Read Southern Rengma Naga ISAYA 31 Bible Online

ISAYA 31 - Southern Rengma Naga bible

ISAYA 31

¹Ijipt ki keche fü kehü nyu we thyülo tiso! Anyugun le Ijipt nyu rihü kekvu keru, terigari lo a-shüpahü tenyen hü. Ai anyugun le Npugü, Israel kenshün Sunggigü we tenyen mvu, nmvue a-ka anyugun keche-e hi mvu.

²A-le thyü kebin gü shahü! A-le kenke nishühü. A-le a-dodan sen-o gwakemvu nyu lo tsüdan nopen kehü dan shaja pe tsü lahü.

³Ijipt temi le teronyu kemvu, anyugun-e temi gwenzin. Anyugun kerudan tsüle temihon nyeki kecha thyü mvu. Npugü le nnu shülo tsipwen kenko dan boshwenla lo anyugun le cheshü kehü tsipwen kvu kemvu dan-e che lati. Kenyhun nren nke lati.

⁴Npugü le aka zo, “Tanyü kekhwenyu le nra lo sen bin yatse-e tsüle shünyho le nyukhu nkashvu kebin kerü pe tin loho; tsühontse tha nme-e Kekvutsin Npugü, ale Israel kazüthun ntsen sen kebin nyu aketsun lo nrün ndi.

⁵Tegü le anyu ntsen-o rikhun kebin hontse, Ale kekvutsin Npugü, ale Jerusalem ntsen lo noloti.”

⁶Npugü le zo, “Israel nyu dan, hagun le mupe antsun-nrenla. Ai ntsoka we rani aki ryülo!

⁷Hagun le hagun kemu ben sen-o suna lo rükagi pe teromen thyükelo dan pe shwenla nrün gwünkho le ryüjü.

⁸Teri nyu Assiria nyu nkelati, ai tsüle temi kekvu nyu loho. Assiria nyu le teri nyu tinti. Lo nche shen nyu lope tegonyu thyülati.

⁹Anyugun rajagü le nshvuri tsin-o tinla, lo kedanyu kerüshvu lao teri phikeden-e khe lati.” Npugü, Jerusalem nyu mele rüshvu lo kershvutho dan ro nrün genyu n nyü bin kehü gü le zoshü laso.