Read Southern Rengma Naga ISAYA 40 Bible Online

ISAYA 40 - Southern Rengma Naga bible

ISAYA 40

¹Ngun Sunggigü le zo, “A temidan nyun thyü nbwen shülo, anyugun nyun thyü nbwen shülo!

²Jerusalem temidan thyü kepeche shülo. Anyugun le kenjünthyü thon sala so lo ntsoka we anyugun kemu jüshüla sele tse zoshülo. Anyugun kemu aphu genyu ale shaja pe anyugun tsü pen laso.”

³Khwen nme le sen-o, “Tehen nyu Npugü tson ndo shülo! Tehen yhun kemvu kazü nyu Sunggigü genyu tson thyü kenshün lalo!

⁴Kazü ketejon aphu lvü; kazüthun aphu tso tejon lalo. Rinchodan le tejon lati, lo kazü kenthun kenkü dan thyü nshwü lati.

⁵Tson-o Npugü zankechwi pe hishü, lo temi aphu tsü hyuti. Npugü le higü zoshwi laso.”

⁶Khwen nmele sen-o “Jolo nme zoshülo!” tsezo. Ale tsügü ketso, “Ano nyu jolo zo mon?” “Temi aphu tehe hontse; Anyugun le nyekepun nye thon mvule.

⁷Npugü le tsangkenbu nipe when keshüka tehen le rügü lo nyekepun le rinla hünyo. Temidan keyhunle tehen nyeki yhunthon hü mvule.

⁸Ketsin, tehen le rügüla lo nyekepun le rinla hüle, ai Sunggigü jo gü we kethonthen bin hünyo.”

⁹Jerusalem, kazüthun ketetso gen küo jolo kegwa gü pe zo shülo! Sen-o zotetso shü, Zion; jolokegwa gü pe tesha shülo! Nshvu nyao zo sen shü. Juda rünyidan ka anyugun Sunggigü le ryüjüla sele tse zoshülo!

¹⁰Aphu so kekvu Npugü le kekvu sen-o gon titse, a-temi a-le kenishwikelo dan zen ryüjü.

¹¹A-le tanyü kekhwen nyu hontse a-hon nucha loti; a-le tanyü nyudan kho kequenlo-o tsüdan penloti; tson-o bwenye tse tsüdan tson tsinti.

¹²Peha le a-ha nyu züda ndolo gwale nmvue a-kü lope tsang ndolo gwa ole? Pehale kazü nyu nnyon aphu pe honpe nme ka shü nmvue kesükü ka kazüthun lo rincho dan kensu sülo gwa ole?

¹³Peha le Npugü tsontsin-o thathyü logwa ole? Segü le a-senthyü nmvue a-tsontsin lo gwa la?

¹⁴Npugü le thasha lo shakekholo nrün lo dihontse a-tha thyülo mvulo shvuyo shalo nrün genyu segü zen ka shün hü ola?

¹⁵Npugü mhundyü nyu we senye dan le thakon mvu, zü je gwa nyeki chon mvu; nithenki zükehun kazüdan tsü le kemphü hontse nshe.

¹⁶Lebanon chün nyu nyukhu dan aphu pe ngun Sunggigü kershvu thyülo kümvu, lo tsünyu senbin dan pe ro nrün genyu rhori.

¹⁷Senye dan le a-genyu thakon mvushü.

¹⁸Segü lope Sunggigü kendyü lomon? A-le nyu hontse yo hagun le zolo gwa ole?

¹⁹A-le thakeshanyu le teromen thyükeshü suna lope je lo rükagi pe a-bin thyükehü hontse mvu.

²⁰Suna lo rakagi hyulo kehonyu le renlo keho sen kejülo hü nyo. A-le a-ya kepvünyu fülo-o teromen chelalo keho thyülo hünyo.

²¹Hagun le sha mvu ole? Nduka nyu hagun ka zola mvu ole? Kazü güle dihontse binzenlo yo hagun le nyülo mvu ole?

²²Tsüle a-rajakhün gen dunkehü güle thyüshü, tsüle kazü lo tsang nyeki tetso; hinyu temi le shen pe ntyü hontse. A-le tsang sükhun pe phi hontse, a-nyu yhunlo kegwa phika nme hontse thyüshü.

²³A-le keda kekvunyu süshela lo anyugun no lihi kemvu thyüla hü.

²⁴A nyugun le tehen kebwe hontse senchwiryü nyeka a-men selvu. Npugü le tsangkenbu nishülo, sin lao npen hontse whün sentin lahü.

²⁵Segü lope kenshün Sunggigü kendyü lo tila? A-hontse kethyü peha le bin ole?

²⁶Nyiso gü tsangge nri shü! Nle hyukebin shyenyü dan tsüle segü le rhen shüla? A-le tsüdan lope rihüdan me hontse anyugun tson rihü, tsüdan le dikho yo a-le sha lo nmeme tse a-zen ko hünyo!

²⁷Israel, tsonlo hagun le nyu thyüo Npugü le hagun kenjün kethyü shamvu letse Nmvue njü kemvu nyu kenjün kethyü ka hagun shwi mvu letse kenya hü nla?

²⁸Hagun le sha mvu ole? Hagun le nyü mvü ole? Npugü le nthen teyhün nyu Sunggigü; a-le kazü aphu rhenshü le. A-le a-hokeli lo a-tson nzi la hümvu. Temi nme a-kerüchün shalo hümvu.

²⁹A-le kvukemvunyu lo a-hokeli kelanyu thyü nkvu shühü.

³⁰Temi le a-selo kae kvumvula hü; lo selo le kekvu ndila hünyo.

³¹Ai Npugü ki kekeche tenyen kehü nyu le a-thyü nko nikelo hyuloti. Anyugun le Logi hontse anyugun sekin pfüo nye so ti; anyugun le tin bin-e kvumvula loho; anyugun le tsonchü bin-e hokeli la loho.