Read Southern Rengma Naga ISAYA 33 Bible Online

ISAYA 33 - Southern Rengma Naga bible

ISAYA 33

¹Ngun kenrhinyu we thyülo tiso! Mele anyugun kenya seü, lo nkelaso. Ai anyugun le mehon seü lo nkela nrün gwünkho güle a-keni thyülati, tson-o anyugun npvü mehon keseü lo rigwa kemvu do nyu chelati.

²Npugü, agun shwi njün shülo! Agun le n-nrin hüla sele. Khenyütsen agun ntsen lo kenjünkethyü gwünkho nyu agun keni shüta.

³Nle agun genyu teri kethyü ka senyedan le teri kethyü khwen mhundyü tinla hünyo.

⁴Anyugun kanyü dan tsüle kedü lao mele seü sentin kela hontse lahü.

⁵Npugü le ditsüki gon yo! A-le tha aphu so kekvu sen hü. A-le joketsin kesen lo kemitsin pe Jerusalem süshü,

⁶lo tsekho kethyü khipe tsipwen gü tsüti. A-le a-zintse a-temidan ntsen lo kentsen lo thakesha pe a-temidan tsü hünyo. Anyugun kenya kedatsin le Npugü kerühvu.

⁷Kepeche nyu le keche hi bin laso. Gwaketho senryü titse ndo kehü jonkhinyu le chüsa bin laso.

⁸Tsonda nyu kenshvu bin sa lao nme-e tsünyu gü mvu laso. Gwaketho dan gwenrho la, lo kejoshü kenjü dan-e borho laso. Temi nme-e rühvulo mvu laso.

⁹Kazü le gwamvuo low tsü mvu laso. Lebanon chün le rügula, Sharon kazü kegwa gü tsüle kazü kesin hontsela, lo Bashan nyu lo Karmel thun kie jonyü le senbin gen nrhi binlaso.

¹⁰Npugü le senye dan kazo, “Ale tha thyü tiso. Ale dihontse kvuyo pe teshashü tisele.

¹¹Hagun le a-min kendi tedo rhi lo hagun tho aphu a-kenrunle. A kapu tsüle mah jontse hagun nkelati.

¹²Hagun le tsonye rope chun thyü, lo tsehü rope jobü thyükela hontse lati.

¹³A-khoka lo nithen kie temi aphu no ale thyükeshü rüla nyüo akekvu shalota.”

¹⁴Zion nyu kemu nyu le nshvuo ndün bin laso. Anyugun le zo, “Sunggigü le jokekera hile kethonthen robin kehü mah hontse. Ngun següle tsühontse kethyü mah nyu rhünlo gwatila?”

¹⁵Hagun le kenjügü zo lo thyühü yatselo rhünlo gwa. Hagun kekvu thyüo rhokedyü nyu sanya, lo jvüjwe lo nya. Hagun le me dushvu titse lo tha gwakemvu kethyü rhikehü nyu zen-o nme thyünya.

¹⁶Tson yatselo hagun nrho loti; hagun chwida kenko nyuki kebin hontseti. Hagun le ketyüketsü hyu loti.

¹⁷Gwengwa hagun le raja nme le gingvü kethyü nyu kazü lizin hizin kethen tsükebin so kekvu sen kebin hyu niloti.

¹⁸Hagun ka khajana lo kehü nyu lo kekebu ki hagun shwen kehü rünyi kecha nyu nshvu kehü dan tsüle tha rüla nme hontse gwenzin lati.

¹⁹Hagun le kemakin kehü rünyi kechanyu le hagun shakemvu khwen zokehü nyüsin mvula ti.

²⁰Ngun le nyünyü keho thyü kehü bin Zion nyidagü nri shüta. Jerusalem nrishülo! Yhun ketekhi kemvu bin nme thyüpe dihontsela tiyo! Tsüle züphika nnun hü kemvu a-ketun thola hü mvu lo a-kedüron-e tüla hü kemvu nme hontse lati.

²¹Npugü le a-zenkechwi pen gun hishüti. Ngun le züri lo rinyu kemhun khoka yhunti, ai kenrhinyu zürun le tsü dan so shwaloho.

²²Zürun tsüdan gen tinkehü dan tsüle thakon mvu; kenjwen tsü dan le kethen loho! Agun le agun kenrhinyu rihü kenya aphu tenlo lati, tson-o kenya le chonsa kela genyu phayhonyue a-jün hyu loti. Npugü le agun raja thyü; lo a-le a-gun so gon-o agun ntsen loti.

²⁴Agun kazü nyu yhun kebin nme keho kenyü genyu kenyo kenyü kethyü ndi lati, lo kemu aphu jü pe tsü lati.