Read Southern Rengma Naga ISAYA 27 Bible Online

ISAYA 27 - Southern Rengma Naga bible

ISAYA 27

¹Tsünyü Npugü le kvusa lo dushvu kehü jenthon gü sen-o shaja pe Leviathan, kelikelu, kekhünkekho kehü dragon tsü, lo zida nyu kehü züringü nyu dushvu lati.

²Tsü jon nyü Npugü le vain low a-kenyü gü ka,

³“Ale tsü khwen lo zü pe nehü nyo. Meno tsü kecha lamvu titse lonyü kheje tsü rikhun hünyo.

⁴Ale vain lowgü ge anyunta mvula so. Tsehü lo nchara when nrün le bin yatselo ale tsüdan shoshün shvu lati.

⁵Ai atemi kenrhinyu le ano anyugun keno thyü nyü yatselo anyugun no azen-o gwatho lota. Anyugun no azen gwatho lata.”

⁶Kenkhin ki Israel nyu, Jakob tsipwen dan le senbin hontse a-mentsen lo sen-o pun soti. Anyugun le nshakeshü rasha le kazü kesü thyü lati.

⁷Npugü le shaja pe Israel kenrhinyu ketsü hontse pe anyugun tsü shwi mvuzun, nmvue anyugun temi le kesi kho-e simvu.

⁸Npugü le anyugun nipe kazü kechaki keshü tsü lope anyugun shaja thyükeshü gwenzin. A-le nphozin tsangkenbu gwakemvu no anyugun when sentinla.

⁹Ai Npugü Sunggigü shakemvu kershvubin tso dan boshwen pe chun tso hontse, lo Asherah terogi men nmvue tharün kegwa kershvubin no ndishü kela siki nyu Israel nyu kemu jüpe tsüti.

¹⁰Chwida khwen hun kenjü nyida gü nkela. Tehenyhun kemvu bin kenrun hontse khela. Tsüle senru no anyugun chvü lotyüo rüyülo kegwa bin nme thyülaso.

¹¹Senro dan gwen lao rügu la, lo duse laso, lo tenunyu le tsü lü zeü ti. Temidan le thame shalomvu kela genyu, Nyhunkeshügü Sunggigü le anyugun so lo shwikenjün pe tsüdan hei loho so.

¹²Tsünyü Npugü le Eufrates züri ka gungü Ijipt rhi keti tsü shye lo a-bün whün kecha thyüla kehü hontse a-temi dan nmeme tse kequenlo lati.

¹³Tsü jon le keryü ka shu khun shüo Israel nyu le Assiria ki kebin lo hüpe Ijipt shükela dan konilo lati. Anyugun le ryüo Jerusalem, a-rincho kenshün gen Npugü rüshvu tinlati.