Read Southern Rengma Naga ISAYA 43 Bible Online

ISAYA 43 - Southern Rengma Naga bible

ISAYA 43

¹Israel, hagun nyhun keshü Npugü le zo, “Nshvu nyalo, Ale hagun kenilo tile. Ale nzan zo-o nkolo, nle ahon.

²Nle zükentsun pfüthü güe, ale nzen hüti; nkenjünkethyü le nso kvuloho. Nle mah nyu gü yatse-e, nro loho; keseme ketsen le ryüe n nthyü loho.

³Kechamvule ale Npugü n-Sunggigü, nkenikeshü, Israel kenshün Sunggigü le. Ale nsü shwilo nrün genyu Ijipt khela ti; ale Sudan lo Seba khe lati.

⁴Ale nkeyhun kenishü nrün genyu senye apentha khelati, kechamvule nle agenyu minketsen nme lo ale nso-o kerühvu pe ntsü kehü genyu.

⁵Nshünya, ale nzen hü nyo! “Npho ki lo nkhün tsonthon tsin ki, ale ntemidan zen ryü lati.

⁶Ale anyugun no gunla lotse teso kipon nyuka zo lo tesin ki nyu no anyugun khin nya lotse lati. Kazü nithen ki kehü atemi ju no raniryü, kazü qün ki kebin nyu aphu ryüla lo.

⁷Anyugun le atemi, lo ale anyugun no zenkechwi senryüo atsü lotse nyhun shü.”

⁸Sunggigü le zo, “A temidan kope jokera bin nyu shülo. Anyugun yhütyü le bin, ai a-kepo; anyugun nyetin le bin, ai rügü laso!

⁹Senye kope jokekerabin nyu shülo. Anyugun tero digü le ryükejü tho zolo gwala? Anyugun digü le ntsoka thyü kebin rüla zoshü ola? Tero hidan no anyugun le njü letse kethyü shalo kegwa zansü sen ryülo, anyugun zoketsin zokebin jün zoshü nrün genyu.

¹⁰“Israel nyudan, hagun le a shahyu dan le; ale hagun kejüpe ago thyülo, hagun no asha lo atenyen lo ale kenshün Sunggigü letse shalo nrün genyu. Anyeki tero kecha nme ndi; nme bin hümvu, lo nme bin loho.

¹¹“A nti Npugü le, hagun kenilo kegwa le a npvü.

¹²Nyu le ryü tiyo ale zola, tson-o ale hagun che titse ryü. Tero kecha nme tson shümvu; hagun le a shahu dan le.

¹³Ale Sunggigü, lo a-zin tson binti. Nme akekvu nrhi loho; nme ale thyükehü tsü kelu loho.”

¹⁴Hagun kenishü kehü, Israel kenshün Sunggigü le zo, “Hagun kenilo nrün genyu, ale rihü dan me nipe Babilon whenti; Ale nyida chwida dan boren la, lo anyugun kenra khwen no kechü thyü lati.

¹⁵Ale Npugü, n Sunggigü kenshün gü. Israel ale n nyhun shüle, lo ale nrajagü.”

¹⁶Nduka Npugü le zida nyu tson thyüshü. zükentyü kekvu nyu tson nme thyüshü.

¹⁷A-le rihü kekvu dan me, terigari lo keru kezen rihü no nkela. Anyugun le chelao niso mvula, teryü kenben hontse nmhüla!

¹⁸A Npugü le zo, “Gükela ka thyükeshü tenyen binnya nmvue nduka thyükeshü gen sen bin nya.

¹⁹Ale thyü titse kebin thakeshün gü nrilo. Tsüle thyü bin laso, lo nle ntsoka tsü hyulo gwa! Ale tehen yhun kemvu nyu tson nme thyü shüti lo tsünyu züri tsun pe hagun tsüti.

²⁰Tehenthyüe arühvu ti; mesükerun lo tegü keda dan le a shwenti Ale kazü kesinyu züri zü no tsun pe ale kejükelo temi tsükeso ka.

²¹Anyugun le ale agenyu nyhun keshüdan, tsügenyu anyugun le akeshwen lüthyü ti!”

²²Npugü le zo, “Ai Israel, nle agenyu nnyuntsemi laso; Nle arühvu mvula.

²³Nle tanyü rope rüshvu kehü thoe senryüo atsü mvu laso; nle rothodan thyüpe arühvu mvu laso. Ale nno thape arühvu lotse hio n khvu kensu thyü mvu, nmvue tharün kenyü hio nno n nhokeli la mvule.

²⁴Nle a genyu tharünkenyü hei mvu nmvue n senru keshvu pe akerü nyun thyü shüe mvu. Tsonkethyü gü mvuo mu pe akhvu kensu thyü, lo thyüzü pe anyunketsemin thyü gwenzin.

²⁵Ai ale Sunggigü, nkemu jüshü kehügü le, lo Ale tsüle Ale genyu tha higü thyü hü nle. Ale nkemu sen-o n ntsun loho.

²⁶“Ngun jokekerabin nyu gü tile, nle me kemu jo sen ryülo! Nle njü letse kethyü kerajo khishülo!

²⁷Hagun bon keritsin gü le mula; hagun sharhinyu le mupe a ntsunla,

²⁸lo hagun kesen nyu le abin kenshün gü bo nrhula. Tsügenyu ale kenke seryüo Israel gen shü; ale atemi no kemeni la”