Read Southern Rengma Naga ISAYA 48 Bible Online

ISAYA 48 - Southern Rengma Naga bible

ISAYA 48

¹Hi nyü shülo, Israel temi dan, Hagun le Juda tsipwen: Hagun le Npugü zan nyu swen lo Israel Sunggigü rüshvu titse hünyo-- ai hagun le ketsin nyu zomvu.

²Hagun le ketekho-o hagun le nyida kenshün gü Sunnyünyu letse lo Israel Sunggigü, a-zan le kekvutsin Npugü, tsügü genyu yhunhü letse zohü.

³Npugü le Israel ka zo, “Nduka ale ryükejü rüla zoshü; lo ale whütse tsüno thyüpenlo.

⁴Kechamvule nle nnyun rüpe tegi kekvu hontse lo lazo ketsü hontse kela ale shala.

⁵Tsügenyu ale ndukanyu nrüla zolaso, thatho thyü kemvu kanyu zoshüla, hagun no teromen dan le tsüdan thyülo letse zomvu nrün genyu.

⁶“Ale zokenjü aphu ntsoka thyü bin nyo; ale nchwen nyu zokeshü dan tsüle ketsin tse kethyü hagun le tenyenlo zü. Ntsoka ale tha keshün thyüni nrün pe hagun ka zoti, ale himhundyü pe hishü hü kemvu gwünkho.

⁷Ntsoka nyu ale tsüdan no thyü bin; gükela ka nme tsühontse thyümvu zun. Tsonla yatse kethyü we hagun le, tsü rüla aphu shala letse zo nrün.

⁸Nle nyü mvu, nle sha mvu, nnyukelo kanyu nnyetin khinshe mvu. Kechamvu, n nche kanyu me nren, lo njvü gwamvuo thathyü nrün ale sha laso.

⁹“Temi no azan shwen nrün genyu, Ale anyunkenta süni; ale tsü kekhe hünyo lo hagun nke loho.

¹⁰Ale kenjün kethyü mah nyu hagun kegwa keshvu shwi laso, rükagi lope mah nyu rokenshün kela hontse. Ai nle lihi-e kemvu tse kethyü ale sha laso.

¹¹Ale thyükehü tsüle agenyu nti-- ale azan pe me no rühvu mvu kela thyüla loho, nmvue nme no zankechwigü süsen loho tsüno a npvü ahon thyübin mvulo shvu.”

¹²Npugü le zo, “Akhwenyülo, ale kolo kela temi, Israel! Ale Sunggigü, kerigü lo kenkhingü, anti le Sunggigü!

¹³Aben le kazü binkezen thyüshü lo tsangdan sükhun shü. Ale tsang lo kazü kokeshü ka anyugun le gwen tse ryü.

¹⁴“Ryü kequenlo-o nyülo, hagun aphu! Teronyu nme-e ale kejülokela temi dan le Babilon when nrün zolo mvu; ale a-no thyü nyü kebin a-le thyüti.

¹⁵A-kokelo gü tsüle ale; ale a-zen chwio a-no gwalo.

¹⁶“Akho nniryüo a khwen nyülo. Binzen kanyu ale mhuntsun zoshü laso, lo a-zintse ajo no ketsin thyü penlo.” (Aphuso kekvu Npugü le a-kekvu pe atsüo anishü laso.)

¹⁷Israel nyu kenshün Sunggigü, Npugü hagun kenilo kehügü le zo, “Ale Npugü, n Sunggigü, ale nno gwalo titseo nsenthyü nyü hünyo, lo nle gü mvulo keshvu nyu ntsontsin shü hünyo.

¹⁸“Nle a johokeshü nyü yatse kethyü we! Jochü le sinla hükemvu rinyu hontse ngenyu tsunlo nrün! Kvukelo le züda seka zükentyü hontse ngen ryü nrün le.

¹⁹N tsipwen le hachon hontse swülobu keho thyü, lo ale anyugun no thame kae nken mvu nrün.”

²⁰Hagun kekhin ndi shü tse Babilon nyu chwi lalo! Shekerhün jolo higü zo sen shülo; bin aphu no shalo; “Npugü le a-gogü Israel kenilo laso.”

²¹Npugü le kazü kesi nyu tsangkethyü ka a-temi zen-o chwikethyü ka anyugun le terio kenjün thyüla mvu. A-le tsonye gen züno pen chwiryü; a-le tsonye gü vükho shüo züno nthün chwiryü.

²²Npugü le zo, “Kemu nyu genyu we thame nyun kebwen ndi.”