Read Southern Rengma Naga ISAYA 28 Bible Online

ISAYA 28 - Southern Rengma Naga bible

ISAYA 28

¹Israel kedaphen gü we thyü loso! A-zankechwi le kenzeü sharhi dan pe gen nyekepun keda perün hontse rügu bin laso. Anyugun ketekho pe le a-rün tehi, ai anyugun le nzeü si binnyo.

²Npugü le temi nko lo kvusa kethyü no anyugun when nrün nme le bin. A-le tegwü keche, tsangrida, tsangkenbu terhi, zükeda hontse anyugun whenshe pe kazü nyu shü lati.

³Kenzeü sharhi tsüdan ketekho tsüpe kedü lati.

⁴Ketekho sharhidan zan kechwi tsüle kherosha nsha kerigü ka nyünlo ntsin lütyülo kela hontse ndilati.

⁵Jon nme le ryüjü, tsünyü kekvutsin Npugü le a-temi nrho kelo nyu genyu zankechwi nyekepun perün hontseti.

⁶A-le me jünkera kehünyu no joketsin senlo lo nyidagü khinrun nyu temi nokehü nyu no pechelo kegwa pe tsüti.

⁷Sidyükeshanyu lo peshükedanyue nzeüo kezekego laso. Anyugun le zu lo kenzeü tsü tsü rüche kela genyu kelukeru laso. Sidyükeshanyu le nzeüo Sunggigü le pe teshakeshü tsü shalo mvu laso, lo peshükedanyu le nzeü chonrilao kekevü jo sen-o anyugun ka keryü tsü penlo mvu laso.

⁸Anyugun le dunkebin mizdan tsüle nyungwen pe nrhu külao kenshün bin ndilaso.

⁹Anyugun le agen kenya hünyo. Anyugun le, “A-le segü senthyü hüle tse binla? Segü le a-jo sen mvulo shvula? Tsüle nyuhonnyu nkinlo güjü kelanyu genyu kegwa ntile!

¹⁰A-le lesü jvü nmeme, tson nmeme lo jokon nmeme tse pe ngun senthyü tiya kebinle.”

¹¹Hagun le akhwen nyü mvulo, Sunggigü le sinrünyi, khwen kecha kezonyu no jokon nme pe hagun senthyü ti.

¹²A-le kebwen lo ketegvü kethyü khipe hagun aphu tsü, ai hagun le a-khwen nyü nyü mvu laso.

¹³Tsügenyu Npugü le lesü jvü nmeme, tson nmeme lo jokon nmeme pe hagun senthyü titse bin laso. Tson-o hagun kenkvu nmeme aphu pha nsüti. Hagun le jün, sen nyu minla lo do thyü tinlati.

¹⁴Jerusalem nyu temi hidan so kekvu senkehü, hagun kemakin kehü nyu, Npugü khwen nyüshülo.

¹⁵Hagun le kesi zen-o gwatho lo, lo kesi kazügü zen-o kejopenkelo genyu ketekho hünyo. Hagun le kenjün kethyü gü tsüle keryü ka hagun nrho shüti tse kethyü tenyen tsentsü binnyo, kechamvule hagun le kenku lo me kesa tenyen-o bin kehü genyu.

¹⁶Tsügenyu Kekvutsin Npugü le zo: “Ale kasin nnu kemvu nkosa kethyü nme pe Zion nyu shübin nyo. Tsü nyu tso kenko nme pe kachon npugü thyüo a-sogen jo hihontse thu njü, ‘Ketenyen tsekho kethyü tsüle nyhennhi hü nyo.’

¹⁷Ketsingü le a-binkezen kendo-ron thyü, lo kenjü le kendo-tso thyüti.” Tegwün le nle tenyen kehü kenku aphu sho sen tinla, lo zü keda le nkeno chün pfü tin lati.

¹⁸Nle kesi zen-o gwatho kenjü tsü rhola, lo kesikazüzen-o kengügwa kelo gü tsü khelati. Kenke gü tsü le ryü nso kvulo lati.

¹⁹Tsüle lonyütsen nvü nini shüti. Hagun le nhennyue kheje-e tsü pfü ti. Sunggigü kanyu jolo aphu kenshvu senryüti.

²⁰Thakesha jonyu thu kenjü hontse nle thyühüphi keshen ben-o no kezü gen jüo n phae keto loshvu kethyü temigü hontseti.

²¹Npugü le a-le rüchün kebin gü thyüshü nrün genyu Perazim kazüthun lo Gibeon ketejon nyu ndunkethyü teri thyükeshü hontseti. A-le a-tho ndunkethyü gü thyüpenti.

²²Ale nno petsülo lotse senryü kebin gühi shwinyü nyalo! Nle tson yatse kethyü we hi nyeki-e tsen kvuo nno nrhilo shvu lati. Kekvutsin Npugü le tsipwen tsü aphu nkela titse rhilo kela ale nyülo laso.

²³Ale zokebin gü nyülo; ale nka zokebin hi nyü petsü shü lo.

²⁴Lowketsünyu següe azintse ntsishü nrün genyu nti nnyon tso nbwen bin hümvu.

²⁵Gwengwa a-le ntsi shü nrün genyu thyü penla yatselo hentsihennyü nyejwirivü pe gwen shü hünyo. A-le thoshye lo barle ko pe shühü, lo a-tegwen ki tha kecha tsidan pe gwen hünyo.

²⁶Sunggigü le a-senthyü keshü genyu a-le a-tho thyü nrün do shahü.

²⁷A-le kanyü kensu pe nyejvürivü tsi vü hümvu; tsonkethyü gü mvule tsüdan vü nrün ndüto tse tesen kenshen sen hünyo.

²⁸A-le thoshye nyu shwela hümvu, lo tsükenyu gari-e sen-o tsü kedyüshwen mvulo kegwa do-e sha.

²⁹Kentsen hidan aphu Kekvutsin Npugü kipon ryü. Sunggigü le rhikehü do dan le tsentsü lo a-zintse gwalo hünyo.