Read Southern Rengma Naga ISAYA 19 Bible Online

ISAYA 19 - Southern Rengma Naga bible

ISAYA 19

¹Hile Ijipt genyu jo khikeshü. Npugü le nmha gen bin-o n mhensa tse Ijipt ki ryüti. Tsüka Ijipt nyu teromen dan le a-mhundyü ka ndünla lo Ijipt temidan anyugun kepeche ndi lati.

²Npugü le zo, “Ale Ijipt kazü nyu teri hüsü shüti, lo tsasizen nyu no tsasizen nyu zen kega lo kajonnyu le kajon nyu kenrhiti. Nyida dan le nmeme nren lo rajadan le kekvu ketesuti.

³Ale Ijipt nyu le tedo rhi kebin thyü nkunla lo anyugun jvü rüla nke lati. Tson-o anyugun le teromen no anyugun cheshü lo tse hi, lo anyugun le kesinyu kapudan ki güo tsüdan ka tha shünti.

⁴Ale Ijipt nyu khipe anyugun ketsen nrün gwakemvu nyu lo raja gwakemvu nyu nme ben ka shülati, tson-o tsügü le anyugun so gonti. Ale Kekvutsin Npugü, tsü zolaso.”

⁵Nile züri nyu züle seüla, lo a-senshvu thyü sin lati.

⁶Tsü nyu zütson dan le a-rünnyi lati tsüdan le sin a-shvu thyü tsü kela ka. Lo nbatsebwen le rügü lati,

⁷lo Nile seka low shü kenjü dan le sin lao whün pe shwen lati.

⁸Tsehü ten-o a-gin chüntyü kehünyu hükhuvü lo jah dan le a-min ndilati, tson-o tsüdan le kenjün thyüo chüsoti.

⁹Linen phi dokehü nyu le anyugun shese lati;

¹⁰lo tefü phi kedo nyu lo a-ya kegwanyu le a-boshwen lao a-nyu tsemin lati.

¹¹Zoan nyida sharhidan le pinri! Ijipt nyu kentsen tsin nyu le kepho senkethyü jo khishü! Tsüdan le dihontse rajagü ka anyugun le nduka lesükeshanyu lo raja sunkethyünyu letse zo lola?

¹²Ijipt Raja gü, kelikeluo nsenthyü kehü nyu le dikipon binla? Kekvutsin Npugü le Ijipt genyu nyu rhinhüyo anyugun le nka zolo gwati ado.

¹³Zoan lo Memfi nyu sharhi nyu le pin. Anyugun le tsipwen dan tsontsin kezüi laryü tsüdan tsontsin zü laso.

¹⁴Npugü le tsüdan no kevükezü kethyü tsonketsin khishü lo tsela. Tsügenyu Ijipt le tha aphu thyüzü lo kezekego-o kenzeü nyu le a-nyugwenkeshü gen pekeshwekelo hontse binlaso.

¹⁵Ijipt nyu kebin kenyanyu nmvue kendinyu, kentsen nyu nmvue mizonyu nme-e me kechelo kemvuiso.

¹⁶Ijipt nyu le tenunyu hontse a-nyun shenla nrün gwünkho le ryüjünyo. Kekvutsin Npugü le shaja pe anyugun tsütitse a-ben pensokelo ka nshvuo ndün solati.

¹⁷Ijipt nyu le kekvutsin Npugü le Juda nyu genyu nda kebin rüchün kelo tsen nshvu ritsin lati.

¹⁸Gwenkho tsügü le keryü ka Ijipt nyu nyida sha pvün ka Ibri nyu khwen zotinlati. Lo tsüdan ka temi le Kekvutsin Npugü zan nyu keswe thyüti. Nyida nme zan pe, “Yhüko Nyida gü tse koti.”

¹⁹Gwenkho tsüle keryü ka Ijipt kazü nyu kershvubin thyüpe Npugü ketsü nmele binti, lo anyugun kazü rhika tso sen-o thyükenshün pe a-tsüti.

²⁰Lo tsühvu tsüle Ijipt kazü nyu Kekvutsin Npugü le kehü zansü thyüti. Mele tsünyu temidan nshwen-o anyugun le Npugü ka keche hi solo, a-le temi nipe anyugun kenishüti.

²¹Npugü le a-khipe Ijipt nyu hishülo, anyugun le shalo-o a-rüshvuti, lo kershvu tho dan lo tha hokeshü khisen-o a-kiryüti. Anyugun le keswen thyüpe Npugü kishüo anyugun le zokenjü tsü thyüti.

²²Npugü le shaja pe Ijipt nyu tsüti, ai a-le tsüdan thyüngwa lati. Anyugun le Npugü ki rani ryüti, lo a-le anyugun kehi nyüshüo thyü ngwa shüti.

²³Tsü gwünkho le keryü ka Ijipt lo Assiria hvu joka tsonda nme le kephe lati. Tsühvu temi dan le khinyunyu kefüti, lo au kengüo kershvu ti.

²⁴Tsü gwünkho le keryü ka Israel le Ijipt lo Assiria hvu zen-o ketunti, lo senye hidan hile kazü aphu genyu jochü thyüti.

²⁵Kekvutsin Npugü le jochü pe anyugun tsüo hihotse zoti, “Ale jochü pe hagun tsüti, atemi Ijipt; ale nyhun keshü Assiria; lo ale kejükelo atemi Israel.”