Read Southern Rengma Naga ISAYA 32 Bible Online

ISAYA 32 - Southern Rengma Naga bible

ISAYA 32

¹Jon nme le ryüjü, tsünyü, raja nme le kemitsin nyu kekvu sen, lo tsipwen dan sharhi dan le joketsin nyu temi ketsenti.

²Anyugun aphu tsangkenbu terhi nyu nokelo bin hontseti. Tsü dan le tehen yhun kemvu kazü nyu rinyu hontse, lo kazü kesinyu tsonye shye hontse ti.

³Anyugun yhütyü lo nyetin khinsheo temi dan rhokedyü hyu lo shalati.

⁴Tsüdan le nyhun nhi sin loho, ai tha shakekho lo thyünyü kebin gü shao zoti.

⁵Temi nme-e kephonyu lope rühvulo kekü letse nmvue a-kerüchün ntsen kemvu nyu lope joketsin kesen nyu letse rüchün hümvu.

⁶Kephonyu le kepho jozo lo gwakemvu thyü titse rüchün hünyo. A-le thyülo zokehü tsüle Npugü kenshwen tho, tsügenyu a-le thame pe khünkehünyu no tyümvu lo teri kehü nyue no tsühü mvu.

⁷Kepin nyu le gwamvu lo rigwakemvu, lo tha gwakemvu thyü hünyo; a-le nkuo kendinyu nkela titse rhi lo anyugun no kenjügü hyulo nrün-e khinla hünyo.

⁸Ai rühvulo kekü nyu le joketsin thothyü lo kenjügü thyüti tse rüchün tsekho hünyo.

⁹Hagun yhun rüyü lo nyunkenjünkethyü ndi kehü teminyu dan, ale jokebin hi nyülo.

¹⁰Ntsoka we hagun le ketegvü bin logwa, ai tekenki hi gwünkho ka vain sha kequenlo mvu kela genyu hagun shese lati.

¹¹Hagun le rüyü lo nyunkenjün kethyü ndi tse ryü binnyo, ai ntsoka we nshvuo ndü lo gwenlo! Hagun phi yhünlao phiren lope hagun senphinlo.

¹²Nyun kenjünthyüo hagun nyun jenlo, kechamvule vain low lo kazü kegwa dan tsüle nke laso,

¹³tsehü lo nchara le atemi kazü nyu yhunbinlaso. Shekerhün thyü kehü kadan lo temi le a-kenyüo yhunkehü nyidagü genyu chülo.

¹⁴Raja bin lo nyida binda güe kheshü lati. Ka lo chwida dan kethonthen nke lati. Tehen gada dan le tsünyu ho, lo tanyü dan le tsünyu a-chvü loti.

¹⁵Ai Sunggigü le gwengwa a-kapu nipe ngun gen shüti. Nke kela kazüdan le gwani lo-o low nyu shye kechon hyu loti.

¹⁶Kazü tsügü nyu lihikie kemitsin lo joketsin tho thyü loti.

¹⁷Kechamvule temi aphu kenjü gü thyüti, gwaketho lo nyun nkhi kemvu le kethonthen bin ti.

¹⁸Sunggigü temidan le nyun kenjün thyümvu, lo anyugun kanyue nshvu mvuo bwenye tse lo ti.

¹⁹(Ai tegwün le chün nyu che lo nyida gü jonren lati.)

²⁰Temi dan le zü lope keswü thyüo low tsü lo gada lo senru chvü genyu rhodyü mvu tseo dihontse sherhün tiyo.