Read Southern Rengma Naga ISAYA 22 Bible Online

ISAYA 22 - Southern Rengma Naga bible

ISAYA 22

¹Higü hile tsemin hyu kehü ketejon kazü gü genyu jolo. Nyu thyü binla? Nyugenyu nyida gü nyu temidan le kaso gen shekerhün thyü binla?

²Nyida aphu nyu nrao shekerhün khwen le swü binnyo. Ntemi teri hinyu sikela nyu le me zen kegao simvu.

³Hagun sharhinyu aphu tinlao tholevü nme-e kvulo kemvu ka mele anyugun khinlola.

⁴Ano anpvü atemi sikela nyu chechüsa lota. Anyun thyü nben nrün ndonyalo.

⁵Hile tsemin hyulo kehü kazü ketejon nyu kenjün kethyü, kvulo kemvu lo kevükeben kethyü jon laso, lo hile Kekvutsin Npugü le nipe ngun gen shülaso. Chwida jonren kethyü lo chüo keche hikethyü khwen le rincho ki-e nyü bin laso.

⁶Elam nyu kazü nyu shüpahü nyu le tholevü tsi shüsen lo keru gen bin-o ryü. Lo Kir kazü ki shüpahü le anyugun gida pfüo ndo nronlo.

⁷Juda kazü kegwa ketejon nyu tsü kerugari lo shüpahü dan le keru gen bin-o Jerusalem khinrun mhundyü nyu sobin.

⁸Juda chwida aphu borenla. Tsonkela ka, hagun le gü kanyu terikanyü dan senchwiryü.

⁹Hagun le Jerusalem chwida kehun dika thyü ketsela mvulo shvu bin yo hyulo. Lo Jerusalem nyu ka aphu nrio chwida thyüni nrün genyu ka peha rho-o tso dan pe chwida khwen. Zü kequen nrün genyu,

¹¹hagun nyida gü lvü nyu züka nme thyüo züpun when gü nyu tsuntsü keryü kequen. Ai hagun le nchwen ki nyu tsühontse kethyü tsü ndo bin-o thyü keshügü Sunggigü we rüchün mvula.

¹²Tsü gwünkho ka Aphuso Kekvutsin Npugü Sunggigü le hagun no hagun pe thu ndolao thula phi benlo tse kohü.

¹³Ai hagun le nyü lo shekerhün thyüo hotinla. Hagun le tanyü lo senru dan boshvu tyü, lo zu tsü tse tinla. Hagun le zo, “Ngun tyü lo tsülo tile! Senduki we sila ti laryü.”

¹⁴Aphu so Kekvutsin Npugü le a kazo, “Tha gwakemvu higü hiwe anyugun rhünthen-e jü pe tsüloho le. Ale Aphu so kekvu Npugü, ale zo laso.”

¹⁵Kekvutsin Npugü le ano raja ka kentsengü, Shebna ki güo a-ka hihontse zolo tse shü,

¹⁶“Nle segü letse rüchün hü ola? Nle rincho kipon tsonye gen nmisun kü runlo kegwa nkenjü nyu le binla?

¹⁷Nle temi kentsen nyu thyü binlo gwa, ai Npugü le nkhitho pe shwen lati.

¹⁸A-le bol khikelo hontse nkhilo-o pe tsipwen gonkvu kethyü dan nyu shwenshü lati. Nle rüchün-o nsü thyükehü kerugari dan khoka silati. Tson-o n-npugü kami le ngenyu kejo pfü lati.

¹⁹Npugü le nbin nyu nhülao ngwen kegwa nyu nthyü tsenyo lati.”

²⁰Npugü le Shebna kazo, “Tsügü tsüthyü kethyü ka, ale Hilkiah nyu agogü Eliakim nishüti.

²¹Lo ale nkeda mirün lo senkephin lope a-npvü la, lo nle kekvu senkehü aphu pe a-tsülati. A-no Jerusalem lo Judanyu kebin nyu pvü nme hontse lati.

²²Ale David tsipwen raja gü hensin nyu kekvu aphu pe a-tsü lati. A-le kedabin nyu chabi sen loti; tson-o a-le khinshe lalo nme-e khinlo keho, lo a-le khinlalo nme-e khinshelo keho thyü lati.

²³Dyütun henkela hontse a-no a-bin nyu tsekho tin lati, lo a-genyu a-kami apentha no kerühvu hyulo hüti.

²⁴“Ai a-shvunye lo a-tesun-o kehünyu le a-khvu kensu thyü lati. Tsüdan le la lo thakhin pe thakehü bin gen hükehü hontse a-nsüo bintinlati.

²⁵Tson solo thape a-hü nsü kenjü gü tsüle nqwü lao che lati. Tson-o tha le tsügen hü kebin nyu genyu keni thyü lati,” Npugü le zo laso.