Read Southern Rengma Naga ISAYA 41 Bible Online

ISAYA 41 - Southern Rengma Naga bible

ISAYA 41

¹Sunggigü le zo, “Nithenki kebin kazüdan, hagun matse bin-o akhwen nyülo! Hagun kera nrün jo sen-o jokera bin nyu ryü nrün gwendolo; hagun le jokezo gwünkho hyuloti. Ngun ryüo segü le njüyo penlati.

²“Npho ki kvukelo gü zen keryü gü tsü le segü la, lo a-no a-kegü bin aphu nyu kvu lola? Segü le raja lo senyedan so kvukelo pe a-tsü ola? A-le a-jenthon lope kenphü kedu hontse anyugun dushela. A-tholevü le tsüdan hükezen pe tsengkenbu le npe whün kethyü hontse lahü.

³A-le ketekhi mvutse me hü sen-o nmhen ritsin tse a phae kazü kesü mvu kesa tse gü!

⁴Tsü thyüpe tson keshü güle segü ola? Segü le temi tha rüla no tson titse rhilo la? Ale Npugü, binzen ka hü, lo Ale Npugü, keniketi ki-e hüti.

⁵“Kazü nithen ki kehü nyule ale thyükeshü thodan hyu; anyugun kershvulao nshvu pe ndünla. Tsügenyu anyugun aphu kequen-o ryü.

⁶Kechanyu le khinyunyu keche lo thyü pe chehü.

⁷Senkecha güle suna kecha güka, ‘Gwasala sele!’ tsezo. Teromen kezü jonkenshwü kehü güle Gojal pe yhenkensü kehü gü jo peche. Anyugun le zo-o, ‘Tegi nyun kensü kehüzü le gwa bin nyo.’ tsonshülo tsüdan le gojal pe teromen kezü yhen kensü lahü.

⁸“Ai agogü Israel, nwele ale kejülo kela gü, apvü gü Abraham tsipwen le.

⁹Ale kazü keniki nzen ryü; lo kazü gwen ketsin ki ale nkolo-o nkazü, ‘Nle agogü le.’ Ale nkeni lamvu, ai nkejülo.

¹⁰Tsügenyu nle nshvu nya, ale nzen hü! ale n Sunggigü, thame no nkedünla nya! Ale nthyü nko lo nche shüti; Ale nnolo-o nkeniloti.

¹¹“Ngen nyunta kehü nyu le kvulomvu kela shalo-o keja lati. Nzen-o kega kehünyu le sila

¹²lo anyugun le kazügü nyu ndilati.

¹³Ale Npugü n-Sunggigü; Ale nthyü nkoshüo nka zohünyo, ‘Nshvu nyalo; ale ncheshü tile.’ ”

¹⁴Npugü le zo, “Israel, nle shen lo kvumvue nshvu nya ale nkeche shüti. Ale Israel kenshün Sunggigü, hagun kenikelogü.

¹⁵Ale nthyüpe kenyuh kanyü keshün, ayikegwa hontse shüti. Lo nno kazüthundan nyuh-o tsü nkela; lo rinchodan boshwen pe kemphü ngwalati.

¹⁶Nle tsüdan pe tsangne ki shwen shüo; tsangkenbu no when sentinla, lo tsangkenbu terhi le tsüdan when kezen lati. Tsüsiki hagun kenyü loti, kechamvule ale hagun Sunggigü; hagun le Israel kenshün Sunggigü ahigü shwenti.

¹⁷“Atemi le zü rhodyü, lo anyugun le terio anyugun tero sinla yatselo, ale Npugü, anyugun kehi kenishüti; Ale Israel nyu Sunggigü, ale anyugun khela loho.

¹⁸Ale tehen yhun kemvu rincho ki züri no tsun lo kazü ketejon ki zü no nthün ti. Ale kazü kesi lope zübun thyü lo kazü kesin no zü kenthün bin thyü lati.

¹⁹Ale Sedar, akakia, martal lo oliv bin dan no kazü kesi nyu yhunti. Senbin kendi kazü no chün thyü lati, sahümane, juniper lo supress sen no yhun lati.

²⁰Temi le tsü hyuo, tsüthyükeshü güle Npugü, ale tsekethyü sha loti. Anyugun le Israel kenshün Sunggigü le tsü thyüshü le tse shaloti.”

²¹Npugü, Israel rajagü le hihontse kezoi le bin: “Hagun senyedan tero, hagun kerajo senryülo. Hagun le kenyalo kegwa jokegwa tsindan senryüta!

²²Ryüo ryükejü rüla zoshülo, tsüthyü solo agun no shalo nrün genyu. Gükela rüla zope jokekerabin nyu hishülo, lo a-kon-e zope agun hishüta.

²³Nyu le ryüjüyo zoshüta, tson yatselo agun le hagun le tero letse sha loti! Kegwa peha thyü shü nmvue kenke peha sanryü tson-o kenshvu pe agun süshüta!

²⁴Hagun lo hagun thodan le a-kon ndi; hagun rüshvu kehünyu le anyun ketsemi thyü bin laso!

²⁵“Ale npho ki yhunkehü temi nme kejülo laso; A-no teso kipon nwhen nsheryü nrün genyu a-zen ryüti. A-le kekvu kesennyu lope kembe hontse kedü, lo lakethyü nyu le kembe kedü kethyü hontselati.

²⁶Hagun segü le higü hi thyüti tse zo, tson-o agun no hagun le njü letse lola? Hagun nme-e tsügenyu jo nme-e zo shümvu; nme-e hagun le tha kezo nyü mvu!

²⁷Npugü, A higü le keritsin jolo higü pe Zion ka zoshü, Ale lilonyu nipe Jerusalem ki shüo zo, ‘Ntemi le ryüjü! Anyugun le kaki ryüjü laso!’

²⁸Ale teronyu dan nrikeshüka, anyugun nme-e tha kezoi ndi; Següe ale ketsokeshü jo kenilo mvula.

²⁹Tero hidan aphu lihi kemvu; anyugun nme-e thame thyülo kemvui-- teromen hidan aphu kenko kenkin ndi.”