lo mesukurun le khun pe süti. Babilon gwünkho güle ryülaso! Jon tsügü le kethünlo hoso.”