Read Southern Rengma Naga ISAYA 46 Bible Online

ISAYA 46 - Southern Rengma Naga bible

ISAYA 46

¹“Hile Babilon terogü genyu a-keni! Mele gwengwa Bel lo Nebo hvu rüshvu hü, ai ntsoka we pe gada khvu thyüla, nyukhu kenjünthyü kela khvukensu thyü laso.

²Teromen le anyugun npvü anyugun keni loho; mele tsüdan rhü pfü tin laso. Hile Babilon terodan genyu keniso!

³“Jakob nyenyudan, akhwen nyüshülo, atemi nsen kelo nyu aphu. Hagun nnyukelo kanyu ale hagun nucha hü laso.

⁴Ale hagun Sunggigü, tsügenyu hagun ntsen loti hagun le thenla lo hagun pe pfüchon lae ale hagun nucha ti. Ale hagun nyhunshü, lo hagun ntsen loti; Ale kekeche pe hagun tsüo hagun kenishwi loti.

⁵“Hagun le segü lope azen kendyü titse ola?” “Ahontse kethyü peha ko bin le tse ole? Npugü le ketso.

⁶Temi dan le kenyakhin khinsheo suna soshühü; anyugun le kesükü ka rakagi ndo hünyo. Anyugun le sunakecha nyu jonshe pe teromen thyüshü; tson-o nkhün tsügü tsü rüshvu hünyo!

⁷Anyugun le tsü pe anyugun bugen shüo pen hünyo; lo pe a-bin nyu shüo sobin hü, tson-o a-kebinbin nkenlo mvu bin hünyo. Temi le tsügü ka kehi thyüe kehi keni lomvu nmvue kenjün kethyü nyu a-kenilo hümvu.

⁸“Hagun kemunyudan, higü rüchün shüshwi; ale nyuthyüshüyo.

⁹Nduka nyu thyülayo rüchün shülo; lo ahontse kethyü kecha ndi tsekethyü shalolo.

¹⁰Binzen kanyu ryü nrün rüla zola; lo gwünkho kethon kebin kanyu nyuthyü tiyo zoshüla hü. Atharhidan le thyüpen mvu loho tsekethyü lo ale nyu thyütitse binyo aphu thyüti tse zoshü.

¹¹Ale npho ki temi nme ko shübin; a-le kheno hontse nyetsü ryüti lo ale rhikenjügü thyüpen ti. Ale zo laso, lo tsüle thyü ti.

¹²“Akhwen nyüshülo, nyun kerü temi, kvukelo le luki hüzun letse rüchün kehü dan.

¹³Ale kvukelo jongü sen-o kho niryüjü, tsüle nithen mvu laso. Ale kvulola nrün gü tsüle ntsüla loho. Ale Jerusalem keniloti lo tsünyu Israel kerhvu senryüo shüti.”