Read Southern Rengma Naga ISAYA 45 Bible Online

ISAYA 45 - Southern Rengma Naga bible

ISAYA 45

¹Npugü le Sirus no raja thyü titse kejü laso! A-no senye so kvulo lotse kejüshü laso; a-no rajanyu kekvu kenmhela lotse nishü; Npugü le a-genyu nyida dan khinrun khinshe shü lati. Npugü le Sirus ka zo,

²“Ale ntson ndoshü lati, kazüthun lo rincho dan thyü tejon lao. Ale lazogi khinrun dan borenla lo tegi khincha bose lati.

³Ale kezün lo kebu bin nyu kenya pe ntsüti; tsüsiki ale Npugü letse kethyü lo Israel Sunggigü le nzen nnio nkolo letse kethyü shaloti.

⁴Nno agogü Israel keche nrün genyu ale nkejülo, ale kejülo kela temidan. Ale kerhvu keda pe ntsü laso, nle asha hümvue.

⁵“Ale Npugü, anyeki tero kecha ndi. Nle kenko sen mvulo keshvu ale pe ntsüti, nle asha hümvue.

⁶Ale higü thyü keshü le kazü nme kipon gungü kecha keti ale Npugü lo anyeki tero kecha ndi letse shalo nrün genyu.

⁷Ale keben lo kezen-e thyüshü; Ale jochü lo kenke-e senryü hü. Ale Npugü, hidan aphu thyühü.

⁸Ale tsangkenri hontse tsangge kvukelo nishü; Kazügü le tsü njwen nrün genyu khinshe ti lo kenikelo lo joketsin nyu punti Ale Npugü, hi thyü shüti.”

⁹Nyonla nme le a-thyükeshügü zenkenyilo gwati ole? A-ko nnyonla kecha hontsele. Gin le lakethyü gü ka a-le nyuthyü hüyo ketso hü ole? La güle a-rhenkeshü gü ka a-le thyülo shamvu letse kenya hü ole?

¹⁰Temi peha le apepvünyu ka, “Nyu thyüo annyu pe hihontse lala?” tse shünlo hü le?

¹¹Npugü, Israel kenshün Sunggigü, ryükejü tho aphu rhenkeshü güle zo, “Nle anyenyu rüla aka shün zümvu nmvue ale thyü mvulo keshvu pe aka zozü mvu!

¹²Ale kazü thyü shü lo temi nyhun pe tsünyu keshü gü tsüle. Ale a kekvu nyu tsang dan sükhun shü; Ale yhüko, she lo shenyü ketsen hü nyo.

¹³Ale Sirus no akerüchün dan thyü pen lo tha thyü njü shü nrün genyu a-thu keyhun shü. Ale a-kegü tson aphu thyü njü shü lati. A-le anyidagü, Jerusalem thyüni ti, tson-o atemi donyu dan hoshü lati. Nme-e a-jonshe nmvue jvüjwe pe a-tsüo hithyü bin mvu.” Kekvutsin Npugü le zoshü laso.

¹⁴Npugü le Israel ka zo, “Ijipt lo Sudan kenya tsüle nhon thyü, lo Seba nyu temi kethondan tsüle ngonyu thyü lati; anyugun le ronpe dyü pfüo nsi then ti. Anyugun nmhundyü nyu nkhün-o hihontse zoti: ‘Sunggigü le nzen hünyo, a-nti Sunggigü le.

¹⁵Israel Sunggigü, a-temi kenilo kehügü le, a-npvü a-kebu hünyo.

¹⁶Teromen thyü kehünyu aphu keja pfüla, anyugun aphu kemeni lati.

¹⁷Ai Israel we Npugü le kenilo laso, lo a-le kvukelo tsüle kethonthen binti; a-temi dan le kemenila loho.’ ”

¹⁸Npugü le tsang dan rhenshü-- a-nti Sunggigü! A-le kazü rhen-o thyüshü-- a-le tsüno binthon titse thyü nkoshü. Tsünyu mele yhun mvula titse rhen shümvu, ai temi no yhun nrün bin thyüshü. Tsügü tsüle hihontse zokeshü güle, “Ale Npugü, lo anyeki tero kecha ndi.

¹⁹Ale kekebu ki zomvu nmvue akerüchün dan pe kebula mvu. Ale Israel nyu no kazü gwamvu kela mele yhun kemvu bin nyu afü mvulo shvule tsemvü. Ale Npugü, lo ale ketsin gü zo hü nyo; Ale kenjügü tsü pe meno shalo hünyo.”

²⁰Npugü le zo, “Senye dan, ryüo kequenlo, keda kazü che kelanyu nrhokelo nyu aphu; jokera nrün genyu ryülo! Tesen pe Teromen züshüo, anyugun kenilo keho terogü ka hikehü nyu aphu thame shalo bin mvule!

²¹Ryüo kerajo pe jokekera binnyu shülo; meno penkehü nyu no khinyunyu keshünsha shwi. Segü le ryükejü ki tha thyü nrün nchwe nyu zolo ola? Tsüle a-temi kenilokehü, Npugü, Sunggigü ale kemvu ole? Tero kecha nme-e ndi.

²²“Aki ryüo kenilo lalo, kazü temidan aphu. Binkehü Sunggigü le anti.

²³Ale zoshwikeshü le ketsin, lo tsüle kelu loho. Ale aphu mhundyü ka ale tse sen hünyo: Temi aphu ryüo amhundyü ka khosenti lo ajo zenti tse swen soti.

²⁴“Anyugun le agen nti kvukelo lo kenko hyulo; ai a nrhikehü nyu we aphu keja pfü kenjün thyüti.

²⁵Ale Npugü, Jakob tsipwen aphu kenishwi loti, tson-o anyugun le keshwen pe atsüti.