Read Southern Rengma Naga ISAYA 34 Bible Online

ISAYA 34 - Southern Rengma Naga bible

ISAYA 34

¹Ryülo, senye aphu! Kequen lo-o nyülo. Kazü nyu yhunkehü aphu hiki ryüo nyülo.

²Npugü le senye aphu lo anyugun rihüdan aphu gen a-nyunta binle. A-le tsüdan nmulao no nkela lo tse shülaso.

³Anyugun simin dan lope sunla loha, ai no ten-o a-rün nyü binti; tson-o kazüthun dan le tezi no nyepe nhon lati.

⁴Yhüko, she lo shenyü le kape kemphü thyü lati. Tsang le kethusü hontse sükeryü la, lo shenyü dan le vain nmvue khero nyü kenrhi hontse lati.

⁵Npugü le tsanggen a-jenthon ketsülo laso, lo tsü pe a-le nmupe kenke nyu shükela gü Edom temi gen ryüti.

⁶Lo a-jenthon le tanyü lo tenyü dushvu pe kershvu tho kethyü ka hontse tsü dan zi lo keshvu le sü lati. Npugü le Bozra nyida nyu kershvu tho higü thyü shüti; a-le Edom kazü nyu temi kechon dukeshvu hi thyüshüti.

⁷Temi dan le teronyugu tse lo methutse bwe hontse che lati, tson-o kazü tsügü le tezi lo temi keshvu lo sülati.

⁸Higü hile Npugü le Zion kenrhinyu gen a-khün loshüo a-keni shwi keshü gwünkho.

⁹Edom nyu züri dan le tar ngwala, lo kazü le mahtso thyü lati. Kazü tsügü apentha tar hontse rolati.

¹⁰Tsüle khensin jongwen ro-o tsünyu kethonthen mah le khubin ti. Kazü tsügü le shenhe aphu nyu nkelao temi nme-e no tsünyu njwen gun mvu lati.

¹¹Khinsu lo tegvü dan no tsüpe anyugun bin thyülati. Npugü le tha nyhun shü kemvu ka hontse kazü tsügü no thame yhunlo mvu lati.

¹²Raja nme no kazü tsügü ntsen mvula, lo sharhi dan aphu ndila ti.

¹³Nyhen tsehü no raja bin lo chwida hunkebin rünyi dan aphu ka yhunla, tson-o mesükerun lo khinsu dan no tsünyu yhuntin lati.

¹⁴Tehen thyü dan le tsünyu nda, lo tetserenzü no khinyunyu koti. Tetsen renzü le tsünyu a-kerüyü bin fü ryüti.

¹⁵Khinsu le tsünyu a-seü thyü, nzü, lo anyukao lüyiti. Güda le tsünyu kequen loti.

¹⁶Npugü lesü nyu nyukhu le rhünkehü rüla nyu zo njüyo fügü shwita. Nyukhu hidan hi nme-e hyu mvula loha, lo nme a-nizin thyü kemvu ndi. Npugü le anyugun no tson hü lotse ahza khishü laso, a-le tsüdan kequen zen ryü lati.

¹⁷Kazü pe anyu gun kenjün shüo tsüdan jün pe tsü nrün güle Npugü. Tsüdan le kazü tsügü nyu shenhe aphu yhunti, lo tsüle kethonthen anyugun hon thyüti.