Read Southern Rengma Naga ISAYA 47 Bible Online

ISAYA 47 - Southern Rengma Naga bible

ISAYA 47

¹Npugü le zo, “Babilon, n rajakhün ge tsenryü la, lo kemphü nyu duntin lalo. Nle gwün gwa we phusen nyu, mele lolo kemvu nyida thyühü, ai nle bwe lo nchwa sinlo hosele nye! Ntsoka we nle medo laso!

²Ketserütso pe tho rashü lo! Mhunsun phi khila! Nphi yhünla! Rinyu dan pfüthü nrün genyu nmirün süsolo!

³Temi dan le nkeyhü hyuti; hagun le kemeni lo keja pfü kela anyugun le hyuti. Ale khün loti, lo nme-e akhin loho.”

⁴Israel kenshün Sunggigü le ngun hoshü laso-- a-zan le kekvutsin Npugü.

⁵Npugü le Babilon ka zo, “Kezen nyu matse dunbin lo; anyugun le nkhipe senye dan rajagi letse kosin lohoso!

⁶Ale a temi gen anyunta; anyugun lope ahon thyümvu kela hontse ryü: Ale anyugun no nhensin nyu bin, lo nle anyugun shwinjün mvula; nle kethen kesü ge-e njvü gwamvu.

⁷N wele a-zintse rajagi thyübin ti ado tse rüchün, tson-o tha hidan hile dihontse keni thyüla tiyo rüchün shü mvula,

⁸“Nyüshülo, kenyü yhüdyü thyü kehügi, kenshvu lo nyun kenkhi ndi letse rüchün kehü dan. Nle Sunggigü tsülakhi gon letseo temi nme-e nhontse kethyü ndi letse hü. Nle magi la kemvui lo nnyenyu ndila kemvui letse rüchün hü.

⁹Khenyüme ka, ai gwünkho nme, hihvu hi thyüpen lati. Nle jadu thyü lihi thyübin-e n nyepvü lo n nyenyu le ndi lati.

¹⁰“Nle n npvü n gwakemvu sha tsentsü bin; nme n hyu mvu letse rüchün hünyo. Nthakesha lo kentsen le ntsontsin züla, tson-o n npvü nka, ‘Ale Sunggigü- nme a-hontse kethyü ndi,’ tsonhü.

¹¹Kenjünkethyü le ngen ryü tiso, lo n jadu nme tsü khin loho. Kenke le whütse ngen ryü lati-- kenke tsügü le nle rüchün hü kemvu hon!

¹²N jadu tedo lo a-thodan ntsen binta; nle nselo kanyu tsü sen hü laso. Tsüdan tsüle peha ka ncheshü ti ado; nle nkenrhinyu kedün lo-e sha loho.

¹³Nle nsenkethyü hyulo-e nkekvu ndi. Shyenyü rüla swüpe hagun tsontsin kehünyu no soryü hagun cheshüta-- tsüdan le shyenyü swükehünyu, tsangdan me rhilo-o shye kechwi tha thyü nrün rüla hagun ka zokehünyu.

¹⁴“Anyugun le npenkon hontse lao, mah le tsüdan rolati! Anyugun npvü anyugun keni loho lati-- mah güle anyugun genyu nyünri kela genyu, anyugun n gvü kenyünlo kegwa mah ketsü nyue ndi lati.

¹⁵Anyugun le hagun gen thakegwa thyüshü nrün le tsü gwenzin-- tsüdan tsüle hagun keyhunthen shün lo tenyen hükela shyenyü keswünyu dan. Anyugun aphu hagun khekülao anyugun keshathyü tinlati, lo hagun kenishü nrün nme-e nsen mvu lati.”