Read Southern Rengma Naga ISAYA 21 Bible Online

ISAYA 21 - Southern Rengma Naga bible

ISAYA 21

¹Higü hile Babilon nyu genyu jolo. Tsangkenbu züroi thyü sen-o kazü kesi shosen tinla kehü hontse kenke kemhü le kenrin kethyü kazü kipon ryüti.

²Ale tsemiki tha gwünkho gwakemvu nme hyulaso, tsü le tha kecha kela lo kenkekemhü tsemi nme. Elam rihüdan, whenlo! Media rihü, nyida dan hunlo! Sunggigü le Babilon kenjün kethyü pe me tsükehügü no keni thyülati.

³Ale tsemin nyu kehyu lo kenyü gü genyu nshvu lo a-mi-e thyü pe tenunyu le nyukezen ka kenjün kethyü hontsela.

⁴Ape-e da lo nshvu pe ndün laso. Ale Seyigü nnyü hü, ai tsüle kenrin senryüo atsü laso.

⁵Tsemin ki tsü keho nme ndalo; lo tesin no bin nrün genyu phi pe la njü. Lo tsüdan le tyütsü kebin ka, ahza nmele, “Kedanyu dan! Hagun gida ndolo che!” tson zo gunryü.

⁶Tsüselo Npugü le aka zo, “Güo rikhun nme pe shülo, tson-o a-no a-kehyu dan pe tesha shüye.

⁷Keru, gada lo Ut gen mihvu hvu le dun-o ryükejü hyu yatselo a-no pen kegwa thyülota.”

⁸Tsüka rikhun güle hihontse zoshü, “Kedagü, ale nhennyu lo kheje-e abin nyu bin-o rikhun ryü binle.”

⁹Tsontsin mihvu hvu keru gen dun-o hiki ryü laso. Rikhun gü jolo khikeshü le, “Babilon le chelaso! Anyugun le rüshvu kehü teromen aphu che tsügü jonkhara laso.”

¹⁰Atemi Israel nyu, thoshye hontse hagun kedüshwenla, ai ale kekvutsin Npugü, Israel Sunggigü ka jolokegwa nyü kelo pe hagun ka zoshü binnyo.

¹¹Hile Edom genyu jolo nme. Mele Edom kipon aka zokethyü le, “Rikhun gü, khejegwen tsüle dicheka ndila mon? Dicheka ndi whüla tiyo aka zoshüta.”

¹²Ale a-ka, “Lonyügü le ryüjü, ai khejegwen le niryü lati. Nle shün ni nyülo niryüo shün lota.”

¹³Higü hile Arabia genyu jolo le. Dedan nyudan, ntemi le n tsü nbon sen-o Arabia kazü kesin nyu nsenti.

¹⁴Tema nyudan, terio nki keryü nyu züpe lashülo, lo chvü lope mele hükeshü nyu tsüshülo.

¹⁵Tsüdan le jenthon pe anyugun dushvu titse, tholevü pe shwen titse kebin kenshvu aphu nrhila titse tin ryüjünyo.

¹⁶Tsüsika Npugü le aka zo, “Chen nme gwünkho toka tsü Kedar tsipwen kekvu le a-keni thyü lati.

¹⁷Kedar temi kepeche tsin dan tsüle levü kepennyu, ai kerho ki nti no binla ti. Ale Israel Sunggigü, tsü zolaso.”