Read Southern Rengma Naga ISAYA 26 Bible Online

ISAYA 26 - Southern Rengma Naga bible

ISAYA 26

¹Gwenkho nme le ryüjü, tsünyü Juda kazü nyu temi dan le lü higü ronti: Ngun nyidagü le nko! Sunggigü le a-npvü kenikelo khipe nyidagü chwida thyü binnyo!

²Nyidagü khinrun khinshe shü lo joketsin kesen tsipwen, kenjütho thyü kehü tsipwen no yülo.

³Npugü, nle nyunkebwen ketsingü khipe nrüchün tsekho lo a-ketenyen khipe ngen shükehü nyu tsülo.

⁴Kethonthen Npugü tenyen hülo; a-le a-zintse ngun keno thyü hüti.

⁵A-le ketekho kehünyu thyü tsenyola; anyugun le yhunkehü nyida kenko gü tsüe nkela, lo a-chwida boren pe kemphü nyu shüla.

⁶Mela nshwenkela dan le ntsoka we tsü so tsonchü lo anyugun pha no tsü kedü binso.

⁷Npugü, nle temi kegwanyu tson thyü nshwüla; anyugun kenjwentson le tejonlaso.

⁸Agun le nkendo then lo nnrin hü; agun le nnyü kehügü tsüle nlele.

⁹Kheje gwen anyun aphu pe nnyüho hü nle: nle kazü lo tsünyu temidan jün kera, anyugun aphu joketsingü tsüle nyuyo shaloti.

¹⁰Nle temi serikemvu nyu njün hüe anyugun le kenjügü tsü thyüsha lomvu. Kemitsin nyu kazü hinyue anyugun le njükemvu thyühü; anyugun le nkeda shalo nyü mvu.

¹¹Nkenrhi nyu le nle shaja pe anyugun tsü nrün shalomvu Npugü, anyugun no kenjün thyüo kejo pfüla ta; anyugun no nle ndo kenjü shaja khvu gütsü pfüo kenjün thyüta. Nle ditsüki ntemi sohüyo pe anyugun tesha shülo.

¹²Npugü, nle agun no gwakenye loti; agun le thyükelo aphu nle thyükeshü thosile.

¹³Npugü agun Sunggigü, kechanyu le agun so gon ryü, ai nnti le agun Npugü le.

¹⁴Ntsoka we anyugun le sila lo yhunni kemvui so; anyugun kapue soloho, kechamvule nle shaja pe tsüdan tsülao anyugun nkelaso. Temi nme-e anyugun rüchün sinmvu laso.

¹⁵O Npugü, nle agun tsipwen no chvü kenye, agun kazü lizin hizin aphu nyu terhi no gonkenye, tsügenyu n kerühvu le ryü laso.

¹⁶Npugü, nle shaja pe ntemi tsü, anyugun kenjün kethyü nyu nka hi.

¹⁷Npugü, nle agun no chü chwiryü, tsüle tenunyu le nyukezen ka kenjün kethyü nyu nra chwikeryü hontse.

¹⁸Agun le kenjünthyü pe ruketse thyü, ai thame thyülo mvula. Agun le agun kazü genyu thame ka kvulo mvu; agun le thame thyü lo mvula.

¹⁹Ai agun temi sikela nyu le rhünni loti! Anyugun min le kerhünnyu niryüti. Misun nyu jükebin nyu aphu tsonsoryüo shekerhün genyu lüthyüti. Khüzeü keche le kazü gwen nrhün kehü hontse, Npugü le nduka sikelanyu thyü nrhün shüti.

²⁰Atemi dan, hagun kanyu yülo-o kakhinlo lalo. Sunggigü nyunkekhü le güla kemvu ka gwünkho keshanyu kebu tselo.

²¹Npugü le kazü nyu kebin nyu kemu shaja pe tsü nrün genyu tsangge bin-o tsüryü jünyo. Kazü nyu kebuo me dukeshvu tho thyü kenjü dan pe ndo shüti, lo nnyon gü le mele dushvu kenjü dan pe kebula loho.