Read Southern Rengma Naga ISAYA 17 Bible Online

ISAYA 17 - Southern Rengma Naga bible

ISAYA 17

¹Npugü le zo, “Damaska le nyida thyüsin bin loho; tsüno kenke kanyü kequen kenjü gwenzin lati.

²Siria nyida dan le kethonthen khelati. Tsüdan no tanyü lo senrudan chvü loketyübin thyüla, lo temi nme-e tsü hümvu lati.

³Israel le a-keno kendi thyüla, lo Damaska le a-kendo thyükelo nmhen lati. Siria temi rhünkelo nyu le Israel nyu hontse kejo pvü lati. Ale kekvutsin Npugü, ale zo laso.”

⁴Npugü le zo, “Israel nyu keda keni thyüla, lo kendi pe kenya sunthyüla nrün jon nmele ryüjü.

⁵Israel le low gvülo kela lowla hontsela, tsüle Rephaim ketejon nyu mele lowla khekela hontse lati.

⁶Temi kerho nti rhünloti, lo Israel le Oliv bin ra ki a-sha kenyhun-kenshan, nmvue ketsenyo ki a-sha kerho nti khe kenjü hontse lati. Ale Israel Npugü Sunggigü, ale tsü zo laso.”

⁷Jon tsügü le keryü ka temidan le ranio anyugun Nyhunkeshügü, Israel Sunggigü kenshüngü ki keche fü ryüti.

⁸Anyugun npvü kethyü kershvubin, nmvue anyugun ben lope kethyü terogi Asherah lo rünkegwa kerobin dan süjün mvula ti.

⁹Jon tsügü le keryü nyü, chwida kenko nyidadan khelao Hivnyu lo Amornyu le Israel nyu mhundyü tinkela ka nyidadan hontse nkelati.

¹⁰Israel, nle Sunggigü, tsonye kenko hontse nkenilo lo nnokelo gü nmhinlaso. Tsü sunka hagun le kazü kecha tero rüshvu nrün genyu senbin kenshün dan hunbin laso.

¹¹Lo hagun le tsü sen keshü lonyü yhun chwiryüo punbinla yatse-e a-sha we lülo mvu lati. Tsünyü nyun gwakemvu lo ponlo keho kenjün kethyü nti lati.

¹²Senye kekvudan le Züda lo Zükeda kentyü khwen hontseo nho bin.

¹³Senye dan le zü kentyü kekvu hontse gü bin, ai Sunggigü le rhoshülo anyugun le tesenla, rincho ki kemphü lo tsangkenbu züro nyu npenkon hontse whün sentinlati.

¹⁴Seyi gü anyugun le kenrin thyü, ai lonyügü we ndila hü. Tsühontse kehü tsüle ngun kazü kenya seülo kehüdan jvü so.