Read Southern Rengma Naga ISAYA 25 Bible Online

ISAYA 25 - Southern Rengma Naga bible

ISAYA 25

¹O Npugü, nle a Sunggigü le; Ale n rühvu lo nzan shwentile. Nle nduntho dan thyü shülo; Nle nduka rhikenjü tsü joketsin nyu thyü shü laso.

²Nle nyida dan nkela lo tsüdan chwida kenko dan-e borenla. Agun shwikerüchün nyu le raja bin thyükeshüdan tsü le kethonthen ndilaso.

³Tsipwen kenkodan le nshwenti; tsipwen rigwa kemvu nyida danle n-nshvu ti.

⁴Rhodyü lo keche kendinyu le tin-o nki rüla tson-o kenjünkethyü gwünkho nyu rüyü lo binso. Nle tsangkenbu terhi nyu anyugun kesun pe tsüshü lo tsangkethyü nyu anyugun sunshü laso. Rigwakemvu nyu le tsangsüki terhi hontse me whenhü,

⁵kazü kesinki tsangri kemvu gwünkho hontse. Ai Npugü, nle agun shwikerüchün nyu no matse laso; nle rigwakemvunyu kenra khin laso, nmha le tsangkenyen gwen nkun keshü hontse.

⁶Zion kazüthun gen Kekvutsin Npugü le tsipwen aphu genyu keho ndoti- tsüle ketyüketsü kenyatsin lo vain zu kegwatsin.

⁷Hinyu A-le tsipwen aphu soki nyun gwakemvu nmha le kebin dan tsü khi whütse lati.

⁸Aphu so kekvu Npugü le kethonthen kesi nke lati! A-le a-temi dan yhüphu shonlati lo anyugun le kazü aphu nyu kemenikela tsü khilati. Npugü le a-npvü zoshü laso!

⁹Higü thyükeshü ka temi aphu, “A-le ngun Sunggigü! Ngun le a-tenyen hü laryü a-le ngun keni shüla sele. A-le Npugü le! Ngun le a-tenyen hü, lo a-le ngun kenilo kela genyu ntsoka we ngun sherhün lo kenyülo laso,” tse zoti.

¹⁰Npugü le Zion kazüthun ntsenlolati, ai Moab nyu we npen kon pe methu vü nyu kedü kela hontse lati.

¹¹Anyugun le zü vü gü kejü hontse anyugun ben keto soti, ai Sunggigü le anyugun kemenila lo thame thyülo mvulao anyugun ben süshelo lati.

¹²A-le Moab chwida ketetsodan tsü boren sen tsügü kemphü nyu shülati.