Read Southern Rengma Naga ISAYA 2 Bible Online

ISAYA 2 - Southern Rengma Naga bible

ISAYA 2

¹Jo higü hile Juda lo Jerusalem au genyu, Sunggigü le pe Amoz nyugü Isaya ketsü:

²Jonkenkhin ki kershvuka le kebin kazüthun gü tsüle aphu nyeki ketetsotsin thyüo, rinchodan aphu sun lati. Senye aphu tsünyu ryü lati.

³lo tsüdan temi le hihontse zoti, “Ngun Npugü rincho gen kütile, Israel Sunggigü kershvu ka nyu tsü. A-le ngun no thyünyü kehü gü pe ngun senthyü shüti; a-le kejükelo tsongü nyu gü ti. Kechamvule Npugü le senkethyü jo tsüle Jerusalem kipon gunryü; a-le Zion gen bin-o a-temi ka zohü.”

⁴A-le senye kechon dan nyu kevükeben thodan kera penshüti. Tson-o anyugun jenthon dan pe dyü cha lati, lo anyugun nyi lope tehenketsevü cha lati. Senyedan le thame kae teri nyu nigü loho, nmvüe teri genyu ndo nron mvüso.

⁵Tsügenyu Jakob nyenyu dan, ngun Npugü le keben khipe ketsü gü nyu tsonchü tilenu!

⁶O Sunggigü, nle ntemi, Jakob nyenyu dan khe laso! Kazü higü nyu nphozin gü Filistia keti jadu tho le sü laso. Temi dan le me kecha jvü zentin laso.

⁷Anyugun kazü le suna lo rükagi le sü, lo kenya le keni ndi. Keru le anyugun kazü sü, lo tsünyu teri kethyü gari-e a-keni ndi,

⁸Tsünyu thamekezü le sübin, lo anyugun ben pe zükelo rüshvu hü nyo.

⁹Temi aphu thyü tsenyolao kemeni ti. Anyugun kemu jüpe tsü nyalo, Npugü!

¹⁰Anyugun le Npugü nyunkekhü lo a-kekvu zoshwenzonye kethyü mhundyü tin titse rincho ki tsokü nmvüe kazü nyu thakü tso-o kebuti.

¹¹Temi dan kemakin kethyü ndilati--lo anyugun ketekho thyü kemhen lati. Tsonlao Npugü npvü thyü nso lati.

¹²Jon tsünyü Kekvutsin Npugü le kvukehünyu, ketekho kehünyu lo kenrunkenryü dan aphu thyü tsenyo lati.

¹³A-le Lebanon nyu Sedar sen ketetso dan lo Bashan kazü nyu teshobin aphu nke lati.

¹⁴A-le kazüthun lo rincho ketetsodan,

¹⁵tsokhwen ketetso lo chwida kenkodan aphu botejon lati.

¹⁶A-le zürun keda lo kezegwa tsingüe no zünyuki kemihen lati.

¹⁷Temi kemakin le a-keni thyü lati, lo anyugun ketekho nke lati. teromen kezü le ndishü lao tsü jonnyü Npugü nti thyü ngon lati.

¹⁹Npugü le kazü sü kenun titse keryü nyü, anyugun le Npugü nyunkekhü lo a-kekvu zoshwen zonye kethyü mhundyü tin titse rincho ki tsokü nmvüe kazü tso-o tsünyu kebuti.

²⁰Tsüjon le keryü nyü anyugun le suna lo rükagi, lo anyugun npvü kethyü rakagi lope thamen kezü khepe nyu lo sanphon dan tsü lati.

²¹Npugü le kazü sükenun titse keryü ka temi dan le a-nyun kekhü lo kekvu zoshwe zonye kethyü mhundyü tin titse rincho gen tsokü nyu kebuti.

²²Terenla nrün temi tenyen sinnya. Tsüdan kegwa nyu le bin nla?