Read Southern Rengma Naga ISAYA 36 Bible Online

ISAYA 36 - Southern Rengma Naga bible

ISAYA 36

¹Hezekiah le Juda raja thyü kelo chen tseryü pezi ka, Assiria nyu raja Sennecherib le Juda nyida, chwida thyüsa kenjü dan when-o lolo la.

²Tsüselo a-le a-hensin kedagü no shüpahü kechon zenlo-o Lakhish nyu bin-o Jerusalem ki ryüo Raja Hezekiah no a-hensin ryüla nrün genyu zoshü lotse hukum hoshü. Kedagü le gungü zi tesogü ka zütson sükebin khoka phi kedonyu le bin kehü tsonda gü tsü nkhenlo la.

³Tsüka Juda nyu mishan le a-teno titse chwiryü: tsüdan le raja bingü ketsen kehü kedagü Hilkiah nyugü Eliakim; jokera bin nyu kethugü, Shebna; lo tha rüla kethu kentsen kedagü Asaf nyugü Joash.

⁴Assiria kedagü le anyugun ka rajagü le Raja Hezekiah le nyu rüchün-o a-nyun gon binyo tsekethyü shalo nyü bin le tse zoshü.

⁵A-le zoni-o “Jo le shüpahü do kegwa lo anyugun kekvu sun thyülo gwa letse rüchün hü ole? Hagun we segü le hagun cheo Assiria nyu zen kenrenlo gwa letse rüchün hü nla?

⁶Hagun le Ijipt no hagun che keshü nri hü nyo, ai nbathün sen-o tsonchü kehü hontse gwenzin, lo tsüle kope hagun ben tseü lagwa. Tsühontse Ijipt nyu rajagü le a-tenyen-o binkehü nyu gen tson shü hünyo.”

⁷Assiria nyu kedagü le zonio. “Nmvue hagun le Npugü hagun Sunggigü tenyen binle tse aka zo tila? Hezekiah le Juda lo Jerusalem temi dan no kershvubin nme ntika rüshvu lo tseo kershvubin dan nkela le.

⁸Ale rajagü zen nyu hagun ka tenge tse hünyo. Hagun le keru gen binlo kegwa min kechon binyatse lo ale ye kenyhun pe tsütile.

⁹Hagun le Assiria nyu kedanyu dan nyu keshentsin gü jon pen mvu, ai Ijipt no kerugari lo teri shüpahü nipe hagun ketsü nrin hü nyo.

¹⁰Hagun we ale Npugü keche sen mvuo nkazü when-o hagun nkela titse bin nle tse rüchün hüle? Npugü le ano tsü when-o nkela lotse aka zole.”

¹¹Tsüsika Eliakim, Shebna lo Joash dan le kedagü kazo, “Aramik nyu khwen ki agun nthonta. Agun le tsü shabin le, Ibrinyu khwen zonyata; chwida gen kebin aphu nyü bin laryü.”

¹²A-le zonio, “Hagun we rajagü le tha hi aphu pe hagun npvü ka zoshülo tse anishü letse rüchün binle? Nmvu, ale chwida gen dunkebindan, hagun hontseo anyugun vü tyü lo kenzun tsü nrün nyu aphu ka zo kebin le.”

¹³Tson njüo kedagü le so-o Ibrinyu khwenki sen-o zo, “Assiria nyu rajagü le hagun ka zokebin hi nyü shülo.

¹⁴A-le Hezekiah no hagun salanya lotse hagun zen shü binle. Hezekiah le hagun kenilo kemvui.

¹⁵A-no hagun ni tenge pe Npugü tenyen bin nyalo. Npugü le Assiria nyu rihüdan khinla, lo hagun nyida gü lolo mvulao hagun kenishü ti ado tse rüchün bin nya.

¹⁶Rajagü le hagun nipe kazü kecha hagun bin hontse vain low le bin-o a-züe hyulo kegwa lo tensü thyülo kegwa shye-e bin, tse kethyü kazü nyu shüla kemvu we.

¹⁸Hezekiah no hagun sa kelikelu pe Npugü le hagun kenishwishü titse kethyü rüchün binnyalo. Senye peha tero le Assiria nyu rajagü ben nyu anyugun kazü kenishü ole?

¹⁹Hamath lo Arpad hvu tero le ntsoka diki bin ola? Sefarvaim terodan le dikibin la? Anyugun peha le Samaria kenishü ole?

²⁰Dicheka tsipwen hidan tero le agun rajagü ben nyu anyugun kenishüla? Tsonlo nyu le hagun thyüpe Npugü le Jerusalem kenilo kegwa rüchünlo ola?”

²¹Ai temidan le raja Hezekiah le anyugun ka zokenjü hontse, jo nme-e zomvuo ma tsela.

²²Tson-o Eliakim, Shebna lo Joash dan le anyugun nyun kenjün thyüo anyugun phinya sürhen lao gü raja gü ka Assiria kedagü le kezo jo pe tesha shü.