Read Southern Rengma Naga ISAYA 3 Bible Online

ISAYA 3 - Southern Rengma Naga bible

ISAYA 3

¹Npugü, Kekvutsin Npugü le Jerusalem lo Juda nyu temi dan le tenyen ngwao yhun kehü kanyü aphu khila titse binlaso. Ale anyugun ketyüketsü lo züdan,

²anyugun kekvunyu lo shüpahü, sidyükeshanyu lo kerathünyu temvünyu lo kedanyu,

³Shüpahü kedanyu lo sharhinyu, tharhikeshanyu kebinnyu lo jadu thyüo me ketsen kehünyu sentinla titse bin laso.

⁴Npugü le pobwennyu no temidan ketsenlo lati.

⁵Temi dan le khinyunyu nshwenti. Selo le peshünyu rühvu mvu lo lihi kemvunyu le a-so kedanyu rühvu mvu lati.

⁶Kami nme le a-dan nyu temi nme kejülo-o a-ka, “Nwe nkeben phi le bin, tsügenyunle kevükeben gwünkho hinyu agun sharhi thyüta.” tse kezo gwünkho le ryüti.

⁷Ai a-le hihontse zo lati, “Ano nyata! Ale hagun chelo kemvui le. Ale ketyüketsü lo phinyae ndile. Tsügenyu alope hagun sharhi thyünya lo!”

⁸Ele, Jerusalem we thyülo tiso! Juda le che güjü laso! A nyugun jokezo lo anyugun tho a phu Npugü ntsun bin; anyugun le kebu mvuo Sunggigü kemeni bin laso.

⁹Anyugun kerüchün gwakemvu tsüle anyugun ntsunti. Anyugun le Sodom nyu hontse ndo-o kemu thyü bin laso. Anyugun we thyüloso; anyugun le tsü senryüo anyugun pe gen shü loso.

¹⁰Kemitsin nyu le sherhünti, lo anyugun tha aphu gwa gunti. Anyugun tho genyu anyugun kenyüti.

¹¹Ai gwakemvu kethyünyu we thyülo tiso; anyugun le me gen thyükeshü hontse anyugun gen thyüni shüti.

¹²Pisa pe tepu kehünyu le atemi nshwen hünyo, lo anyugun pu pfü kebin dan kema hünyo. Atemi ju, hagun sharhi dan le tsontsinzü hünyo, tsügenyu hagun tson shalo mvu lahü.

¹³Npugü le kenyo kethyü jo zoshü titse binla; lo a-le a-temi jo kera titse ndabinso.

¹⁴Npugü le a-temidan peshünyu lo sharhidan zen-o jokerabin nyu ryüjülaso. A-le kenkhinjo hihontse zohünyo: “Hagun le vain low kechala, lo hagun le kendinyu hon sekelo tsüle hagun ka sübinnyo.

¹⁵Hagun le atemidan le rhodyü letse anyugun nshwenlo kegwa kenjü ndi. Ale kekvutsin Npugü, ale zoshü laso.”

¹⁶Npugü le zo, “Jerusalem tenunyu ju le ditsü laki ketekho yo nrishülo! Anyugun hikon tetsosa tse hohü. A-zintse anyugun dyüngwa hünyo. Anyugun jvü thyü pe nyajü tse tsonchü, tson-o anyugun pha kekhin le tsintsin tse bin hü.

¹⁷Ai ale shaja pe anyugun tsüti, ale anyugun pe thulao anyugun pe no ndo lati.”

¹⁸Jon nme le ryüjü, tsünyü Npugü le Jerusalem tenunyu dan le sen-o ketekho sa kehü ronye anyugun pe ge, anyugun gunda, lo anyugun pha,

¹⁹lo anyugun bentson kekhin aphu sen tinla ti. Lo a-le anyugun mhun kesun,

²⁰anyugun perün, anyugun ben senka kanyü kezegwa den,

²¹benkhin, hikon ka keshü, bola,

²²mirun ketseyho, phi kezegwa dan, lo pisa khin dan,

²³mirün kerüpvü lo linen pe kedo mhunkeshon phi, anyugun pekesun phidan sen tin lati.

²⁴Tharünketehi sen nrün sunka anyugun le tenlati, senkephin kegwa sunka ron gwakemvu pe phinti; pehü kegwa sunka anyu pe le ndo lati; phi kegwa sunka phiren benti; anyugun kezegwa kelu pe keja kepvü thyü lati!

²⁵Nyidagü nyu pechenyu dan lo kenko tsin nyue teri nyu si lati.

²⁶Nyida günyu temi le nyun gwamvuo chechü ti, lo nyida güle nyeginyu nme le a-kenben nyu dunkebin hontse lati.