Read Southern Rengma Naga ISAYA 24 Bible Online

ISAYA 24 - Southern Rengma Naga bible

ISAYA 24

¹Npugü le kazü gü nkelao nme no a-nyu yhun mvu lati. A-le kazü higü penkekhün lao temi dan hü kezen lati.

²Temi aphu nyungwa kemvu nme teno ti-peshükedanyu lo temidan, npunyu lo donyu, kejwen nyu lo kehei nyu, tepukeshü nyu lo tepukelonyu, kenyanyu lo kendinyu.

³Kazü gü le kara lo nkeshü lati. Npugü le zolaso lo tsüle thyü lati.

⁴Kazü le sinla lo rügulahü; kazü apentha kvumvu lahü; kazü lo tsang le renlahü.

⁵Temidan le Sunggigü jvü gwenrho lo a-le kethonthen genyu temi zen-o kejozen kenjü then mvu kela genyu kazü gü nrhu laso.

⁶Tsügenyu Sunggigü le kazü swetsü laso. Temi dan le anyugun tha thyü keshü hontse tho binlaso. Kerhün nyu le rhoketsintsin binlaso.

⁷Vain bin dan le rügula, tson-o zu le ndi binlaso, a-kenyü kehü nyu le ntsoka we nyun gwamvu binlaso,

⁸lo anyugun harp lo bin pe shekerhün lü thyü mvulaso.

⁹Vain zu genyu shekerhün lü thyüsin mvulaso; nme-e tsü tsü ketegvü mvu laso.

¹⁰Nyidagü nyu tha aphu kevü keben lao temi dan le kenshvu pfüo kakhin pfü bin laso.

¹¹Zu ndi kela genyu temidan le tsonda nyu nrasen bin. Shekerhün le kethonthen ndi la; tsüle kazügü nyu khishwi laso.

¹²Nyidagü le nkela lo akhinrun-e borenlaso.

¹³Hile kazü aphu nyu senye dan gen thyü ti. Tsüle oliv sha aphu lüküla, lo vain sha kenkhintsin lülo kela hontse ti.

¹⁴Rhünkelo nyule sherh'un-o lüthyüti. Yhükokechwi ki kebin nyule Npugü le ditsüki gonyo pe meka zoti,

¹⁵lo yhükokeche ki nyu le a-shwenti. Züda seka kebin nyu le Npugü Israel nyu Sunggigü shwenti.

¹⁶Kazü nithenki kebin nyule kemitsin tsipwen Israel keshwen lüthyü kebin ngun le nyüloti. Ai agenyu we kenrin thame ndi! Ale nkebin laso! Agun jwentyü titse kebinyu le sunmvu lo anyugun tho gwakemvu le shvu ketsintsin solaso.

¹⁷Akhwen nyü shülo, temi aphu! Tekhwün, chwa lo kenshvu nti le hagun khwen binlaso.

¹⁸Ligü higüe kenshvu nrhi titse kehünyu le tekhwün nyu chela, lo tekhwün nkenla nyü kebin nyue chwa nyu minlati. Tsangri pe ketetsin thyüo kazü güle nnu lati.

¹⁹Tson-o kazü le nnu sola, kala, lo nrhenlati.

²⁰Kazü le kenzeü nyu hontse kezekego lo tsangkenbu terhi le whünkenu kehü hontse soti. Kazü kemu le a-sü she binso; tsüle chelao nisolo hoso.

²¹Npugü le tsangge lo kazü nyu kekvu kesen nyu dan shaja pe tsü nrün gwünkho le ryüjü so.

²²Donyu le tekhwün nyu kebin hontse Sunggigü le raja nyu khokequen shüti. Lo shaja pe anyugun ketsü gwünkho le ryü kemvuthen doka nyu anyugun khinlati.

²³Shye le zünla, lo yhüko le ben mvu lati, kekvutsin Npugü le raja thyüla nrün genyu. A-le Jerusalem nyu Zion kazüthun gen bin-o kekvu senti, lo temi dan nyu sharhi nyu le a-zenkechwi hyuti.