Read Southern Rengma Naga ISAYA 37 Bible Online

ISAYA 37 - Southern Rengma Naga bible

ISAYA 37

¹Raja Hezekiah le anyugun ka jotsü nyülo ntsin a-nyun kenjün kethyü nyu a-phinya sürhen lao ronphi benlo njüo Npugü kershvuka ki güla.

²Lo a-le rajabin kentsen gü Eliakim jokekera kethugü Shebna lo peshükeda dan nipe sidyükeshagü, Amoz nyugü, Isaya kishü. Anyugun ko ronphi ben hü.

³A-le anyugun no jolo hi lope Isaya ka zolo tse khishü: “Nthu hile kenjün kethyü jon; agun le shaja hyulo-o keja pfü binlaso. Ngun le tenunyu le nyukezen gwünkho le keryü ka a-kekvu kendi hontse binle.

⁴Assiria raja gü le rhünkehü Sunggigü nshwen lotse a-shüpahü so kedagü ni shü laso. Npugü n-Sunggigü no kenshwen jo hidan nyülo-o shaja pe tsü hontse zokeshü nyu tsü nda. Lo tsühontse Sunggigü ka ngun temi nrhokelo nyu genyu ko hishülo.”

⁵Isaya le raja Hezekiah jo shalo njüo,

⁶higü nipe a-jo kenishü, “Npugü le nno Assiria nyu le a-le hagun kenilo kemvui letse kezo jo tsü nyüo nshvu nyalo tse zo hünyo.

⁷Npugü le rajagü no jobon nyülo-o a-kazü nyu nigü lati, lo Npugü le meno rajagü dushvula ti le.”

⁸Raja gü le Lakhish nken gungü Libna khoki nyida zen kega bin la sele tse Assiria kedanyu nme le nyülo, tsüselo a-le a-zen kenthon titse gü.

⁹Sudan raja, Tirhaka le Ijipt rihü zen-o Assiria nyu when titse ryükejü jolo le a-nyugun tila. Rajagü le tsü nyükelo ka lesü thupe Hezekiah,

¹⁰Juda rajagü kishüo a-ka, “Nle tenyen kehü Sunggigü le nle aben nyu che la kemvui letse nka zoshü binnyo, ai tsüno nsala nyalo.

¹¹Nle Assiria nyu raja gü le tsipwen ligü higüe nkela titse rhikelo nyu ka dihontse thyüshü hüyo nyüloso. Nwe le tinlo gwale tse rüchün bin ole?

¹²A pvübon nyu le Gozan, Haran lo Rezef nyida dan nkela, lo Telassar nyu yhunkehü Betheden temi dushvula lo anyugun teromen-e tsüdan kenilo mvule.

¹³Hamath, Arpda, Sefarvaim, Hena lo Ivva nyida rajadan le dikipon bin ola?”

¹⁴Raja Hezekiah le lilonyu ka thuketsü lesü gü khipe swü shü. Lo a-le kershvuka nyu yüo lesü gü hei pe Npugü mhundyü nyu shüo,

¹⁵kehi thyüso,

¹⁶“Kekvutsin Npugü, Israel Sunggigü, nyukhu sekin kepvü dan so nrajakhün gen dunkebin gü, n-npvü le Sunggigü, kazü aphu nyu kedaphen dan ketsen kehü güle. Nle kazü lo tsang-e thyüshüle.

¹⁷Ntsoka agun kehi nyü shü, lo nyule agun ka gunryü binla seyo nri shülo. Sennacherib le zope rhünkehü Sunggigü nshwen kebin khwen aphu nyü shüta.

¹⁸Npugü, Assiria nyu raja güle senye kechon nkelao anyugun kazü le yhun mvu kü laso tse kethyü agun aphu shabin laso,

¹⁹lo temi ben lope kethyü, tesen lo tso pe thame kezü, tero ketsin kemvu dan tsü ro laso.

²⁰Tsügenyu, Npugü agun Sunggigü, kazü nyu senye aphu no nntile Sunggigü letse shalo nrün genyu Assiria nyu ben ka agun kenishülo.”

²¹Tsüselo Isaya le jolo nipe raja Hezekiah tsüo n-kehi kenikeshü ka

²²Npugü le zo, “Sennacherib, Jerusalem le nsü mvuo n shwinyü bin nyo.

²³Nle segü kemenio shwinyü hü letse binla? Nle Israel kenshün Sunggigü, rühvu mvu laso.

²⁴Nle teri kethyü gari dan sen-o Lebanon kazüthun ketetso dan lolo letse n gonyu nishüo amhundyü ka ketekho hünyo. Nle Sedar bin kethontsin, Saipres senbin kegwatsin dan phenlo, lo a-chün kentsuntsin ki-e güla letseo ketekho hünyo.

²⁵Nle kazü kechaki zülvu tso lo tsünyu zü tsü, lo nshüpahü no Nile züri kedü nsin kela genyu ketekho hünyo.

²⁶“Ale nduka nyu tha hidan rhi njüo ntsoka thyübin tse kethyü nle nyülo mvu ole? Ale kekvu pe ntsüo nno nyidadan chwida boshwen-boren la.

²⁷Tsünyu keyhun nyu le kvumvu; anyugun le nshvu pe thame shamvu la. Anyugun le low nyu tehen nmvue ka gen jontsü le yhun kebin ka yhüko kechwi kipon tsangkenbu kenyün le when keshü hontsela.

²⁸“Ai nle dikipon gü lo nyuthyü hüyo ale nrüla aphu sha. Nle dihontse nnyunkhüo a ntsun yo ale sha.

²⁹Nle ketekho lo nnyun khü kethyü njo le ati laso, tsügenyu ale hükhuvü lope nhikon ka lo münkekhen pe nmün ka hü tseo nle gunkeryü tson nyu nsünilo lati.”

³⁰Tsüsika Isaya le raja Hezekiah kazo, “Tha thyü ryü nrün zensü le hihontseti: Nthunye lo tekenki hagun le tehen terasha penro dan tyü tseti, ai tsüsika we hagun npvü hagun thatsithanyü pe yishüo gvü loti, lo vain sen-o a-sha tyüti.

³¹Juda temi nrhokelonyu le senbin le a-me tsen ntsunsa yüo a-sha nshakelo hontse loti.

³²Jerusalem lo Zion kazüthun ki temi rhünkelo nyu le binti, kechamvule Kekvutsin Npugü le tsü no tsonlo titse rhilolaso.

³³“Npugü le Assiria raja genyu hihontse zoshü: ‘A-le nyida hinyu yüryü loho, nmvue tholevü tsi nme kvu pe tsü nyu shü loho. Shüpahü nyu nme-e gida pfüo nyida gü kho nni kemvui, lo tsü lo titse rikhun bin khwen pe nyida gü hun kemvuiso

³⁴A-le nyida higü nyu yüryü mvuo a-le keryü tson nyu rani tati. Ale Npugü, tsü zo laso.

³⁵Ale a npvü akerühvu genyu lo ale agogü David ka zokenjü gü genyu nyida higü nopen lo ntsenloti.’ ”

³⁶Npugü lilonyu nmele Assiria nyu kensenbin nyu yüo shüpahü 185,000 dushvula. Tsüsinyü lonyü nshwen anyugun aphu siküla!

³⁷Tsüselo Assiria nyu raja Sennacherib le rani-o Ninevi ki güla.

³⁸Khenyüme a-le a-tero Nisrok kershvuka nyu rüshvu kebin ka a-nyu Adrammelek lo Sharezer hvu le jenthon pe a-dushvulao Ararat kazü ki kebu güla. lo anyu kechagü Esarhaddon le a-sunka raja thyülola.