Read Southern Rengma Naga ISAYA 49 Bible Online

ISAYA 49 - Southern Rengma Naga bible

ISAYA 49

¹Akhwen nyülo, nithenki senye dan, tsonthon ki yhunkehü temi dan! A nnyukelo mhundyü nyu Npugü le akejülo, lo akhipe ago thyü laso.

²A-le ajo lope jenthon yi hontse shü. A-le a-ben pe anolo. A-le senlo kegwa thora kentsen hontse athyü shüle.

³A-le aka zo, “Israel, nle ago le; ngenyu temi le ashwenti.”

⁴Ale zo, “Ale thathyü shüle, ai tsüle ditsüki a-mi kendi thyü layo! Ale thathyüo akekvu ndila, ai thame thyü penlo mvu.” Tson-e ale Npugü no ano penshü nrün genyu a-tenyenti; atho genyu a-le achün pe atsüki.

⁵Annyu kemvu kanyu Npugü le akejü laso; ano a-temi dan zen niryü, lo Israel nyu tsenchvukela dan zen niryü nrün genyu a-le alope a-gonyu thyü shü. Npugü le kerhvu pe atsühü, a-le kekvu khipe atsü kehügü.

⁶Npugü le aka zo, “A gogü, ale ngenyu thatho gonkvu kethyü nmele binzun. Nle Israel temi nrhokelo nyu penso keshü nti mvule, ale nno senye dan keben nme ko thyü shüti-- kazü aphu no kenilo nrün genyu.”

⁷Israel nyu kenshün Sunggigü lo kenikelo gü le kemeni la lo tsipwen dan le ntsü kela gü, lo kekvunyu dan gogü ka zo: “N hoshü kela raja danle hyuti lo nkerhvu genyu anyugun le soti; ” Tsühontse ti, kechamvu Npugü le a-gogü kejülo; Israel kenshün Sunggigü le a-le zoshwikeshü dan zen hünyo.

⁸Npugü le a-temi dan ka zo, “Nkenilo nrün gwünkho le ryülo ale akenyü pe nteshati lo nle kekeche kehi kenishüti. Ale n rikhun lo nno loti lo ngen temi aphu zen-o kejozen loti. Ale nno ntsoka yhun mvu kela kazü nyu tsü yhun nilo ti.

⁹Ale donyu ka, ‘Chwilo!’ lo kezün nyu kebin nyu no, ‘Kebengü nyu chwiryüla lo!’ tse zoti. Anyugun le tanyü le rincho ki a-chvülo tyü kehü hontseti;

¹⁰anyugun le nnyon nmvue teri loho. Tsang kethyü nmvue kazü kesi kenyün no anyugun nthyü loho, kechamvule anyugun kesogü le tsontsin hüti. A-le anyugun tsontsin zen-o zükenthün bin nyu güti.

¹¹“Ale tsonda thyü pe kazüthun dan nken shüti lo atemi dan no njwen nrün tson nme ndo shüti.

¹²Atemi ju le tsonthon ki ryüti, teso ki lo npho kipon, lo tesinzin Aswan ki.”

¹³Lüthyülo, tsangdan! Sherhün-o senlo kazü! Kazüthun dan no lüthyü chwiryülo! Npugü le a-temi no ketegvü loti; a-temi kenjünthyü kebin nyu njün shüti.

¹⁴Ai Jerusalem nyu temi le zo, “Npugü le agun khela! A-le agun nmhin laso.”

¹⁵Tsügenyu Npugü le tsü kenio, “Nyeginyu le a-nyu nmhinla lo a-le nnyu keshü gü so mvula logwa ole? Me jvü nyu nmele a-nyun nmhinla hü yatse-e Ale hagun nmhinla loho.

¹⁶Jerusalem, ale thame kae n-nmhin loho! Ale nzan pe abenje nyu thu laso.

¹⁷“Nthyü ketseni shü nrün nyule whütse ryüjüso, tson-o nke kehünyu le tinlati.

¹⁸Kerükeri-o tha thyükebin nrishülo! Ntemi dan le kaki ryüla titse kequen binso! Ale rhünkehü Sunggigü ketsin, nle n temi genyu nsü pvü ti, shenhügi le kontyü pfüo a-sü kethyü hontse ti.

¹⁹“Hagun kazü le nkelao khela-- ai ntsoka we tsüle ryüo tsünyu yhun titse kebin nyu genyu nrün sa lati. Lo hagun nke kela nyu dan tsüle nithen ki tin lati.

²⁰Hagun temi me kazü kechaki nnyu kelonyu le khenyüme hagun ka hihontse zosoti, ‘Kazü higü le shenri laso-- agun le yhun nrün genyu kazü sensin mvulo shvu binle!’

²¹Tsüselo hagun le hagun nthon-o, ‘Senyu le agenyu ntsenyu hidan zenshüyo? Ale anyu nmhen lao zenniloho lale. A hülao me kazünyu bintinla-- Segü le ntsenyu hidan lüyi shüyo? A npvü khepe binkelale-- ntsenyu hidan le dikipon ryüyo?’ ”

²²Aphuso kekvu Npugü le a-temi ka zo: “Ale senye ka zensü thyü shüti, tsonlo tsüdan le hagun nyenyu zen-o kaki ryüti.

²³Rajanyu le hagun pvü hontse, lo rajaginyu le hagun jvünyu hontse ti. Anyugun le hagun mhundyü nkhün-o hagun rühvuti; tsüdan le anyugun thyüketsenyo sao hagun kerhvu pe teshati. Tson-o hagun le ale Npugü letse sha loti; lo akeche khwen kehünyu nme no a-shesela loho.”

²⁴Nle shüpahü nyu hon seü lo gwa ole? keda rigwa kemvu ben nyu donyu kenishwilo gwa ole?

²⁵Npugü le kenio, “Tsühontse thyü shü güjü nyo. Shüpahü ben nyu dothyü kebin nyu zentin la, lo kekvu gwakemvu nyu hon seülo lati. Ale nzen kega kehünyu zen kega ti, lo ale n nyenyu kenishwi loti.

²⁶Ale n nshwen kehünyu no khinyunyu kedushvu lati; anyugun le nthün lo temi dukeshvu nyu nzeü lati. Tsonlo temi aphu ale Npugü, hagun kenilo lo hoshü kehügü letse shalo ti. Anyugun le ale Israel nyu kekvu Sunggigü letse shalo ti.”