Read Southern Rengma Naga ISAYA 30 Bible Online

ISAYA 30 - Southern Rengma Naga bible

ISAYA 30

¹Npugü le zolaso: “Juda ketsen kehü nyu we thyülo tiso, kechamvule anyugun le a nren kehü genyu. Anyugun le ale rhi shükemvu then, lo akendo gü ntsun-o kejoshüo kemu thyü nini kehü genyu.

²Anyugun le aka shün mvuo Ijipt ki keche hi gü hünyo. Anyugun le Ijipt no anyugun ntsenlo nyüo a-rajagü gen anyugun ketenyen pe shü hünyo.

³Ai raja gü le anyugun keche loho, lo kenke le ryüo Ijipt le anyugun keche kehü tsü keni thyü lati.

⁴Anyugun jonkhinyu le gü Zoan lo Hanes, Ijipt nyida hvu tila yatse-e,

⁵Juda nyu le keche nrin-e hyulo hü kemvu tsipwen tenyen hükela genyu rünyun mvula ti.”

⁶Sunggigü jo higü hile tehen yhun kemvu kazü tesin kipon nyukhu dan genyu: “Jonkhinyu le njwen sen-o shünyho, peri tseyi kerhu lo nyekehü dragon le yhunkehü kazü nyu pfüthü gü. Anyugun le thame kae keche hyulo hü kemvu tsipwen gü tsü nrün jwen minketsen dan lope gada lo ut khvu thyü pfü gü.

⁷Ijipt le khishü kehü keche tsüle lihi kemvu. Tsügenyu ale a-zen thope, ‘Me nthyü nnyü lokeho Dragon’ ” tsela.

⁸Sunggigü le temi hidan le dihontse gwamvu yo tse kethyü shahü nrün genyu anyugun le nyuhontse kethyü yo tsüpe lesü ka thula lotse aka zo.

⁹Anyugun le a-zintse Sunggigü zen kenren, nku, lo Npugü senkethyü jo nyü nyü mvu hünyo.

¹⁰Anyugun le sidyükeshanyu no matse binlo tse zohünyo. Anyugun le tsüdan ka, “Kenjü rüla pe agun ka zonyalo tse hünyo. Agun le nyü kenyü gü pe agun ka zota. Ngun ketsin kemvu gü sentile.

¹¹Agun tsonda nyu tinla, agun tson khinnya. Agun le hagun Israel kenshün Sunggigü rüla nyü nyü mvu le,” tse hünyo.

¹²Ai Israel kenshün Sunggigü le hihontse zohünyo: “Hagun le ale hagun ka kezo gü khelao tejvü gwünkerho lo kenku gü tenyen hünyo.

¹³Hagun le thyüzü mvu. Hagun le kabon ketetso ge keko shvu le tsü kebin hontse, tsügenyu whütse nren lati.

¹⁴Hagun le nnyonla hontse kara lati, nrensa lao a-keka nme-e lope magi kenhon khülo nmvue zülvü ka zü thulo kegwae thyü mvula ti.”

¹⁵Kekvutsin Npugü, Israel nyu kenshün Sunggigü le temidan ka zohünyo, “Rani ryüo atenyen gwenzin tinlata. Tson yatselo hagun le nko lo bweloti.” Ai hagun le tson nyü mvu kehü le!

¹⁶Tsügü mvuo hagun le keru kemhe gen bin-o shwikerüchün nyu nrhilati tse ndo kehü le. Ketsin, hagun le tinla mvulo keshvu le bin! Hagun le hagun keru le nmhen ritsin letse hünyo, ai hagun hü kehü nyu we nmhen kvu!

¹⁷Kenrhi nyu shüpahü nme hyu shülo hagun ye nme le tinti, shüpahü min pvün ntie hagun aphu hüla gwa. Hagun phikeden sen nti pe rincho thun gen khekela nyeki hagun rihüdan le thame khenshü loho.

¹⁸Tson yatse-e Npugü le hagun njün shüti tse khwen binnyo. A-ketenye pe Npugü gen shü kehü nyu le yhen kegwa nyu kechamvule a-le a-zintse kenjügü thyü kehü genyu a-le hagun shwinjü shü ti tse ndobin nyo.

¹⁹Hagun Jerusalem nyu keyhun nyu le chüsin lohoso. Npugü le me njün hünyo. Lo a-le hagun le a-ka keche kehi khwen nyülo lo hagun kehi kenishüti.

²⁰Npugü le hagun no gwünkho kerü nyu güti, ai a-le hagun dannyu bin-o hagun senthyüti, tson-o hagun no a-füsin mvu lati.

²¹Hagun le tson gwenzü sen-o tejü nmvue tegwazin gülae hagun sizin thakhwen hihontse nyüloti, “Tson le hikipon le. Higü thenlo.”

²²Hagun le suna lo rakagi lope hagun teromen dan jeü sen hüti, ai tsüdan lope tha nshün kemvu kanyü nme hontse shwen-o hihontse zoti, “Ayhühyu ka bin nya!”

²³Hagun le thatsithanyü shü shülo Npugü le tsangkenri nishüo tsüno yhun-o low gvü sa loti, lo hagun senrue a-chvü kegwa hyu tyüti.

²⁴Methutse lo gada hagun low tsokehü dan le a-chvü kegwatsin tyüti.

²⁵Hagun kenrhinyu chwida lolo-o a-temi dan nkekela siki we kazüthun lo rincho lizin hizin züri le tsunti.

²⁶She le yhüko hontse benla, lo yhüko le a-le benkehü jün tsenyü kho ben-o jon tsenyü keben pe khenyüme thyükela hontse lati. Npugü le a-temi jün kela dan thyü ngwa lo phin keshü ka tha hidan aphu thyü shüti.

²⁷Npugü kekvu lo a-zankechwi kethyü le nithen kie bin-o hyulo gwalati. Mah lo mah kekhu le a-nyunkenta tsinshühü. A-le jozo lo a-jodan le mah hontse rohünyo.

²⁸Zükeda le tha aphu chünsen tinla kehü hontse a-le tsangkenbu nipe a-mhundyüka shühü. Tsüle tsipwen dan sho sengü kenke nyu shülao anyugun tedo gwakemvu dan no a-keni thyüla hünyo.

²⁹Ai hagun Sunggigü temidan we kheje gwen keho kenshün ka thyü kehü hontseo hagun kenyü lo lüthyüti. Hagun le khüli khun lüthyü sen-o Israel kenogü, Npugü kershvuka nyu gükejü nyu hontse hagun kenyüti.

³⁰Npugü le temi aphu no a-le terünkepfü khwen thyükeshü nyü, lo a-nyunkenta kekvue sha loti. Tsünyu mah kenyü khelvukesü, tegwün, lo tsangri ketetsin thyüti.

³¹Assiria nyu le Npugü khwen nyülo a-shaja kerü shakelo ka kerüshvu lati.

³²Npugü le anyugun vü nini kethyü hontse a-temi le bin vü lo harp pe lüthyü binti. Sunggigü le a-npvü Assiria nyu zen kenren ti.

³³Assiria nyu raja ro nrün genyu nduka bin nme nyu mah thyü phun pe bin njü. Tsüle ntsun lo nmhun sa, lo tesen pe khwen tetso sa njü. Npugü le mah kenyü züri hontse kethyü henshwi pe tsü roti.