Read Southern Rengma Naga ISAYA 23 Bible Online

ISAYA 23 - Southern Rengma Naga bible

ISAYA 23

¹Hile Tur genyu jolo Nyunkenjü thyüo chülo, züda nyu zürun kejen nyu! Hagun kesunbin Tur le nke laso: Tsünyu ka dan, lo Zürun kensenphen aphu nke laso. N zürun dan le Siprus nyu rani keryü ka, nle jolo tsü shalo.

²Chechülo, Sidon nyu hathyü kehü nyu! Nle temi nishüo

³Ijipt nyu shye hyukelo sen-o jwen lo hei lo tsipwen aphu zen-o hathyü titse hünyo.

⁴Sidon nyidagü, nle keja pfü laso! Zida lo züda le nkenilao hihontse zohünyo, “Ale nyu nme-e ndi. Ale anyu tenunyu nmvue pechenyu leyi soryü mvu le.”

⁵Ijipt nyu le Tur nkela sele tse kethyü shakelo ka a-kerüo shese lati.

⁶Nyunkenjün thyüo chülo, Foenikea nyu dan! Tsü nrhio Spain ki gülo!

⁷Hile nduka nyu thyükela shekerhün nyidagü Tur tsü ole? Higü hile me nipe züda perezin shüo rünyi thyü kehü nyidagü tsü ole?

⁸Segü le raja nyidagü Tur, a-temi hakethyü nyu le kazü nyu kerühvu tsin thyükehü higü ge hihontsela nrün rhishü ola?

⁹Kekvutsin Npugü le rhishü. A-le temidan anyugun thogenyu ketekho kehü no kenithyüla, lo anyugun dannyu rühvu lo keküdan thyüketsenyo la nrün genyu tsü rhishü.

¹⁰O Spain nyu kebindan, gü low tsülo! N-ntsen nrün nme-e ndi sele.

¹¹Npugü le a-ben keto pe züda gen shüo kedaphen nkela sele. A-le Foenikeanyu hada bin dan nkela lotse johoshü laso.

¹²Sidon nyidagü, nshekerhün le a-keni thyü laso, tson-o ntemi le meno nshwen laso. Anyugun le Kupa ki tsüla yatse-e, tsünyue rüyü loho.

¹³(Nyukhu no Tur kedü kela tsüle Assiria kemvu, ai Babilon nyule, Babilon nyu le kvuo Tur chwida kehun dan-e borenla, tson-o nyidagü nkela.)

¹⁴Nyunkenjün thyüo chülo, züda nyu zürun kejen nyu! Nle a-gen nngüo yhun kehü nyidagü le nkelaso.

¹⁵Chen hentsenyü, raja nme keyhun kho mele Tur shamvula nrün gwünkho le ryüjü. Chen tsüdan le gülalo, Tur le keyüla chunketyü nyu le lüron kehü hontse lati:

¹⁶Harp khilo-o rünyi rhigülo, mele khe kemenikela keyülagi! Temidan no niryü nrün genyu lükhin vüo nlü thyü nilo.

¹⁷Chen hentsenyü penkela siki Npugü le Tur no himhundyüki hontse hathyü niti, lo a-le kazü nyu kedaphen aphu no a-zen kehalo niti.

¹⁸A-le hathyüo pisa chünkelo dan thyükenshün pe Npugü tsülati. A-le tsü kequen kemvui, ai Npugü rüshvu kehü nyu le pisa tsü sen-o anyugun ketyüketsü lo phinya hei ti.