Read Southern Rengma Naga ISAYA 35 Bible Online

ISAYA 35 - Southern Rengma Naga bible

ISAYA 35

¹Tehen yhun kemvu kazü le a-kenyü, lo tehen yhun kemvu bin nyu nye le punti.

²Tehen yhun kemvu kazü le lüthyü, lo a-kenyüo senti; tsüle Lebanon kazüthun kezegwa hontseti, lo Karmel lo Sharon kazü kegwa hontseti. Temi aphu Npugü le gingvü kethyü, a-keda lo kekvu hyuti.

³Kekvu pe a-ben nyükela nyu lo a-kho rhun nkolo kemvu nyu tsü shülo.

⁴Shese kelanyu aphu ka zoshülo, “Pechelo! lo nshvu nya! Sunggigü le hagun kenishü titse ryüjü, lo shaja pe hagun kenrhinyu tsü titse ryüjünyo.”

⁵Yhükepo nyule tha hyulo, lo nyetin kerügü nyule nyülo lati.

⁶Phayhon nyule dathyüo nyhun, lo jozolo kemvu nyue a-sherhün-o senti. Rinyu zü le tehen yhun kemvu kazü ki-e tsun tsüti,

⁷hachon kenyen tsüle zi thyü la, lo kazü kesin nyu zü nthün pe sü lati. Mesükerun yhunkehü bin nyu tsü, nba tseben le yhun tin lati.

⁸Tsonda le tsünyu bin lati, tsü lope, “Kenshün Tsongü,” tse koti. Kemu nyu nme tsü nyu gü loho; lo kepho nyue tson tsünyu kehünyu tson tsinzü loho.

⁹Shünyho le tsünyu bin loho; lo nyukhu kenso-e tsünyu pfüthülo nrün ndi. Ai Npugü le kenishwilo kelanyu le tson tsügü nyu njwen hüti.

¹⁰Tsüdan le anyugun kenyüsao Jerusalem tilo, lüthyü lo shekerhün genyu senti. Anyugun le kethonthen sherhün ti, kethonthen nyun gwakemvu lo kenjün kethyü shamvu lati.