Read Southern Rengma Naga ISAYA 16 Bible Online

ISAYA 16 - Southern Rengma Naga bible

ISAYA 16

¹Tehen yhun kemvu kazü ki kebin Sela nyida nyu Moab nyu le tanyünyu nme jwen nipe Jerusalem ki keda thyü kebingü ki shü.

²Anyugun le Arnon Züri seki tegü le a-seü nyu hüshwi keshü hontse rhokedyü thyü nsin nshebin.

³Anyugun le Judanyu ka zo-o “Agun no nyu thyütiyo zoshü lo. Nhennyu tsangkenyün ka senbin shye kekun hontse agun ntsenlo-o agun no nsun nyu rüyü lota. Agun le teri kenshvu nyu tinkela nyule; agun sunlo-o meno agun hyu nyata.

⁴Agun no nkazü nyu binta. Agun nkela titse kebin nyu ben nyu agun ntsen shüta.” (Kenshwen lo kenke le a-kenithyüla, lo senye higü nkekehü nyu le kazü tsügü nyu ndilati.

⁵Tsüsika David tsipwen nmele raja thyüti, lo a-le kemitsin lo keso sen-o temi ketsenti. A-le kenjügü tsü thyü nmhenti, lo joketsingü tsü thyüti tse binti.)

⁶Judanyu le zo, “Moab nyu le hihontse ketekho hüyo agun le nyülo laso. Anyugun le kemakin lo anyugun rüchün ngwa hü tsekethyü agun le shabin, ai anyugun ketekho tsüle kenrun.”

⁷Moab nyu le anyugun kenjünkethyü genyu chüti. Anyugun aphu Kir Heres nyida nyu ketyüketsü kegwa senkehü tsü rüchün lolo chüti. Anyugun shese ritsin lati.

⁸Heshbon khoka chwidan lo Sibmah nyu vain low dan nkelaso. Tsüdan zu le tsipwen sharhi dan thyü nzeüla. Gwengwa ka we vain bindan le minkethen sen-o nithen ki Jazer nyida lo nphozin kazü kesi keti, lo nkhünzin kesi zida pere ti.

⁹Tsügenyu ale Jazer chechü kethyü hontse Sibmah vain chechü. Heshbon lo Elealeh au genyu ayhüphu nrhi, kechamvule low gvüo temi no sherhünlo kegwa ndi.

¹⁰Temi nme-e kazü kegwa low dan tsü a-kenyülo mvu. Nme-e vain low nyu khwen shwi nmvue lü ron bin mvu. Vain zu thün nrün genyu temi nme-e a-sha kedü bin mvu, tson-o shekerhün khwe shwi kehü ndi laso.

¹¹Ale Moab lo Kir Heres hvu genyu nyun gwamvuo nyunkenjün thyüsala.

¹²Moab nyu le anyugun kazüthun kenshün dan gen külo kershvuka nyu kehi thyü tseo hokeli sa hünyo. Ai tsüle anyugun genyu thame kegwa thyüshü loho.

¹³Tsüle nchwen nyu Npugü le Moab rüla jo khikeshü.

¹⁴Lo ntsoka Npugü le zohü, “Chenshan gwünkho toka Moab kenya kechon tsüle hyumvu lati. A-temi kechon dannyu kerho nti rhün lo, lo tsü dan le kvumvu lati.”