Read Southern Rengma Naga ISAYA 14 Bible Online

ISAYA 14 - Southern Rengma Naga bible

ISAYA 14

¹Npugü le gwüngwa a-temi, Israel nyu dan shwi njün nishü lo anyugun kejüpe a-hon thyüloti. A-le anyugun no anyugun kazü nyu yhun niloti, lo senye kechae anyugun zen-o yhunti.

²Senye kechon le Israel kecheo Npugü le anyugun ketsü kazügü nyu niryülo ti, lo senye tsünyu kebin dan le Israel go thyüo anyugun lothyüti. Gwüngwa Israel lo kelonyu dan Israel le a nyugun lonila, lo Israel temi le gwüngwa anyugun nshwen kehüdan so gonti.

³Npugü le Israel nyu no kenjünthyü lo hokeli kethyü, lo mele anyugun kemvu thyüo kenjün thyü sa kela nyu rüyü loti.

⁴Npugü le hithyü keshü ka anyugun le Babilon nyu raja shwi nyüo hihontse zoti: “A-rigwa kemvu raja gü le che laso! A-le temi nme-e nshwen nilo hoso!

⁵Npugü le raja gwakemvu gü kekvu no ndilaso

⁶anyugun le me kazü lokela senyedan gen nyuntao tsüdan nshwen lo nchün ndyü kehü dan.

⁷Ntsoka we kazü apentha bwen rüyüo shekerhün genyu lüthyü bin laso.

⁸Lebanon nyu Sipress lo Sedar bin dan le raja gü le che kela genyu anyugun kenyüsa, kechamvule a-le ndi kela siki nme-e a-nyugun phen kemvui so!

⁹“Kesinyu kazü le Babilon raja nsinlo nrün genyu ndo bin so. Kazünyu kekvunyu kapu dan le nyhun nhibin. Rajanyu kapu le anyugun rajakhün gen sokü bin laso.

¹⁰Anyugun aphu a-ka, ‘Nle ntsoka we agun hontse kvumvu laso! Nle agun keme laso!

¹¹Mele harp sen-o lüthyü nrühvu, ai ntsoka we nle kesinyu kazünyu binlaso! Nshün pe njüthyü lo ntsepe nkehenphithyü.’

¹²“Babilon nyu Raja, Lonyü shyepvü gü, nle tsangge che tsüryüla sele! Gükela ka nle senyendan so kvulo hü ai nshwen pe kazü nyu shülaso.

¹³Nle tsanggen kügü nrajakhün no shyenyü ketetso tsin dan soki thyüti tse rüchün hü. Nle teronyule kequen kehü kazüthun tsügü gen raja nyu nme hontse dun titse hüle.

¹⁴Nle nmha raki küo Kekvutsin gü hontse titse zo.

¹⁵Ai tsühontse kelogü mvuo nkhisen tsüryüo ketsenyotsin gü kesinyu kazü ki shüla so.

¹⁶“Kesigü le a-dunthyüo nnriti. Anyugun le hihontse ketso soti, ‘Higü hile kazü sükenun-o rajaphen dan no nshvu bin kehü gü tsü mvu ole?

¹⁷Temi higü le nyida dan nkela lo kazü gü no sin kela gü mvu ole? Higü le donyu hoshü mvu nmvue anyugun no kanyu gun nyümvu kehü gü tsü mvu ole?’

¹⁸Kazü rajanyu aphu sika kezegwa nyu bin,

¹⁹ai nwe nsika ndio nsimin lope kedukeru thyü shwenlao tenla. Teri nyu gakela shüpahü dan simin kerhün-o pe tsokü nyu keshü ka a-simin keminla, lo kedüla.

²⁰Nle n-npvü nkazü nkelao ntemi boshvu kela genyu, nno raja kechadan hontse sun loho. Nkami gwakemvu nyu nme-e no yhunbin loho.

²¹Me dushvukehügü no so gwenlo! Anyugun nme-e no kazü sogon nmvue anyugun nyida no kazü süni mvuso.”

²²Kekvutsin Npugü le zohü, “Ale Babilon when-o tsü nkela ti. Ale thame kheloho, ntsenyue nme no rhün loho. Ale Npugü, Ale zo laso.

²³Ale Babilon kelupe dyü thyülati, tson-o khinsu no tsünyu binti. Ale tha aphu shokenshünla kehü kashovü lope Babilon sholati. Ale Kekvutsin Npugü, Ale zo laso.”

²⁴Kekvutsin Npugü le keswe nme thyü njünyo, “Ale rhilo kela tsü thyüti. Ale nyuthyü titse rüchün loyo tsüthyü lati.

²⁵Ale akazü Israel nyu tsü Assiria nyu nkela ti, lo a kazüthun gen anyugun kedü lati. Ale Assiria nyu gunda kekhen nyu lo anyugun khvu kensu pvü kehü nyu atemi hoshü lati.

²⁶Hile Ale kazü genyu rhilo kela, lo ale aben keto-o shaja pe senyedan tsü ti.”

²⁷Npugü kekvutsin gü le hihontse titse bin; a-le shaja pe me tsü nrün genyu a-ben shwenlo laso, lo temi nme-e a-khin loho.

²⁸Jo higü hile Raja Ahaz le sikela chen zo shü.

²⁹Filistia nyu, nvü kehü tegithün gü bosela, ai n sherhün lo nrün ndi. Peri nme le sila lo gwamvu kvu kethyü kecha le tsü sunka ryülahü. Peri nme le bün-o kenye kehü peri kalo hünyo.

³⁰Npugü le a-temi rhokedyü nyu khwenlolao anyugun no bwenloti. Ai Filistianyu, a-le chenda kenrin nipe hagun gen shüti, lo hagun nme-e no rhünbin loho.

³¹Chüo keche hilo, Filistian nyida aphu! Nshvusa lo, hagun aphu! Kenphu le khelukesü thyü tesozin n nsheryü jü nyo tsüle peche sa kethyü rihü dan me.

³²Filistia ki gun keryü lilonyu ka dihontse zoshü mon? Agun le anyugun ka zo nrün güle Npugü le Zion pensoshü lo a-temi kenjün thyü kehü nyu no tsünyu kerüyü hyu loti.