Read Southern Rengma Naga ISAYA 29 Bible Online

ISAYA 29 - Southern Rengma Naga bible

ISAYA 29

¹Sunggigü kershvubin gü, Jerusalem le thyülo tiso! David le kensen bin nyidagü we thyülo tiso! Chen me lo chen hvu ka shekerhün keho dan no ryüo güla tse binlo;

²tson-o tsüsika Sunggigü le whütse kenkekemhü senryüo “Sunggigü kershvubin gü” tse kokehü gen shülati. Lo nyidagü apentha kershvubin hontse tezi no kesü thyülao nyun gwakemvu lo che kechü nti la ti.

³Sunggigü le nyidagü when-o hunlo lo ketselo lati.

⁴Tsüselo Jerusalem le kapu nmele kazü hensin bin-o jo zoloho lo kemphü nyu a-khwen nyü nrye kethyü hontseti.

⁵Jerusalem, n when kehü sinrünyi dan tsüle kemphü hontse whünpe shwenla, lo anyugun rihü kenrin kethyü tsüno npen hontse whün sen-o tinlati. Rüchünbin kemvu ka whütse,

⁶Kekvutsin Npugü le tsangkesen lo kazü kenu zenryüo hagun kenishwilolati. A-le tsangkenbu terhi lo mah ketetsin kethyü nishü;

⁷lo tsipwen dan rihü Sunggigü kershvubin gü when kehü terironye lo kanyü dan lo tha aphu kheje nyu nminki tha kehyu hontse ndila ti.

⁸Kequen sen-o Jerusalem when kehü senye aphu khün nnyon kebin nyu le a-min ki tyütsü bin-o nnyon soryükelo hontse, nmvue terio sigü kejü nyu le a-min ki zü tsü kebin nmin-e a-tero no sinkin tse soryü kelo hontseti.

⁹Pin lalo! Yhütyü po tin lalo! Zu sinmvuo nzeü tin lalo! Je gwae tsü mvuo kezekego binlo!

¹⁰Hagun no jüsa tinla nrün genyu Npugü le hagun no nnyü tinlaso. Sidyükeshanyu le a-temi yhütyü thyüzü, ai Npugü le anyugun yhütyü phinkhin laso.

¹¹Sidyü zan nyu tsemin ki kehyu jokon aphu pe hagun ketsunla; lo tsü no lesüswü mohor vü kenjü hontse lati. Hagun le tsü sen-o swükeshanyu ki güo swüpe hagun zen shülo tse güe tsüle mohor vü kela genyu a-le swülo mvu letse zo lati.

¹²Lo tsü sen-o swüsha kemvu nyu ki güo no swüpe hagun zenshülo tse-e, a-le shamvu letse lati.

¹³Npugü le zo, “Temi hidan hile arüshvu hü titse zohü, ai a nyugun jole a-kon ndi, anyugun nyun le kecha ki hünyo. Anyugun nyünyü le temi le then gunkeryü, anyugun le sha pfü kebin tsü a-me kecha mvu.

¹⁴Tsügenyu ale anyugun le rüchün bin kemvu tha pe anyugun gen shülo shünio anyugun no anyugun dunthyü ti. Kemitsin nyu no pinla, lo anyugun kensü no a-minkendi thyü lati.”

¹⁵Anyugun thakerhi khepe Npugü kebu titse kehünyu we thyülo tiso! Anyugun kerüchün lo anyugun tho mele hyulo kemvui letseo kekebu ki tha rhibin hünyo.

¹⁶Anyugun le tha aphu penkekhünla hünyo. Digü le gonkvu la, lakethyü gü le, kembe le la? Temi le thyükeshü kanyü le a-ka, “Nle athyüshü mvu le?” Nmvue tsügü le temi gü ka, “Nle nyu thyü binyo shamvu le,” tson zolo gwale?

¹⁷Tha rüla nme kezo le chünphin chünda gü tsü le temi le tsü tinla ti, lo mele tsükehü low tsüle chün thyülati tse hünyo.

¹⁸Tsühontse tsüjon le ryülo nyetin kergü nyu le lesü swü shwikeshü khwen nyülo, lo a-yhüpo-o kezen nyu kehü nyu le tha hyu tinlati.

¹⁹Rhodyü lo tsenyo kehü nyu le Npugü, Israel nyu kenshün Sunggigü le nyunkenyü khikeshü gü zen-o yhun niloti.

²⁰Tsüle temi nshwe lo Sunggigü nkhinpe me hi kehünyu genyu keni thyülati. Kemu nyu aphu nkelati.

²¹Sunggigü le me zo nshvu kehünyu, tejvü gwen kerhonyu shaja pe tsü mvula lo joketsin kezo nyu no a-kenyü hyulo mvu titseo nkula kehü nyu nkelati.

²²Tsügenyu kenjün kethyü nyu Abraham kenishwi keshü Npugü, Israel Sunggigü le zohünyo, “Atemi dan, hagun no kemeni sin mvuso, lo keja pfüo hagun mhu gwakemvu thyü bin mvuso.

²³Ale ntsenyu pe hagun tsüti tse kebin dan hyukelo ka Ale Israel nyu kenshün Sunggigü letse kethyü hagun le shaloti. Hagun le a rühvu lo a nshvu tin lati.

²⁴kephonyu le tha shalo, lo kenyakenyü kehünyu le meka tha shalo nyüho tinlati.”