Read Southern Rengma Naga ISAYA 44 Bible Online

ISAYA 44 - Southern Rengma Naga bible

ISAYA 44

¹Npugü le zo, “Nyülo, agogü Israel, ale kejü kelo temi, Jakob tsipwen dan.

²Ale Npugü, hagun nyhunkeshü gü; hagun kenyu ka nyu ale hagun che gunryü laso. Nshvu nya, nle agogü, ale sokehü kejü kelo temi dan le.

³“Ale kazü kesin bin nyu khishü, lo rinyun dan no kazü kesin nyu tsunti. Ale akapu runpe nnyenyu gen shü lo ajochü pe ntsipwen gen shüti.

⁴Anyugun le zü le ntsen kehü bin nyu tehen le senkebin hontse, lo rinyu le tsun kehü seki sentyüro hontse ti.

⁵“Temidan nmeme tse, ‘Ale Npugü honle,’ tse zoti. Anyugun le Israel nyu zen-o kerhün lati. Nmeme tse Npugü zan gü lope a-ben ge vü lo tson-o ale Sunggigü temi nme letse koti.”

⁶Npugü, Israel ntsen lo sen kehügü, kekvutsin Npugü le hihontse kezoi lebin, “Ale kerigü, kenkhingü, a nti le Sunggigü; anyeki Sunggigü kecha ndi.

⁷Temi peha le ale thyükeshü hontse thyülole? Segü le thyü gunryü nrün rüla lo binkezen lo keni keti gwünkho rüla zolola?

⁸Nshvu nyalo, a temi jü! Hagun le shabin, ale nduka ryüo ntsoka keti ryü nrün thodan rüla aphu zohü, lo hagun le a shahyu dan. Sunggigü kecha le bin ole? Ale nyülo hükemvu tero kekvu le bin le?”

⁹Teromen thyükehü nyu aphu a-kon kendi nyu, lo tero dan anyugun le rüchün ngwasa kehüdan tsüe a-mi kendi. Tero rüshvu kehü nyu aphu yhütyü kepo lo tha shalo kemvu nyu nti. Anyugun le keja pfü lati.

¹⁰Tegi pe teromen chao tsü rüshvu kehü tsüle a-kegwa thame ndi!

¹¹Tsü rüshvu kehünyu aphu kemeni lati. Teromen zükehü nyu dan tsüle temi a-me thakecha kemvu. Anyugun no jokekerabin nyu ryüta--anyugun kershvu pe kejo pfüo kenjün thyüti.

¹²Tegi kechanyu le tegi khilo-o pe mah nyu ro-o tha thyühü. A-ben kenko sen-o kejon vü lope tegi tsü jon pe thamen cha lohü. Lo a-le tsü kethyü genyu nnyon, teri lo hokeli la hünyo.

¹³Tesen kechanyu le tesen ndolo hünyo. A-le thape tsü rholo, lo a-kanyü lope tsünyu yhen, tson-o temi kezegwa men chwiryü lahü, pe a-kanyu shü nrün genyu.

¹⁴A-le chün nyu Sedar sen, tesho sen, lo supress sen kegwa dan kejü pe thathyü nrün genyu phenlo. Nmvue a-le a-nyü rügu lahü kemvu senbin nme sen lo-o tsangkenri zü no tsü ntsen pe yhunkelo khwen hünyo.

¹⁵Temi le senbin nme ka peha pe zeü lo peha pe tero chahü. Peha pe mah thyüo ngvu lo tensü tsen hünyo; lo peha lope teromen chao tsü rüshvu hü.

¹⁶Tesen tsü peha pe mah thyü; thyüro tyü hü, tson-o hihontse zohü, “Nyün pe gwarile! Mahko gwaritsin le!”

¹⁷Lo a-sen pe tero cha, lo nkhün tsügü tsü rüshvu hü nyo. A-le tsügü ka kehithyüo hihontse zohü, “Nle a terogü, le, akenilolo!”

¹⁸Tsühontse kehünyu le pin pe anyugun le thyükehügü shalo mvushü. Anyugun le ketsingü ki anyugun yhüpo lo anyugun nyun pinla hünyo.

¹⁹Teromen thyükeshünyu le, “Ale tesen peha rola, tson-o mahgi gen tensü tsen lo thyü ro-o tyü. Lo a-sen pe tero men cha laso. Tsonlo ale tsühontse kethyü tesen pen nme mhundyü nkhün-o rüshvubin kela hile!” tson kethyü kon ketsü nyue shalo mvu.

²⁰Tsüle jonbü tyü kebin hontse gwenzin. A-nyun le a-thyü npinlao thame shalo mvu laso. A-le a-ben nyu teromen tejen senkebin tsüle sungginyu kemvu le tse kethyü shalo mvu.

²¹Npugü le zo, “Israel, hi rüchünlo; nle agogü letse kethyü rüchün lolo. Nno ago thyü nrün genyu n nyhun keshüle, lo ale n nmhin loho.

²²Ale nmha hontse nkemudan sholaso. Aki rani ryülo; ale nkenilo kehügü le.”

²³Hagun kenyüo sen shülo tsang dan! Kazü kentsun dan, nra senlo! Hagun sherhün-o nra senlo, kazüthun dan, lo chün nyu senbin aphu! Npugü le a-temi Israel kenilo-o a-keda pe hishü laso.

²⁴“Ale Npugü, nkenikelo gü; Ale n nyhun keshü gü; Ale Npugü, tha aphu Nyhun keshügü. Anti le tsang dan sükhun shü; Ale kazü kethyü kae nme ache shwimvu.

²⁵Ale temvünyu thyü npinla lo shyenyü rüla swü pe me tsontsin kehü nyu tson khinla hünyo. Ale thakeshanyu jo nmula tson-o anyugun le pin letse tesha shü hünyo.

²⁶Ai agogü le mhundyü ki rüla kezo ka, ale atharhi dan tesha titse lilo ni keshüka, ale tharhi dan lo mhundyü rüla kezo dan tsü no ketsin thyüla hü. Ale Jerusalem ka temi le tsünyu yhun nititse kethyü zo, lo Juda nyida dan ka anyugun le thyü nilo titse zohü. Nyida tsüdan le kenke nyu niso loti.

²⁷Ale ahza nme hoshüo züda no sin lahü.

²⁸Ale Sirus ka, ‘Nle agenyu kekvu senti; nle ale nno thyülo kenyü dan thyüti; Nle Jerusalem no thyüni lotse lo kershvuka binjwenlo lotse ahza hoshüti.’ ”